#حكاية_سمر.. (( الجزء الثاني ))
،،،،،،،،،،بقلم الكاتبه زينب ماجد،،،،،،،،،،،
البارت_6
بكر.. سمر هسه اني يم التانكي وفاتح لايت واباوع.. اكو جوه هيج مثل القماش الاسود ما ادري علاكه.. هوه هذا التقصديه..
سمر.. باوعت لامي.. كالت هااا.. كتلها لكه هيج شي.. يعني معقوله حياتي كلها سحر.. بكر تكدر اطلعه وتشوف شنو بيها..
الام.. لا لا لا.. ليطلعه.. اتركيه..
سمر.. شلون ماما غير سحر واطلعه ونبطله..
بكر،، وج سمر يمعوده.. شلقصه.. فهميني..
الام.. لا اطلعيه.. كوليله شكرا وعوفيه اني اتصرف..
سمر.. شتسوين يعني..
بكر.. لج سمررررر شنو الموضوع اطلعه..
سمر.. لا بكر اتركه..
بكر.. لج مبينه وصاخه.. خل اكول لامي انظف التانكي لا نتمرض..
سمر.. بكر هذا سحر مو وصاخه..
بكر.. شنووو شلج بهسالفه سمسم.. بربج مصعدتني بهلمغربيه ومخلي راسي بالتانكي وتكليلي سحر..
فعلا النسوان عقلجن فصمه.. واني عبالي فد شي واجيت اركض اصعد وادور..
سمر.. بكر اني هم ممصدكه. بس من ارجع للبيت اخابرك وافهمك علتمام.. هسه اروح باي..
بكر.. ٱפگـيہ باي.. انتضر اتصال صغير منج بليل هااا..
سمر.. انشالله.. قفلته.. باوعت لامي.. كتلها ليش مخليتينه نطلعه..
الام.. لو طلعناه.. تخلي غيره.. احتمال.. لتزم اخلي عمتج تتصرف..
سمر.. شتخلي غيره يوم اني اصلا بعد ما الي رجعه لعادل خل تاخذه بالعافيه هسه هوه عاد اشونه..
الام.. معليج اني اتصرف.. يله تعاي ندخل عيب من اهلي نبقى كاعدات بالحديقه..
سمر.. يله.. دخلت واني افكر بهلسحر شنو يربي معقوله عود حنين مسويتلي سحر..
واله اتوقع كولشي منها.. هيه التنام ويه رجال غريب وياخذ عذريتها قبل الزواج علمود تورطه.. تخاف الله..
وين ماكو وصخه ..هادمه حياتي يالله.. سمعت صوت الاذان.. اتذكرت خالتي من تكولي السحر مسيطر عليج.. لان قليلة ايمان..
كمت توضيت وصليت.. وراها كمت ويه نسوان خوالي اني ونجوى نسوي عشا..
ونضفنه البيت وكعدنه نسولف.. خوالي صدوك شوي عدهم تعقيد ويخنكون.. ميخلون المره توصل باب البيت..
وحتى من نطلع بالكراج نلبس حجاب.. وطلعه ممنوعه اببد.. بس حيل كلبهم طيب وجمعتهم تخبل..
ما عدهم غيبه ونميمه وحجي وسوالف.. كعداتهم ضحك وشقه وطيبين حيل احبهم..
بس نسوانهم هواي ياخذن غيبه.. من ينجمعن. وكالن شفتي هلي شسوت.. شفتي هاي زعلانه وهاي مطلكه..
ما يبقن واخد ميكصنه ويحجن بيه.. اني ابد ما احب ادخل بحياة الناس.. واضوج اكعد بهيج كعدات..
بس الصراحه حتى غيبتهن وسوالفهن ونسه.. خخخخ كاعدين لليل.. مخليه الجهاز الموبايل بجسمي..
كاعده وياهم.. ورج الجهاز اتصال...يمه كمزت.. كالن شبيج.. كتلهم هاا ااااا اريد اروح للحمام..
