#حكاية_سمر..
،،،،،،،،،،بقلم الكاتبه زينب ماجد،،،،،،،،،،،
البارت_8
ما اتحمل يتقرب منج ..احركه حرك انتي وياه.. بقيت صافنه بوجها.. وهوه يحجي بعصبيه..
بقى يباوعلي.. واحس النار تطلع من عيونه.. بعدين دار وجها.. وبقى يفرك بشعره بحركه..
كتله بكر.. اني احب عادل.. دار وجها.. وصاح شحبيتي منه.. كتله هوه زوجي ويكفيه ستر عليه وما حجه اي شي كدام شخص..
شفت لما اجو عماتك.. بقى يضحك ومحسس احد بذنبي.. راد يحجي.. ونزل اديه وسكت.. انوب باوعلي..
وكال سمر لا تتأملين بعادل حب.. ما يريدج.. كتله لا تحجي هيج.. اني اريد اكسبه.. صح خسرته بس يستاهل اتعب علمود اكسبه..
كال لا تعبين نفسج.. انتي مو اباله.. وراح تتندمين.. كتله ليش.. ما حجه.. فتح الجراره.. طلع قطن.. وديتول..
وكال ديريلي.. اتقربت منه.. بقى يداوي جروح ركبتي وحلكي.. كله دم يجري.. انوب خلالي.. لاصقات جروح..
وكال نامي هنا.. اني طالع بره.. لا ترجعين للغرفه و هوه شارب يأذيج.. طلع.. صراحه.. كل عمري متخيلت فد يوم بكر..
يتعامل ويايه بهشكل.. هذا الانسان اللي تحسه خالي من المشاعر.. يدافع عني بهشكل.. ما انكر.. اني عشت وطلعت من هلازمه بفضله..
طلعت. هه لسه الجاي اصعب يا سمر.. اتحمل يا كلبي اااااه.. اتقربت لسريره.. خليت راسي علمخده..
اني من عادتي.. امد ايدي جوه المخده وانام على بطني.. مديت ايدي واخذت المخده.. لكيت الفانيله الجنت لابستها..
مصفطها.. ومخليها تحت المخده مالته.. عود ليش مخلاني اغسلها.. شمرتها.. هوه حر شسويله..
نمت.. لل3 بليل.. كمت طلعت.. رحت للغرفه.. لكيت عادل نايم.. اتقربت منه.. وجها مزورك..
وشفته مورمه.. مديت ايدي على شعره.. ومسحت.. وكمت رحت جبت القطن والديتول من غرفة بكر واجيت..
اتقربت بكل هدوء.. اعقم جرح شفته.. كعد على حيله...ابتعدت منه بخوف.. كال ما اريدج حواليه.. ابتعدي..
كتله تأمر.. بس اداوي جرحك.. لزمني من شعري وكال.. هاي الجروح بسببج.. مو انتي رحتي شكيتيني البكر..
وهاي اول يوم دخلتي بيه البيتنه.. خليتي الدم بيني وبين اخوي.. كتله والله ما شكيت لاحد.. هوه الوحده شافني واجاك..
دار وجها.. عادل الله يخليك انطيني فرصه.. اصلح غلطي وياك.. كال شتصلحين.. ترجعين باكر مثلا..
كتله والله بعمري محد طخ جسمي غيرك.. بيش تريد احلفلك.. وغلاتك عندي.. من وقت اللي بستني عد اهلي..
تغيرت كل مشاعري وياك.. مشاعر الاخوه والصداقه.. اتبدلت حب بهذاك اليوم.. كال يا يوم هذا..
كتله لما اجيت وكعدنه بغرفتي.. ضحك بستهزاء كال انتي مصدكه اني احبج.. كتله اعرف انته متحبني بس انطيني فرصه انجرب..
كال شتجربين.. كتله اجرب اكسب حبك.. ضحك وكام مني وهوه يهز بيده.. لبس قميصه وحجه وياي.. كال لو تردين تسويلي فضل..
