الضلال البعيد

14

#الضلال_البعيد

بقلمي السيدة العلوية

الجزء 14

فاتيما : حسيت بأنزعاج وألم على وضع كرار .. صعب انه انسان يكدر يبتعد عن أهله كل هالفترة ومجبر مو مخير .. لهذا انطيته تلفوني حتى يتصل بأهله .. مااعرف ليش حسيت بلهيب نار يبدأ بداخلي ومااعرف شنو الي صار .. احس بريبة وشك وخوف وهلع .. ومااعرف اريد اسأله بس اخاف احرجه وهو اول مرة يتجرأ ويطلب مني المساعدة بشكل مباشر ..

فاتيما : كرار اخذ راحتك اني راح اجيب كوب قهوة واجي

كرار : {حسيت براحة من طلعت فاطمة .. مااعرف ليش كذبت عليها ومااعرف احس اريد اتراجع بس بعد اتصلت بحسام ..} الو ...

حسام : الو .. الو .. منو وياي

كرار : جنك نسيت صويحبك

حسام : عمي منو الغاب على منو .. وين يمعود وين أراضيك {وحسيت الدنيا ماوسعتني اخيرا راح اكدر انفذ انتقامي واخلص من اخر شخص بعائلة عمي }

كرار : اني موجود ..

حسام : وين كلما اجي لبيتكم يكولون مسافر ادري بيك ماتريد تشوفني بس عمي بس الله الكبير

كرار : بطل بطل هالسوالف .. اي مسافر صدك .. موبالعراق اني..

حسام : صدك تحجي وين ؟؟ وليش ماادري اني ومن شوكت .. وين كول خلي اجيك

كرار: اني بالبرتغال وهذا ترى مو تلفوني .. بس شهر وكالو ارجع للعراق .. وبهالاثناء دخلت فاتيما.. لاول مرة احس بخوف واني اشوف هالانسانه الغريبة بأيمانها وشكلها وتاجها الغريب .. تاجها جان برائتها وطفولتها وأمنياتها اللي تريد تحققها ... نضراتها جانت تسألني وتتمنى مني الاجابة .. وأول مرة انتبه انه هي مريضة وهي الي تحتاج احد يمرضها .. بس برغم هذا كانت تداريني .. شنو هالانسانية المزروعة بداخلج ومنين ينبوعها .. خليني ارتوي لعل ارجع مثلج انسان ... احس بيها تريد تكول كلمات .. بس تخفيها وهي تشرب قهوتها الحارة واني انهيت مكالمتي وماهتميت لاول مرة بحسام .. حسام الي ياما تعاركت وية ليث علمود لايزعل .. حسام الي خليت بيت اهلي وانفجر البيت بقنبلة ولولا ستر وحفظ ربي جان راحن اخواتي .. عجيب سرك ياحسام ..

كرار : شكرا فاطمة اني اتصلت بأهلي .. وبلغتهم انه بعد شهر ..

فاتيما : تسافر !! ترجع للعراق ..

كرار : اي .. لازم ارجع ..

فاتيما : ترجع المن ..

كرار: لامي .. لابوية

فاتيما : لاتسافر

كرار: ليش شكو

فاتيما : مااعرف احس ماعدك عزيمة تترك نفس الطريق الي جابك هنا .. بعدك تحن وتريد نفس الطريق .. خاف نفس الطريق ياخذك وخاف ليث ياخذك وياه ..

كرار : وانتي ليش مهتمة

فاتميا : اني انسان ولازم اهتم .. انته قنبلة موقوته وماجاي تعرف بنفسك .. تريد تنهي حياتك .. بس حياتك مرتبطة بيهة حياة ناس ثانية .. امك .. اخواتك .. ابوك ...

كرار: وليث .. الي جنت السبب بموته ..

فاتيما : ارجع كل المشاكل تحل الا المشاعر .. لاتكون السبب بموت ناس اخرين ..

كرار : اهوووو قلبتيها دراما وأكشن .. كوليلي .. هم فكرتي تزورين العراق ..

فاتيما : اتمنى بس مصطفى مايقبل ..

كرار: شلون وية مصطفى .. لا انتي اختي واكدر اخذج وياي ولا انتي بنت عمي واكدر احكم عليج .. الله كريم ..

فاتيما : من تروح للسيدة ذات المسبحة ابلغها سلامي

كرار : وين اروح هي ماعدها قبر معلوم .. بس من أزور اولادها ابلغهم سلامج واكوللهم اكو برتغالية تتمنى تجي ..

فاتيما : اييييييي .... يلة اني استأذن اروح لغرفتي ...

بعد يومين من الاتصال .. بدأ حسام يتصل برقم فاتيما ..

فاتيما : جنت متوقعة انه هذا الرقم من أهل كرار وجنت فرحانه واني اجاوبهم .. لحد مارفعت السماعة.. تفاجأت بصوت غريب .. اني اعرف كرار ماعنده بس ليث أخ بس هذا منو ..

حسام : تفأجأت من عرفت كرار هناك وعنده علاقة بوحدة اجنبية والنوب منطيته تلفونها واكيد المسائل متطورة بيناتهم والعلاقة بينهم اكيد مو شرعية .. ومن جاوبتني ابد ماقصرت وياها .. ماخليت من كلامي التعبان واني اعرف انكليزي ووبديت اراسلها بالرسائل والكلام البذيء والغريب هي ابد ماتجاوبت وياي ..

فاتيما : بيومها كرهت كرار كلش .. توقعت هو يعرف بهالتصرفات وهيج اسلوب .. .. بس ليش اني شنو الي سويته .. معقوله جان يمثل !! اي ليش لا .. معقول اكو بشر تقدمله يد المساعدة وهو كل مايهتم له انه ينهش بيك .. صح اني بدولة غربية لكن ابد ماسمحت لاي احد يتجرأ وياي بهيج اسلوب بالكلام .. والصور .. بس بعدين بديت اربط الاحداث وعرفت انه هالحسام وراه ســر ولازم اعرف شنو ومنو حسام ...مهما كلفني الامر