كمت ركضت.. لكيته بكر.. جاي اجاوب ضربني خالو كاظم على ضهري.. هاا ولج سمّيره شجاي تسوين هنا..
اااا خالو صديقتي خابرتني واجيت اجاوبها لان جوه حجي وعيب منها تسمع..
-هااا جا اخذي راحتج خالوو..
-راح.. دا ارد علاتصال.. انقطع.. دزيت رساله لبكر.. كتله اني ارمشلك بليل من اكون وحدي ٱפگـيہ
رجعلي ..ٱפگـيہ انتضرج لعد.. سديت الموبايل.. ورحت يمهم.. لليل.. فرشولنه كلنه بغرفه وحده ويه امي وابويه 😐..
باوعت لنجوي تباوع هيج 😦 واني اباوعلها هيج 😢.. كالتلي شلون اريد اخابر ميزو.. كتلها واني اريد اخابر بكر اشووون..
صاحت امي شبيجن تعالن نامن باجر بالسته الصبح طالعين لبيتنه.. كتلها اي يوم جايه.. ونجوى تكرص بيدي وتكول اريد اخابر..
جريتها للفراش.. ونمنه.. واتقربت يمها وهمست.. بس خينامون اني وياج نطلع بالحديقه الوره البيت ونكعد نسولف..
كالت ماشي.. كتلها هوه مازن شوكت يتقدملج.. كالت عساس قبل شهرين واجلنها علمود سالفة بابا والجلطه مالته..
كتلها اي زين بالعطله خل يجي يخطب ويتمم على خير انشالله..
-اوووف يسمر هيج واكون يمه واطلع من عقدت احمد والله متت..
-انشالله حبيبي.. اني استلم دور احمد ابدالج هههه
-لا اسم الله.. بلكت تطلكين وتتزوجين اللي ترتاحين وياه وتخلصين..
-والله يا نونه.. غير بكر ما يحلى بعيني رجال.. بس شسوي على كولته اليه ..يكولي احبك جدا واعلم ان الطريق الى المستحيل طويل..
-الله يساعده خطيه هوه شكد يحبج.. بس سمر من شوكت حبج يعني من دخلتي بيتهم لو شوكت..
تتذكريه جان عقده ومتكبر وشايف نفسه الكلمه يمن بيها علبشر من يحجي وياه.
-اي جنت اعتقده عقده نفسيه ومتكبر.. بس جان ظام كل هبحب بكلمه.. ويخجل يعترف بيها..
-بكر مو خجول.. اصلا صلف بلسانه.
-مو قصة خجل.. وانما خجله كبرياء.. وتتذكرين عادل من جان يغازلني كدامه.. ونتشاقه وهوه يتضايق..
هوه جان يعتقد عادل هم يحبني.. ومن تقدملي عادل.. سكت.. بس من باعني اله الخسيس.. انشمرت بأيده بعد انجبر يحبني ويستمر بحبي..
واني نجبرت احبه..
-زين سمر انتي تحبيه بكد ما هوه يحبج..
-اعشقه مو بس احبه.. بس ابقى خايفه بحبه.. اعرف هوه يكدر يواجه ويحارب بحبي..
بس اعرف مراح يكدر يواجه المجتمع ويتغلب عليهم.. الا نكسر العادات ونصير لبعض..
وبهلحاله لازم اتبره من امي واهلي ويتبرون مني.. ويمكن يرجعون يهدرون دمي..
-سمر اذا اطلقتي بعد شعليهم..
-ما ترهم نونه .. صعب اتزوج اخو طليقي.. منو يتقبلها.. لهيج خايفه من حبه.
-والله يا سمر انتي جبانه..
-باوعتلها.. وكتلها مو بيدي اخاف.. بس لو اطلقت لا خلاص لو اعرف اهد الدنيا ما اكدر اعوفه بعد..
-تتزوجيه..