ابتعدي من حياتي.. كمت يمه.. لزمته من كتافه.. كتله اوك عادل.. مو جنت تعتبرني اخت.. ارجع اعتبرني هيج..
وخلي حياتنه تمشي بهلخصوص.. كال بعد ما اتقربتلج.. مشاعر الاخوه سقطت عندي.. كتله وهسه.. كال هسه ما املكلج.. اي مشاعر..
حتى ما اكرهج.. لان انتي مو بعيني اصلا.. كتله تتعود شوي شوي بس انطيني فرصه.. ما باوعلي.. جر الجاكيت وطلع..
اتقربت للسرير.. اخذت المخده اللي جان نايم عليها.. واشتميتها.. بلكت اشتم بيها ريحة عادل..
عوووع كلها ريحة شرب.. يلعن بليسك شهريحه.. نزعت شرشف المخده وشمرته.. وصفنت.. يا ترى اكدر اخلي عادل يحبني..
اي اني اصلا.. حبيته شنو سبب حبي ما اعرف.. بس هوه مجرد ما صار زوجي روحي تعلكت بيه..
وعادل تركيبه تخبل بين العصبيه والضحك والتحشيش والخبال.. ما اعرف شلون حبيته واحس نفسي مستعده اتحمل كولشي منه..
صفنت واركان.. هه معقوله ما جنت احب اركان.. لا جنت احبه.. بس نسيته من يوم القفلت الجهاز بوجها..
احس نفسي ضايعه.. مشاعري متخربطه.. كلبي يدك لعادل.. وروحي تحن لاركان.. ولكلماته وحنيته..
اني المن.. شمرت نفسي علسرير بحركه يائسه.. جريت موبايلي.. فتحته.. لكيت كومه رسايل من اركان..
حذفتها بدون ما اقره.. وكتبتله رساله.. اركان ارجوك بعد لتتصل ولا ادز رساله.. البيناتنا خلص..
واني حاليا متزوجه.. واعرف انته انسان مؤمن متقبل لنفسك.. تراسل وحده متزوجه.. وادمر بيتها..
دست ارسال.. وصل اشعار التوصيل.. حذفتها.. ورجعت نمت.. دا انام.. دك الجهاز.. رقم غريب..
رفعت خط.. بدون ما احجي.. كال الوو.. اعرف الصوت.. كلت منو.. كال اني بكر..
كتله هاا هلا بكر.. كال مو كتلج نامي بالغرفه ليش طالعه.. كتله رجعت الغرفتي.. كال سمر لا تتقربين لعادل..
كتله ليش.. كال هذا صح يضحك ويحشش بس اخاف عليج من وحشيته لما يسكر.. اخاف على ساعه يخنكج ويموتج ومحد يلحك عليج..
لتتقربين يمه خليج بعيده عنه.. كتله بكر هذا زوجي.. كال اووووه غبيه لو احجي منا لباجر مراح تفهمين عليه.. باي.. وقفله..
شمرت لجهاز.. ونمت.. كعدت الصبح.. طبيت سبحت ما احس الا الباب تريد تنكسر عليه من كد الدك القوي..
لبست بساع وطلعت.. لكيت رنا.. دفعتني.. وكالت باعيلي هنا.. انتي بقاج عادل مجرد خدامه عدنه افتهمتي..
فضل من عدنه دنستر على فضايحج.. فتحترمين نفسج.. وتتعاملين حالج حال الخدامه..
الحمام ممنوع تسبحين بيه.. ترحين للتواليت.. تخلين سطل وتسبحين.. غير هيج لو تخيسين متستعملين حمامنه..
وحده وصخه مثلج.. نستنكس تغسل ويانه.. ودفعتني بره وطلعت.. اتجمعت الدموع بعيني..
وخنكتني العبره احس بلعومي.. اختنك بعبرتي.. بس ما نزلت ادموعي جمدت بعيوني.. واني اشوف بكر يطلع من غرفته..
كال شبيج.. كتله ماكو شي.. اتقرب اكثر.. اكو احد سمعج كلام.. كولي.. هزيت راسي.. كتله لا..
