دخلو البنات تبعوه وليلى بقات مع المنظمين كانو فواحد الفيلا كبيرة قدام البحر...نور ورميساء دخلوهم للصال ﻹين غيلبسوهم ويديرو ماكياج...جلسوهم و برساو ليهم الشعر ومن بعد بوكلاوه شوية خفيف ..ورشو عليهم سبراي الماكياج داروه تقيل ب2 سموكي اسود و عكر فالهوي غامق.. من بعد لبسوهم اول لبسة نور كان شورط قصير لاصق بسميطات رقاق بحال ليبة غير فخاضها باينين وقبية قصيرة وكاسكيط (الصورة) و رميساء لبسات شورط قصير وتيشورت و كويرة من فوق وعقدات على خصرها قاميجة... خرجو البنات بعد اللمسات الاخيرة ..
ليلى: واااو جاوكم هما هادوك..😍.
المصور: تقولي تصممو على قبلهم..
ليلى: وراه هما لي عطاوني الالهام هاد المرة..
المصور: معندي منقول هاد الكوليكسيون غتضرب الضربة هاد المرة وتفقصي ليا العديان..
ليلى: ههههه من فمك للباب السماء..
المصور: وياله احبيباتي تبعوني التصوير غيكون برا كولشي واجد...
تبعوه البنات وليلى القدام كتحتت معاه...
نور: واااع هادشي وااعر انا متحمسة.😍.
رميساء: تانا ولكن الخلعة الخلعة...هههه كنتفكر بلي لعبنا عليهم العشرة و قولبناهم كتشدني التبوريشة..وخاصة ماما تاهي يسحاب ليها وافقو..
نور: متخافيش اصلا الدراري منين غتجيهم مجلة الموضة
رميساء: عندك الحق هههه...
المصور: ياله البنات كل وحدة غتصور بوحدها.☺☺☺.
تفارقو البنات كل وحدة شدها مصور كانو فالبحر ولكن الفوق شوية فجنب الفيلا...كور جلسات فواحد البلاصة تما كان فيها الشجر والدنيا ماشي خضرة ..جلسات تما وخداو ليها بزاف الصور ولي قال ليها المصور كديرو ..حتا ولات هي كتبوزا وهو عاجباه خدمتها...ونفس الشي بالنسبة لرميساء خداو بزاف الصور ..بدلو اللبسة الاخرى رميساء لبسا قميجة هابطة حتا للفخاض فالرمادي وشابو ونور قبية قصيرة كتبين كرشها و مكتوبة بالبيض..كاسكيط كحلة ومن التحت فيها شكا الورد...جرجو تاني كيوصووهم ..رميساء جنب البحر كان الجو مشمس وفيه الضباب البيض كل شوية يدوز تحت الشمس يضرقها وكتغبر تا كدوز الضبابة ...ونور كانت كتصور حدا الفيلا ...بقاو شحال على التصاور والبوزات وكل شوية يعاودو يقادو ليهم..شوية الو ليهم يستاراحو شوية ..نور بعدات عليهم ورميساء وليلى الداخل فالفيلا كيستاراحو مع الطاقم..شعلات نور gارو حيت متوترة ومقلقة على قبل موضوعها مع زاين...خرج فهاد اللحظة المصور بانت ليه كتكمي و حادرة راسها كنتشوف فشي حاجة...هز الكاميرة وصورها وخدا شحال ودخل....
من بعد لبسوهم هاد المرة بحال بحال 2 ديال لي غوب نفس الستيل غير وحدة فالكحل والاخرى فالابيض..وخبطو لجنب البحر وخداو ليهم تصاور حتا نور ورميساء جاهم الحماق ودخلو للبحر كيضاربو بالماء ويتجاراو وليلى كتغوت عليهم..
ليلى: ويلي ويلي حماقيتو...ههههه هادوك الحمقات خرجو براكة...
المصور كيضحك ويصور عاجبو الحال والطاقم كيشوفو فيهم ويضحكو حتا منظر ليلى كتغوت ضحكهم...
سالاو ودخلو دوشو ورجعو حوايجهم وصلا 3 العشية ...جمعو شوية وعرفو بلي العدد غيخرج هاد اليوماين..
ركبو البنات مع ليلى سايقة بيهم...حتى اتاصل ياسر ورميساء بدات تفتف...