-طبعا.. يجي يخطبني من اهلي.. وكدام الناس لو النلس رفضت تجمعنه ذاك الوقت.. اكسر بالناس وبالعادات واخذه واتزوجه..
وتالي اهلي يقبلون ..مثل متقبلو بيت جدي بزواج امي.. وخاصه بكر مسؤل عن بيت اهله ويتلوكوله..
متأكده يعارضون اول بدايه ،، وبعدين يستسلمون.. دنحجي ورج موبايل نونه..
-وج. ميزو ديخابر اشوون..
-شلت راسي. امي وابويه نايمين.. كتلها على كيفج كومي.. كمنه على كييييف مثل الحراميه..
وطلعنه من البيت رحنه للحديقه الخارجيه الوره البيت.. الجو جان حيل حلو الشهر الخامس..
كعدت نونه تخابر مازن واني خابرت لبكر.. سده بوجعي ورجع خابرني لان يعرف حديقه وما عندي فلوس خخخخ
بكر.. الوو
سمر.. هلا بكر
-هلا سمسم شو تأخرتي..
-مو تانيناهم ينامون وناخابر..
-منو اللي نخابر.. قصدج نجوى
-اي تخابر حبيبها..
-يحبها متأكده منه لو هيج..
-لا ناوي يتقدملها بس تأجلت للعطله..
-هاا علخير انشالله.. اكوول شنو سالفة التانكي والسحر
-والله يا بكر سالفه تحير العقل.. ما اعرف شلون اصدك حتى اخليك تصدك للان مصدومه..
-شنو القصه سولفيلي..
-عندي خاله تقره الجبين.. وتشوف اشياء وتكول هذا نور.. سولفتلي شغلات وانطتني مواصفات وكفت عقلي..
-شسولفتلج
-كالت اكو بنيه عدها شامه بخدها.. وبينج وبينها رجال ومسويتلج سحر. وهيه عاميه عادل عني
-اش اش اش سمر لا تحجي ما حاب اسمع.
-ليش.. ؟؟
-لان بكل بساطه ما امن بهلشغلات التافها.. وعادل عمره ما حبج.. جان يحب حنين..
-بس تكول هيه حنين مسويتله سحر
-هاي شبيج .. مثقفه ودارسه تأمنين بهشغلات التافها..
-والله يا بكر ثا اعرف علعموم مخسرانين شي.. اطلع الكالولي علي.. واسوي الوصوني بيه..
الفادني خير على خير والمافادني عادي..
-شوكت ترجعون..
-باجر الصب…. دا احجي و لمحت احمد من بعيد.. قطعت الاتصال بسرعه وخليت الموبايل جوه رجلي..
وندست نجوى حيل.. هم خلت موبايلها جوه رجلها بساع.. احمد دار وجها للجهه الثانيه وما باوعلنه .
كتلها كومي خل ندخل لا ننكتل.. كمنه على كيف.. لبدنه وره الشجره نسمعه..
يكول حياتي شبيج بس لا تزعلين.. والله جنت نايم وما شفت الاتصال.. باوعت لنجوى وهزيت ايدي..
خلينه يبتعد شوي..
وتراكضنه للبيت.. كتلها شفتي الشفيه.. كالت اي سمعته..
كتلها خل انام باجر ورانه طريق.. ومن نرجع امي تتولانه بشغل الفلبينيات... ونكعد نجلف بدون رحمه..
ضحكت.. كالت يله.. رحت للفراش.. اوووف هم هيج واطلق واتزوج بكر واعيش مرتاحه..
بس عود ياربي ترهم.. اتذكرت اركان.. وشلون يعامل زوجته.. وهيه الله ما يجرعها.. يشيل الطرشي الكباله
ويحطه الها لان تتنسه.. خرب حظي اي والله. هسه اني لا حظيت بركان ولا ابكر.. رحت لعادل..
شجابني عليه.. شخلاني اوافق.. يربي والله غبيه اني شلون اضل بهلغباء..