كال عيونج تحجي غير هيج.. من كال هيج.. انفجرت بالدموع ورحت لغرفتي.. صاح تعاااي منو وياج..
ما رديت دخلت غرفتي وقفلت الباب.. ودموعي تجري.. شنو الذنب السويته واصير خدامه..
غلط ارتكبته واني طفله ما استاهل اتعاقب بهشكل.. والله ما استاهل.. وكعدت ابجي..
سمعت بكر على صوته ويا رنا.. ويتحقق وياها ويكلها شبيها سمررررررر.. كالتله بيها سرطان انشالله
شبيها قابل كولشي مابيها.. بس كتلها ما اريد تستخدم الحمام ويانه استنكس منها..
كالها.. رناااا محترمج لان مخطوبه ويومين وتتزوجين.. فخليني مطول بالي عليج ولا تثيرين اعصابي..
غصب عليج تحترميها.. وحالها من حالج.. اجت عمتي كاتله ليش يمه حالها من حال رنا.. رنا مخطوبه وبعد يومين عروس..
لا تكدر خاطر رنا علمود سمر.. كاللها ماشي.. سهله.. عافهن ومشا.. اجت عمتي دكت الباب..
عدلت نفسي ومسحت عيوني وفتحت الباب.. كالت باعي.. ابوج اتبره منج.. يعني هسه انتي مو بت اخوي..
تشتغلين هنا مثل الخدامه.. وان حجيتي اخلي عادل يتصرف وياج.. ولو شكيتي البكر.. هذا الله كتبه عليج..
هزيت راسي بالموافقه.. كالت يله.. بدلي هلملابس الملونه.. ولبسي ملابس شغل ونضفي البيت كله.. اريده يلمع..
ولو اجو خطار لو بكر.. تركضين تلبسين ملابس عروس وتكعدين افتهمتي.. كتلها اي عمه.. كالت غمه وعمه بعينج انشالله..
تفلت عليه ومشت.. طلعت.. خليت اديه على وجهي وبقيت ابجي.. انوب كمت لبست ملابس عاديه بسيطه..
ومشطت شعري.. وطلعت انضف.. وهمه يتريكون.. طب بكر.. اني نسيت هيه حذرتني اشتغل كدامه..
بقيت مشغوله اشتغل وافكر بهمي وبالوضع الخليت نفسي بيه..
صاح بكر مو احجي وياج انتبهت.. كتله اسفه جنت شارده بتفكيري.. كال تريكتي.. كتله ما اشتهي..
دار وجها على امه.. كالها.. لو بنتج المدلله.. ثاني يوم عرسها.. تكعد تمسح الكاع مثل سمر تقبلين..
كالتله شسويلها.. كتلها تعاي تريكي.. كالت لا عمه اني احب اشتغل واقضي وقتي بشغل.. ما احب الاكل..
التفت عليها.. وكاللها.. بس لا تجذبين يمه.. سمر واعرفها.. ما تقدم على بطنها شي.. لو تموت.. تاكل يله تكوم..
انتبهت.. هذا منين يعرف طبعي.. صدوك بيه طبع ما اشتغل الا اكل.. لان ادوخ.. وما اتحمل الجوع..
كال اتركي من ايدج.. وسويلي ريوك.. كمت.. طلعتله بيض كتله شتحب اسويلكياه..
كال بيض وطماطه.. حجه وطلع.. سويت البيض والطماطه.. والجبن والجاي بس هوه ماكو..
اجت امه كرصتني من زندي وكالت مو كتلج كدام بكر لا تشتغلين لو الا تتمسكنين.. انفتح الباب وكالت اصطبريلي..
دخل هوه.. جايب كيمر عرب وكاهي.. ابتسمت.. كتله هاي وين لكيته هسه الساعه 11..كيمر وكاهي..
ابتسم ابتسامه خفيفه.. كال عندي صديق.. علشارع يشتغل ورحت جبت منه قبل ليخلص..
