الضلال البعيد

12

#الضلال_البعيد

بقلمي السيدة العلوية

الجزء 12

كرار: من يوم الي اختفت هذه البنية واني اعيش بجحيم الوحدة والسجن الانفرادي .. ورجعلي كابوس التعاطي واريد بأي وسيلة اتعاطى .. بس شلون وشلون اكدر اشوف مخدر ومنو يساعدني اوف ياحسام لوهسة يمي جان ماخليتني احتاج وافتر بأفكاري .. معقولة التعود والادمان .. ساعة اريد اصير قوي وساعة ارجع اضعف وتتزاحم افكاري السودة والوحدة ترجع تفترسني والهلوسة الي تاخذني بدخان من ذكريات .. ومستمر بس على الاقل هالفترة كدرو يفتحون القيود عني يعني صرت اكدر اتحرك بالغرفة بوحدي بس الغرفة مقفولة .. اريد ارتاح بس الشيطان الي بداخلي شلون يرتاح ويخليني وهو وضيفته يوسوسلي .. بس ليش بالي مشغول بهاي الاجنبية اللي جنها ولد .. وليت اتذكر سوالفها واضحك .. ملابسها ملابس ولد واول مادخلت علية حسبالي زلمة ومن تمعنت بملامحها يلة عرفت هي بنية . بس شجانت تقصد من تكول اني نقية ؟؟ وليش مهتمة بالنقاء ؟؟ اشو اني محسوب على ملة الاسلام وكل المعاصي الي تخطر على البال سويتها .. شرب وشربت واصحاب سوء ورافقت ومشيت وياهم ولهيت وياهم .. اصلا بالعكس مااذكر واحد عدل من اصحابي كلهم تعبانين مثلي ..علاقات مشبوهة مع النسوان وعندي وختمتها بالتعاطي عادي عادي قابل شكو ليش مكبرين السالفة .. بس ياكرار هي الضاهر كبيرة السالفة وانته جاي تغشم روحك لو جنك نسيت ليث .. وبعدين انته شعرفت على هالاجنبية وخابصها انتي وانتي وخليتها زعلت منك .. يلة ارتاح هسة من عافتك وكامت ماتجي تسولف وياك .. واذا ماتجي عادي شنو يصير اذا ماتجي مو مهم خلي ماتجي .. هااااااااا صدك ؟؟ يعني غيابها عادي عنك كرار ؟؟ هالانسانه الي ناقشتك وسوالفها بريئة وعاقلة وسدت فراغ التعاطي عادي عندك لو غابت ؟؟ هيج عندك صار عادي تأذي الناس وخلي يروحون وهم منزعجين منك ؟؟ لااااااااااا ...... بس !! مو بس ولاشي اعترف وكول بطل هالغرور الي بداخلك وهالحيرة اكو كومة سوالف ماكدرت تكولها لاخوك وشنو حصلت من راح ليث .. تعود من تأذي شخص . اعتذر لاتخلي لاحد يمك دين .. صير منصف ...

جنت مهموم ومنزعج ومااحس الا الممرضة دخلت وهي مبتسمة واني مثل المكتئب الغاضب ومالي واهس ارد على ابتسامتها بأبتسامة مع العلم .. ديني يكول ابتسامتك في وجه اخيك صدقة ........

الممرضة : بالتأكيد افتقدت لصديقتك

كرار : عفواّ

الممرضة : القديسة

كرار : مااحجي برتغالي اني اذا تحجين احجي شوية انكليزي وياية

الممرضة : فاتيما

كرار: اي والله وين راحت

الممرضة : اكو حرائق بالغابات الي هم بيها وان شاء الله تكون بخير

كرار : شكد كرهتج {كلتها بالعراقي } اني ماتفائلت بيج ابد .. من راحت الممرضة وهي خلت بداخلي خوف ورعب بس عند الله علمه .. حرائق !! هاي عود ليش ومنين الحرائق هاي اول مرة اعرف وزين هاي البنية هسة شصار بيها هسة اوف لو هسة اكدر اطلع ضليت افتر بالغرفة واريد بس طريقة اكدر اطلع ماخليت مكان مادورت بس عجزت وكرهت روحي وحالة العجز العندي .. اول مرة ابجي .. ابجي من العجز الي بي اني ... وهاي ثاني مرة شخص راح يموت واني جنت سبب بزعلة من عندي .. اااااااااااااه ياكرار شكثر قلب قاسي واسود شايل وبقيت اضرب براسي على الحائط وماادري بروحي من القوة والوجع ..