انشالله اتزوج بكر واعيش سعيده وياه.. وانسى كل هتفكير بوجوده.. بس وعائلته. اني هم نسيت نضال..
خطيه شلون اخذ بكر وهيه حامل.. يعني وحتى لو حامل.. حتى لو عايفه بكر جان هوه سافر..
اقبل بيه وعود اني احننه على ابنه.. كافي تفكير سمر نامي.. اي انام احسن 😴😴😴
كعدنه ويه صلاة الفجر كوه افتح عيني مشبعانه نوم.. صلينه وطلعنه للبيت.. وصلنه متكسرين..
كالت امي.. يوووي البيت كله تراب. كتلها يمممممنه فدوتج العراق من الشمال للجنوب اجلح املح كله تراب..
تعبانين مابينه حيل انضف بس انام فدوه😢.. ابتسمت.. وكالت عابت بجيتي بوجه بساع.. روحن نامن..
ب12 اكعدجن هاا.. كتلها ماشي.. تراكضنا اني ونجوى.. اخذت كيمونه وبجامه منها لبست وكبل انبطحت بالكاع ونمت..
ما كعدت الا على صوت امي.. كالت يله كومن كافي نوم الساعه 3..فتحت عيني.. كوه الضوه بيها..
شفتها كاعده كبالي.. ضحكت.. ارتميت بحظنها وبست خدها.. كتلها خره بالعيال لا ابو الرجال.. والله ماما شوفتج هيج كل يوم تسوه الدنيا..
ضحكت.. كالت الله يخليج بنيتي.. بس كومي اريد احجي وياج.. كتلها كمت.. كالت بدلي الكيمونه لا يجي احمد ويشوفج هيج يتسودن..
كتلها غير بغرفتنه يا امي.. كالت هسه عوفينه.. راح اخابر عمتج ساميه ..
-اوو لا هله ولا مرحبا بوجه الفكر..
-عيب استحي.. ميصير تحجين هيج..
-يمه شايفه اشوفتني من ايام سوده. بس الله يعلم بيها..
-هسه عوفينه من هسوالف يا يمه.. اريد اخابرها على موضوع السحر..
-يوم هسه تبليني بيه اني وتكول هيه مخليته وتفرها عليه..
-لااا اكعدها كبال ابوج هيه تخجل تنطي بينه كدامه.. واسولف وياها على كل الكالوه النه..
وعمتج تأمن بهيج سوالف.. وتحبهن ودوم تحجي بيهن.. بس الامانه لله ما تتعامل بيه..
-بكيفج يوم.. طلعت الموبايل من جيبها.. دورت اسمها وخابرت.. الو ها ام بكر اشلون خيه.. وسولفت وياها..
وسدته.. كتلها هاا.. كالت كومن بساع راح تجي هسه.. خل نمسح البيت.. كتلها يله.
طلعت فانيله طويله لبستها ونزلت.. اني خليت سطل ومسحت البيت.. ونونه راحت للمطبخ..
وامي خبطت كيكه وخلتها بالفرن.. انوب ركضت سبحت وخليت مكياج يخبل ☺ علمود ابينلها تره من فاركت وجهج الوصخ كل الخير لفاني 😝
عطرت ونزلت.. وكعدت يم بابا افرجله رجليه.. دكت عمتي الباب.. فتحتها امي.. ودخلت لابوي تسلم وتبوس راسه.
باوعتلي وتكلي ها ولج سميره جنج فرحانه بزعلتج.. كتلها مو زعل عمه مو زعل خلاص بعد طلاق فد مره.
همستلي.. تحلمين اخليج تطلكين من عادل وتنفردين بالثاني.. وكعدت.. كالتله شلونك فرحان خريت والله مشتاقتلك..
بقيت اباوعلها.. اي مو هوه بكيفج.. عفتها وطلعت.. صاحت امي.. خلن الكيك لعمتج وجيبن ببسي..