صبيلنه خلناكل هنا علطاوله.. عمتي كامت تباوع للكاهي والكيمر.. وتتمحرك..
صبيت وهوه كاعد.. صبيتله جاي.. جاي اكعد خزرتني عمتي.. كمت.. كال شكو..
كتله لاااا اروح اكمل شغلي احسن.. دار وجها على امه.. سوت نفسها.. ادور بثلاجه..
كال ممنوع تشتغلين قبل اسبوع.. تخلص السبعه مالتج وبعد السبعه عود بلشي.. عله صوته وصاح صار معلووووم..
ديسمع امه واخته.. هزيت راسي.. كعدت اكل.. وبكر كل شوي يشيل اطراف عينه ويباوعلي..
نظراته غريبه.. بس احس بأمان بمراقبته.. اجت امه.. كالتله بكر اريد 150 الف كالها شكوو..
كالتله اريد اتسوك للبيت الخطار يوميه جاينه وماعدنه مسواك.. كالها اني اتسوك فد شوي..
كالتله وعود ليش ما تنطيني اني اروح.. كالها وقت اللي تمشين كلامي وتسمعين الاكوله وتنفذيه..
ذاك الوقت اموال الدنيا اخليها بأيدج.. كالتله وشسوينه.. شبيك بكر.. باوعلها ابرود كاللها اعرف تفتهميني وتعرفين شنو الاقصده..
ما حاج اعيد.. كالته سمر موو.. رفعت راسي.. ردت افتهم شنو الموضوع.. اني شدخلني.. هوه دار وجها بلا مبالاة وكام.. وما رد..
طلع.. ضربتني على راسي وكالت كومي كملي شغلج واذا اجه وشفتج تشتغلين كدامه والله اذبحج افتهمتي..
تحجي ويه كارصتني حيل.. هزيت راسي.. والعبره خانكتني.. عافتي وكالت يله امشي.. وصاحت..
رناااوي.. ماماتي تعاي هذا كاهي وكيمر اكلي.. اريدج توردين علعرس.. اجت كالت يااا كاهي والله احبه..
وكعدت تاكل.. كمت كملت البيت واشتغلت.. دخل عادل مر من يمي ولا كأني موجوده راح للغرفه..
صاح رناااا ريوك بداعتي.. صاحتله تدلل عدوله.. واجت يمي.. كالت سوي ريوك لعادل وعوفي الصينيه اني اخذها..
كمت سويتله الريوك.. واخذت الصينيه.. دا اخل للغرفه.. كالت شكلت تعاي جيبي الصينيه اني اوديها..
مهتميتلها دخلت الصينيه وخليتها كبال عادل.. رفع انفه بتكبر.. كال ما كتلج الج صحت على رنا..
كتله هيه رنا كالت سوي ريوك لرجلج.. كال همم.. اوك عوفي واطلعي..
عفته.. وطلعت.. لزمتني رنا.. من ايدي وكالت مو كتلج اني اوديه الصينيه.. ابتسمت.. كتلها وشنو الفرق..
ما ردت اتعبج.. كالت جذابه هاي سوالفج متمشي.. وتضربني على ايدي بقبضة. ايدها.. اخذت نفس و عفتها ومشيت..
دا اشتغل.. وصاح عادل سمررررررررر.. كمزت من مكاني.. اول مره يصيحني.. ركضت اله.. كتله هااا..
كال وجعااا.. اركان شعنده يدك عليج.. كتله شنو.. كال اركااان ديدوك.. جاوبي وفتحي السبيكر كدامي يله..
اريد اتحرك من مكاني جمدت.. لزم الموبايل.. وكال ردي.. دمي صفر من الهبطه والخوف وو… يتبع
🌺🌺🌺🌺
الله يعينها.. دفعت الثمن غالي والجاي اغلى.. تتوقعون شراح يسوي عادل باتصال اركان..
متابعه شيقه..
#زينب_ماجد
(تقييم 5 نجوم للبيج لحتى يقوه ونستمر..)
