Catch Me If You Can (Completed)

CHAPTER 29: CLOSURE

Chapter 29: Closure

~VICTORIA~

"Ano sa tingin mo ang ginagawa mo?"

Dumagundong ang boses ko sa loob ng sasakyan ng hacker. Napasandal ako at paulit-ulit na minasahe ang noo ko. Ano ba ang nakain niya at nakialam sa trabaho ko?

"I just wanted to help!" sigaw niya sa akin. Alam kong naiinis na rin siya ngunit doble ang inis na nararamdaman ko ngayon.

"Nakita mo ba kung ano ang epekto ng sinasabi mong tulong? Mas pinapalaki mo lang ang problema!"

Nag-smirk lang siya at ikinuyom ang palad. Nakakainis siya! Paano na ngayon ang proyektong iyon? Nadagdagan pa ang iisipin ko! Sino ang isa pang magnanakaw na iyon?

"Let's get going and talk about it at home," wika niya at pinaandar ang sasakyan. Nanatili lamang akong tahimik hanggang sa makabalik kami sa apartment.

Pagdating namin roon ay nakaupo silang lahat sa sala. Nasa harapan din si Gia at mukhang siya ang kinakausap nina Mimo at Sael.

"Magkapatid talaga kayo ni V?" narinig kong tanong ni Mimo.

"Not by blood," sagot naman ni Gia.

Nag-angat ng tingin si Sael nang mapansin ang presensya namin. Bahagyang napakunot ang kanyang noo nang makita kaming magkasama ng hacker. Isa-isa niya kaming tiningnan ng masama bago ibinalik kay Gia ang tingin. Saka lang din ako napansin ng huli.

"V, nandito ka na pala. Saan kayo galing?" nakangiting tanong niya sa akin.

"May binili lang."

Hindi naman sumagot ang hacker at naupo na lamang. Gaya ko ay nahulog din siya sa malalim na pag-iisip. Mukhang nababahala rin siya dahil sa naging palpak na proyekto. Aba, dapat lang mabahala siya! Siya naman ang dahilan kung bakit iyon pumalpak.

Tumayo ako at kinuha ang bag ko.

"Saan ka pupunta?" biglang tanong ni Gia. Napatigil ako at lumingin sa kanya. Maging ang tatlo ay napatingin rin sa akin at naghihintay ng sagot ko.

"Uuwi."

"You're leaving me here?" nakataas ang kilay na tanong ni Gia. "V, seryoso iiwan mo ako rito? Sino ang kasama ko?" Nagkunwari pa siyang tila nasasaktan at kilala ko si Gia. Alam ko kung umaarte lang siya o hindi.

"Parehas nating gustong manirahang mag-isa," sagot ko sa kanya. "Wala namang nananatili rito kaya mas maiging dito ka na lang muna."

Bahagyang natigilan si Gia. Marahil ay naisip niyang kilala ko talaga siya.

"I can join you here Gia," wika ni Mimo at agad naman siyang binato ni Sa-el ng unan.

"Hoy Tanda, kadiri ka. Baka kung anong gawin mo sa kanya!" wika ng huli. Madalas talaga silang magbangayan ni Mimo.

"Huwag mo akong itulad sa kaimoralan mo Sa-el!"

Hindi na ako magsalita pa at tumalikod na. Hindi pa man ako nakakaisang hakbang ay nagsalita na rin ang hacker.

"I'm going too. V, pwede kang sumabay sa akin," wika niya. Napalingon ako sa kanya at sa iba pa. Napansin ko ang pagkunot ng noo ni Sa-el, gayunpaman ay hindi ko iyon pinansin. Nagpatuloy na lang ako sa paglabas at naramdaman kong sumunod ang hacker sa akin.

Paglabas ko ng gate ay nag-abang ako ng sasakyan habang nakapameywang na tiningnan ako ng hacker. Tila bagot na bagot siya at nakakuyom ang kanyang kamao. Padabog na binuksan niya ang pinto ng kanyang kotse.

"Get in." Ma-autoridad niyang wika. Nagkunwari naman akong walang narinig. "I said get in."

Dumating ang isang taxi at agad ko iyong pinara. Paghinto ng taxi sa harap ko ay agad kong binuksan ang pinto ngunit bigla na lamang iyong sinara ng hacker. Bahagya akong nagulat sa ginawa niya ngunit hindi na ako nagkaroon ng pagkakataong magreklamo dahil kinaladkad niya ako papunta sa kotse niya!