كالتلا لا والله ما اشتهي.. مسدوده نفسي.. كالتلها هسه تشوفيه ويعجبج وتاكلين.. حطيت الكيك بماعون وكلاص وقوطية ببسي..
خليتها كبالها وبدي اشيله واركعه بوجها.. بس سويت نفسي عود محترمه مؤدبه ☺
خليته كدامها وشفطت 3 كصات كيك عود ما اشتهي خرب بهبل اليلعب طنب شكد يهمبل..
كعدت اني وسولفتلها علسحر وشلون كاللنه السيد بالتاني ووره الكنتور وحتى طفلها الوكع والشرده الشردتها سمر من وره السحر..
.. وزودت عليها امي بهارات..وكالتلها يمكن حتى من وراها خربت بين رنا ورجلها وهيج ما منسعده من وره حنين..
عمتي حمت وكامت تسب وتغلط على حنين. كالت راح اروح هسه واشوف اذا صدك.. اشحتها لبيت الخلفها بنعال.
راحت عمتي.. وكالت اخابركم.. بقينه كاعدين يم بابا ناكل كيك ونشرب ببسي.. انوب كلت خل اشوف بكر اذا بالبيت..
اشوف عمتي شسوت.. صعذت فوك رمشت لبكر خابر.. كتله انته وين.. كال اني بالمحل.. كتله تكدر تروح للبيت..
كال شكو.. كتله هيج كلنه لعمتي علسحر ودلينها المكان الكاالولنه بيه الساده.. روح شوف صدك اكو وره الكنتور..
-سمر ما تبطلبن من سوالفج..
-بكررر فدوه فدوه لخاطري..
-اي دين لعد راح اروح ومن اوصل للبيت لشوف واخابرج..
-لااااا.. خليك ويايه تسولف ومن توصل البيت.. خلي هيتفون بالجهاز وخليه باذنك وسمعتي شيحجون. وانته اوكف وياهم..
- هههههه شهلفضول
-سوي الاكولك عليه بليييييز
-يابه شلون اموت ؏ خبالج.. ادللي هسه اروح..
-عفيه.. بقينه نسولف اني وياه. لحد ما وصل للبيت..
وصل للبيت..كال راح اضم الجهاز.. وكأنو مدا اتصل.. كتله ٱפگـيہ.. دخل..
عمتي تحجي ام السحوره هاجمه بيتي.. بنت ال* **** صاحت الله جابك بكر ذاك الدثو صاف ويه مريته..
كاللها شكو يمه.. كالت تعال ادفع وياي الكنتور .. ولك اروح للتانكي والكه بيه سحوره مرضتنه هجمت بيت بنت الكلاب بنت ال*******
حنين تبجي وتكلها عمه والله مو اني. وعادل يصيح سمر الساقطه تشمر سحورتها وتجين تشمريها براس هلمسكينه.. طبعا بت اخوج..
كالتله انجب يل مابيك خير.. اهمممداك يلدثو.. سمر صح سوالفها مكسره بس اعرفها ما تعرف بالسحوره وهشغلات..
بت اخوي مثقفه ودارسه مثل مرتك الملفيها من الشوارع الخايسه.. روح شوف بيت اهلها اكعد هدومنه تصير بيضه من الوصخ.
ملتهيات بالسحوره هيه وامها وضالات يبوكن رجوله امهات الرجوله ... اني اسمع وخربانه ضحك وفاتحه سبيكر وانونه يمي تضحك..
دخلت امي.. كالت هاا. كتلها اششش تعاي اسمعي.. كالت ليش تخابرين بكر.. كتلها دسمعي هسه..
صاح بيها بكر.. يمه تره ما الي خلك لهسوالف التعبانه.. تعاي خل اجر الكنتور وعوفينه من ذول..
راح بكر وعمتي بس تصيح وترزل.. جرت الكنتور واني بس الچكچكه مال الهيتفون اسمع..
