لم تتوقع نور تلك الصدمه التى ألقت على مسامعها منذ ثوانى هى لم تأخذ راحه طويلة منذ ان ذهبت الى التدريب الأول أغمضت عيناها وضربت على المكتب بقوه وهتفت بغضب: دا لو ناوين يعذبونى مش هيطلعونى معاك دا احنا بنتعارك أكتر ما بنتكلم يا جدع
عبدلله: فعلا ازاى اللواء حمدى خلاكوا تطلعوا مع بعض
أدهم: والله الراجل ده بيفهم هو شكله كان عارف ان احنا معملناش فوتسيشن فا حب يخلينا نعمله فى الصحراء
عبدلله: ههههههه صح انا شايف كده برضو
نور: انا مش قادرة أستحمل خفة أكتر من كده هطق والله
ادهم: أنا استبشرت خير من السفريه ديه يا نونى والله
نور: ليه ان شاء الله كنا طالعين نصيف فى بلطيم دا احنا طالعين الصحراء
أدهم: بلطيم..!! أنتى مش بتفهمى فى المصايف على فكره دا احنا رايحين حته رومانسيه على الأخر واحلى من الساحل وشرم الشيخ وبكره تقولى أدهم قال..........
**********
عادت نور الى المنزل وهى فى قمة غضبها لم تكن تريد الذهاب الى ذلك التدريب ابدا ومن الممكن ان يكون ذلك التدريب أصعب من الأول ولاكن سؤالها الأكبر هو لماذا ستذهب هى وأدهم فقط لماذا لم تكن مع احد اخر او لماذا لم يذهب احد اخر من الاساس
تلقت نور اتصالا من أدهم فألتقطت هاتفها وأجابت سريعا وهى فى قمه اكتئابها...بص لو متصل عشان تستظرف فا ياريت تقفل أحسن
تصنع ادهم الحزن وهو يقول: أبدا يا حبيبتى انا عارف اد اى أنتى زعلانه بسبب السفريه ديه بس انا هقلك حاجة تفرحك
نور: بجد.!! اى هى قول بسرعه
ادهم: السفريه اتلغت بالنسبالك انا هطلع مع حد تانى خالص
صرخت نور بسعادة: عاااا مش مصدقة نفسى والله انا اكيد ربنا بيحبنى الحمدلله يارب..الحمدلله
أدهم: أستنى بس..عايز أكمل اهدى صحيح انتى هتسافرى وللأسف انا هسافر
نور: اممم معلش يا حبيبى دول هم بالمتير شهر..شهرين
لازم تستحمل يعنى خليك استرونج مان كده
أدهم: احم..أصل انتى فاهمه الموضوع غلط أنا مش هسافر لوحدى
نور: اومال مع مين ..عبدلله اكيد يا ياسين
أدهم: لا خالص ولا ده ولا ده أنا هطلع مع واحده اسمها مروه ديه زم...
نور: نننننننعم يا اخويا مروه مين ديه وطبعا انت الى اقترحت الأقتراح اللذيذ ده على اللواء حمدى
ادهم: عرفتى منين.. احم هو انا مرضتش بس اتعبك معايا فى السفر وكده فا قلت أطلع أنا وحد تانى
نور: قسما بالله ما حد طالع التدريب ده الا انا وانت بس وقول للست مروة ديه لمى نفسك ولا هى بتحب السهوكة وقلة الأدب
أدهم: يا حبيبتى ديه حضرت الشنط خلاص وبعدين أنتى غيرانه ولا اى..؟!
نور: الشنط تفضيها تانى عادى وبعدين مين قال انى غيرانه انا بس كنت عايزة اطلعها عشان أدرب وابقى كويسة
ادهم: لا ونبى..على العموم يا ستى التدريب ده أسبوعين بس هيصى بقى
نور: لا مش معقول با بركه دعاكى يا امى لما اروح بقى اشيل الحاجة الزيادة من الشنطة
ادهم: استفسار بس هى الزيادات أد اى بالظبط
نور: شنطة ونص تقريبا
ادهم: نعم....!! شنطة ونص مش بقلك فاكره نفسك طالعه الساحل دا هو يا أمى تدريب بتقضى بالهدوم الى عليكى ممكن كذا سنة
نور: كذا سنه..دا الرجالة المعفنه بس انما البنات لا البنات دول..
أدهم: ششش..انا رايح انام السفر بكره يا حاجة انتى ممكن تسهرينا بكلامك ده
نور: يعنى مش عايز تسمعنى ماشى يا أدهم روح نام وسبنى لوحدى حزينة ومكتئبه كده و...أهئ..اهئ
ادهم: يا خبر أنتى بتعيطى أنا أسف يا حبيبتى أنا ممكن أسمعلك اهو بس يا دوب خمس دقايق
نور: أتنيل خمس دقايق أنت فاكرنى بعيط عشانك ما تقفل انا بعيط عشان لقيت حله الكرومب خلصت يا خسارة كنت هموت وأكل صبعين
ادهم: كرومب الساعه ٢بليل الحمدلله أن الحله خلص كان ممكن نطير بكره فى العربيه