فاتيما :اني جنت ادري عندي جنون وفضول بس بهالطريقة ماجنت اعرف وماجنت اتصور .. اخذت الكاميرا وبديت اتبع مجموعة رجال الاطفاء وهم يحاولون يسيطرون على الحرائق وبديت اتوغل وراهم بدون مايحسون واحاول اصور بس الجو جان كلش حار ورطب واني جنت قبل يوم كلش مريضة لان ماكلت بصورة صحيحة وهسة المكان الي اني بي حيل خطر .. شفت مجموعة جانو يحاولون يسيطرون على جهة لان بدأت النار تمشي بخط لحد مناطق مأهولة هي صحيح تم اخلائها حوالي 1800 من رجال المطافي يحاولون في اخماد الحرائق تدعمهم طائرات ..

المشكلة الرياح جانت كلش قوية وهي جانت عامل بأنتشار الحرائق واني بديت احس بالعطش المي الي بالجنطة مالتي خلص وحيل تعبت ومستمرة ومااحس الا ورجلي انزلقت واخذتني وبديت اوكع والمشكلة جنت كل مااريد احاول اسيطر على روحي اريد اكوم بالزايد اتعثر .. الخوف والرعب الي بي اني موطبيعي يمكن جان اخر أسم ذكرته هو .{. فاطمة } .. كدمات وجروح صارت بجسمي ومااحس الا واني فاقدة الوعي ...

كرار : من كثر التفكير والضرب واللوم بروحي غفيت شلون ماادري ماحسيت الا على صوت جرس كلش قوي بالمستشفى .. اثاري يمكن جهاز انذار او ماادري شنو ..

الاستاذ توماس : كان اتعس خبر من خبروني انه صغيرتي كان من الممكن تروح بالحرائق .. الحمدلله الي نجاها .. صحيح هواي اعداد ماتو بس شنو جان ممكن اكول لابوها لو لأمها .. من كالو لكوها متعرضه لحادث بين الاشجار من جانت تصور الحرائق .. نقلناها للمستشفى ..

مصطفى: توماس انته شجاي تحجي وهسة هي وين ؟؟

توماس : بمستشفى (_____)

مصطفى: اخذت زوجتي ورحت باقصى سرعتي .. اني كل خوفي على الجوهرة الي طلعت بيها من الدنيا ,, ايش يافاطمة ليش هيج تخليني بهالمواقف ..

كلارا: رغم تماسكي بس الخوف الي بداخلي والرعب موطبيعي ومن وصلنا للمستشفى شفت منضر كلش مزعج .. جان جسمها كلها عبارة عن قطعة بيضاء لان الكدمات والحروق بكل مكان .. جانت بعدها فاقدة الوعي من كمية الادوية والمهدئات .. اني حاولت امثل انه اني متماسكة لكن بداخلي انسانه مشلولة من الوجع على بنتي لكن الي هزني ودمر الصبر الي عندي هو مصطفى .. من شافها كان يصرخ بكل قوة ويحظن بيها وحاولو الممرضين يمنعوه وهو مستمر يبكي .. بعدين كدرت اطلع وياه للحديقة الخارجية ..

مصطفى : صعب من شفت منضرها توقعتها ماتت وماراح ترجعلي وماكدرت اتمالك روحي .. شكلها خلاني اتأذى .. اني دائما امنعها تطلع وتبقى هيج فترات ليش سمحتلها تطلع ليش ..