لحد نا صرخت عمتي.. يماااااااااي ولكم تارسه البيت سحوره.. وراحت هدت على حنين تكتلها وتطردها بره..
وبكر يصيخ ورنا وعادل. ويبووو هوسه.. واحنه نسمع ونضحك وامي تهز بيدها.. وتكول ادري غابه ..
كتلها اي لعد شعبالج شفت المر عدهم والله.. كالت دسدي سدي لعبان نفس همزين خلصتي منهم..
وبالج تفكرين ابكر.. تطلكين.. وادورين شغل وشوكت ما تجي قسمتج تمشين.. كل علاقه اسمع بيج مسويه اذبحج..
-هسه بس خل اطلك وافتك.. غير اركص هجع والله..
-دعوفن. هسوالف. وكومن سون عشا..
-ماشي.. مر اسبوع واني بقمة الراحه.. احمد ما يباوع بوجهي. ويرزل مرات وما اهتمله..
بس اني علمود اكسب رضاه وارتاح.. اغسل اهدومه واعطرهن انضف غرفته.. احظر عشاه..
كولشي يريد مأمنته اله.. وشكد ميرزل اكوله تمون حبيبي انته اخويه الجبير.. يبقى يرزل ريروح..
شسوي مثل ميكولون لو حاجتك يم چلب كوله حجي چلوب .. ما عتدي حل للراحه غير اكسب احمد..
لان ابويه مريض.. خابرت باجي اشواق واتفقت وياها علطلاق وكالت راح ارفعلج دعوه.. واخلي محاميتي تقوم بيها..
شكرتها.. اجت هيه ونسرين للبيت يشوفوني مرتين.. نسبيا حياتي ارتاحت..
حاجيت باجي لشواق على شغل بلكت ادورلي. كالت اكتها مديرة ثانويه راح احجيلج وياها بلكت تتوسطلج وتعينج بالمدرسه مدرّسه..
كتلها علواااا اكونلج ممنونه..
فد مره الساعه 12 الضهر اندكت الباب. ماما جانت بالحمام طلعت اني. اكو رجال.
كال اني مبلغ من محكمة الكرج كتله تفضل.. كال تفضلي هذي ورقه طلاق سمر فرحان..
صفنت بوجها.. كال موجوده هيه.. خل توقعلي.. كتله اني.. كال هااا وقعيلي خويه خل اروح .
وقعتله.. واخذت الورقه.. عادل مطلكني اصلا قبل لا ارفع الدعوه.. معقوله .جريت الموبايل من جيبي..
وخابرت بكر..
-الووو
-بكر احزر شنو بيدي
-شنو ؟؟
-بكر ورقة طلاكي من عادل بيدي
-ش شن شنو لا لا لحظه .. شنو كلتي..
-هههه اني اطلكت بكر
-هههه ههههههههههه ههههه ياااااا رب . شلون وشوكت صار هيج..
-ما اعرف هسه اندكت الباب وانطوني الورقه يربي والله فرحان تكول سجن وانطوني افراج
-علخير سمسومه يارب اشوفين السعاده وكل خير..
-ما اريدها ويه غيرك..
-ههههه ولا اني..
-يمكن اني اسعد وحده بطلاقها.. شفت ماما طلعت. غلقت الجهاز وباوعتلها..
-منو دك الباب..
-مبلغ انطاني ورقة طلاقي..
-اخذت الورقه وضحكت.. وكالت انشالله تلكين الاحسن منه.. بس شنو لا غايب ولا ابد.. هيج حاف..
-ماما بس خيفكني واني ارتاح لا اريد فلوس ولا ابد..
ساعه ودخلت نونه من الدوام.. تلكيتها اركض واحظنها واكولها اطلكت اطلكت اطلكت هله هله.
-لا بربج صدوووك .. ايييييي واخيرا…
-لج تعاي نركص اني نذرت اركص هجع بس اطلك
-هههههههههههههه
-جيبينه سجينه ههههههه رحت للمطبخ جبت سجاجين وكمت ادك لوحدي واركص ..الوجن الوجن يما يا يا يمه ويهواي الووووج اني هههههههههه
-ربي يديم الضحكه سموره فرحانه بضحكتج والله .
-حظنتها وكلت الحمدلله.. مر اليوم وسوينه كيك وعصير واحتفلنه اني واختي ونخابر مازن ونضحك..
ثاني يوم.. وكفت سياره حمل بالباب. اندكت.. طلعت امي. اثاري بكر ماخذ غرفتي القديمه الاشتراها الي..
وكل ملابسي وغراضي.. فرحت بيهم.. فرغنه غرفة نونه وطلعنه السرير ابو النفر والكنتور الصغير
ونضفنه الغرفه ودزينه على نجار نصبلنه الغرفه. وكمنه انام بيها اني ونومه كولش مريحه وتخبل صارت ..
احس فعلا جنت مسحوره وارتاحيت.. وره ايام.. خابرت باجي اشواق وكالت حاجيت اختي عليج وكالت خل تجي محتاجه مدرسة انكليزي..
فرحت حيييل بالخبر.. رحت راجعت وقدمت اوراقي.. كالو الاحد الجاي تعاي داومي..
حجيت ويه احمد وكتله هيج وهيج.. كال بشرط نص الراتب الي.. كتله اي عادي هوه اني اشتغلت علمود اعينك..
اخذ نص الراتب فدوه الك.. سكت. ما حجه.. رحت لامي.. كتلها يوم اريد اروح للسوك اشتري ملابس..
خو ما اداوم بملابسي القديمه.. مدرسة انكليزي وهلله هلله وملابسي محلوه
-يمه ما تشوفين حالتنه بالكوه يا سوك.. دبري حالج بيهن وعراتب الاول عود اشتري..
-كتلها يوم هسه اني صار شهر كاعده عنا ما طلبت منكة الربع. عاد بس 100 اروح اشتري حجابات احذيه.
شنو احذيتي قديمه والله. حتى مكياج محتاجه كومه..
-شسويلج قابل عدي وما انطيج .. سمر يمه اقنعي بالعندج ولا تتبطرين..
-يووم شتبطر لخاطر الله .. مو حتى روحي لعبت.. صار شهر هنا كاعده تكول بنكلاديشيه اشتغل ليل نهار وربع نستله ما ادزولي عود ليش..
-اكوم منج انتي هواي تلغين..
-كامت.. نزلت دموعي.. شبيه حظي عود هم مول البنات البس واتنهى اووف ربي.. اجت نونه..
-سمر لتضوجين والله احنه نتلابس وملابسي جديده شتردين اخذي قابل بيناتنا فرق احنه..
هزبت راسي واني ابجي.. اتصل بكر رفعته.. كال الوو..
-الوووات يا سمسم.. شلونج..
-زينه
-لا والله مو زينه شبيج.. صوتج ما يعجب.
-رحت راجعت علتعيين الكالتلي عليه باجي اشواق..
-اي وشنو ما قبلوج..
-لا مو ما قبلوني قبلوني بس
- بس شنو..
- حجيت بكلبي اذا اكله متاجه فلوس راح يكولي اني اوديلج.. عيب ما اريد منه..
كتله لاا بس تعرف احمد. شرط نص الراتب اله وبقى يحجي ويغلط وكلام زايد كلعاده..
-ومن هاي ضايجه.. سمر تردين فلوس اوديلج ما عندي مانع شكد ياخذ منج احمد اني انطيجياهن بس لتضوجين..
-لااا عادي والله خل ياخذ الراتب 600 اله 300 والي 300 كولش كافي عليه..
بس لان انطيه ومو بعينه لهيج متضايقه..
بكر.. سهله لتضوجبن نفسج ؏ كولشي خليج قويه..
-انشالله اصير قويه يله اروح باي
-سمرر
-هاا
-اقسم بلله مو هذا المضوجج .. انتي مو ماديه ومتهمج الفلوس احجيلي شنو مضوجج
-عود ليش بس انته تفتهمني وتحس بيه. . بجيت
-سبق وكتلج انتي بنيتي . حبج صار بكلبي 8 اسنين اكو ام ما تعرف ابنها شيحس..
-كتله اي امي..
-اغااار
-شنوو
-اغار تكولين امي.. اني امج اني ابوج اني اخوج اني سندج شتريدين اكونلج.. ما اقبل غيري يصير بحياتج نبر وان
-ههههههههههه يول فديت امي و ابويه واخويه وسندي وكل حياتي..
-وفديت الضحكه اني.. هسه ارتاحيت من سمعتها
-هههههه بكر انته كولشي حلو بحياتي.. اليوم اللي ما تكون بيه ما احسبه من حياتي..
شسويت فيني يا اخي شغلت لي بالي. وعقلي وكلبي.. مرات احس روحي ثوله من كد ما اصفن بيك واشتاق لملامحك..
-هانت وربج هانت.. انشالله فد كم شهر اخطب واعلن ابحرب اما ان افوز بك حبيبتاً او اموت بحبك قتيلا..
-هههههه اسم الله عليك من القتل .. اموت لو صار بيك شي والله.. اجن..
- الله يخليج اليه.. يله راح اروح للبيت من اوصل اخابرج.. المهم ضحكتي..
-فديت كلبك.. باي.. سديته من عنده واني اتصل.. باوعت لنونه متمدده يمي.. وهيه تباوعلي..
- بمكالمه وحده حول دموع ضحكات مرسومه علغمازات..
-ضحكت.. كتلها عجيب هلبكر..
-هذا مو بكر هذا سحر.. ساحر بحيث قادر بلحظه يحول دموعج ضحك..
-الله يكتبه من نصيبي.. دا احجي.. اجتها رساله.. هيه كتلها شكو.. كالت لا ماكو شي مازن راح اروح اخابره.
كتلها وليش بره لا احد يسمعج.. كال ما اطول.. عجيب شنو اشتشرفت روما..
الليل كله تحجي ويه مازن براسي.. هسه خجلت.. عفتها ونزلت.. وبقيت اباوع مسلسلات..
لليل الساعه 1 نعست ردت انام طفيت الضوه مال الغرفه.. خابر بكر.. كال سمر اني جوه..
كتله شنووو..
-نزلي
-صفرت من الخوف لا انوب احمد موجود.. كمزت من مكاني اهرول..
رحت لغرفة احمد.. لكيته نطفي ونايم.. نزلت لاهلي فتحت الباب ماما وبابا نايمين..
ضحكت.. واخيرا راح اشوفه يارب والله مشتاقتله..
فتحت الابواب.. ورحت اركض.. اريد اشوفه.. فحت الباب الخارجي.. كاعد بسيارته مبتسم..
ومشغل اغنية الف حاء باء كاف احلى كلمه بالشفاف احبك خل يدرون ما دام احبك ما اخاف..
ضحكت واني واكفه بالباب.. اشرلي للكاع.. لكيت ضرف وعليه طابوكه.. شلت الطابوكه اخذت ابضرف..
لكيته بيه 500$ .. خليت ايدي على حلكي وفتحت عيوني حيل واضحك واباوعله هههه… يتبع
🌺🌺🌺🌺🌺
گولولها گلبي السبع
يرجف رجف يم طولها ♥️✨
هههههه يمكن هذا اكثر بارت مريح بقصة سمر.. واعتقد حليت الشد النفسي العدكم من وره القصه..
شتتوقعون.. اكو امل لزواج بكر وسمر لو لا..
صراع بين الحب والعادات فـ من المنتصر يا ترى 😉
شاركوني توقعاتكم وارائكم.. متابعه ممتعه ..
#زينب_ماجد
