حكاية سمر

البارت الثاني والعشرين

#حكاية_سمر..
،،،،،،،،،،بقلم الكاتبه زينب ماجد،،،،،،،،،،،
البارت_ 22
سمر.. دا اروح للمطبخ اودي غراض.. جان تلزمني عمتي.. وتكلي.. عرفت شنو بينج وبين بكر وسمعت كلشي..
بسيطه يا سمر.. خل تخلص سالفة عين بكر.. واني اتصرف وياج.. بقيت جامده واني اسمعها.. شسمعت..؟؟
بس لا تصنت على كلامنه اني وبكر بالغرفه.. يربي شلون مصيبه.. وديت الغراض ورجعت.. كعدت علكرسي..
كال بكر.. سمسم هاي انتي.. كتله ها بكر.. كال مسكن اي شي عيني حركتني والله.. كتله قبل شوي اخذت فاليوم..
شلون انطيك هسه.. كال ما اعرف.. متت.. شلتله مسكن الم عند الحاجه وانطيته.. بقى يضرب بأيده علسرير من الالم..
اتقربت يمه.. ولزمت ايده.. والعب بشعره.. كتله بكر.. كال هاااا.. بألم.. كتله عمتي عرفت شنو بينه..
كمز.. خله ايده على عينه وباوعلي بالثانيه. كال شنو عرفت.. كتله سمعت البارحه كلامنه.. وعرفت بمشاعرنه..
اخذ ايدي.. كال لتشيلين هم.. والله بس اطيب من عيني.. اخصم هلموضوع. كتله شنسوي.. كال خليها لما يجي وقتها.. نشوف شنو يسوي..
لا نسبق الاحداث.. الله بليله ويوم يقلب الموازين.. ارتاحي وثقي بلله ميخيب الظن بيه.. كتله امنت بلله..
كتله زين الفيزه شلون.. خاف متطلع خلال هلايام.. وتصعب علينه المانيا.. كال لاتخافين.. ابراهيم نسابته هناك مقيمين..
وراح يساعدونه.. بلكت تطلع فيزتنه بهليومين.. كتله انشالله.. ضحك.. كتله شبيك.. كال من كد ما خرعتيني عيني خافت وهدت هههه..
ضحكت.. كتله هاي عينك هم الا بالخوف يله تجي هههه .. مددته ونام.. بقينه نسولف اليل كله.. لحد ما تعب ونام..
مرت 3 ايام.. طلعت الفيزا.. اجه ابارهيم كال حظري ملابس بكر وملابسج.. ومستمسكاتنه.. باجر الصبح طالعين..
كتله انشالله.. حظرت وكملت الجنطه.. وثاني يوم طلعنه.. وطلعت من ظيم رنا وعمتي وحنين.. شكد حجن وشكد غلطن ويسمعني كلام مثل السم..
عليه وعلى امي.. واسكت لعيون بكر.. لان مريض.. وصلنه المطار.. بعد اجراءات.. انطلقت الطياره..
واني كاعده..يم الشباك.. وبكر يمي.. خفت حيل لما قلعت الطياره.. بقيت لازمه ايد بكر بخوف..
لحد ما حسيتها هدت وييي نزلت بعالم ثاني واني اباوع الغيوم والمنظر الرهيب.. باوعت بكر.. مخلي راسه ونايم..
اني ما نمت ابد بالطياره من الخوف.. كل ضني شوي وتعطل الطياره ونموت.. بس الحمدلله وصلنه مطار برلين بسلام..
رحنه لاقارب ابراهيم.. ناس جدا راقين ومحترمين.. بس شقتهم كانت صغيره.. بكر ما قبل يضايقهم..
رحنه حجزنه فندق.. غرفه ب3 اسره.. صراحه شعوري جان ما اعرف ما اكول خايفه وانما خجل..
انو وجودي مع 2 شباب محرمين عليه.. جان الامر مخوفني.. واني بنت.. بس جنت اشوف الطمأنينه بعيون بكر..
فقتلت شعور الخوف.. وبقيت مأمنه روحي بيه.. وهوه ما خان ثقتي.. شكد ما جان يحبني.. بس يعاملني كأخ..
عمري ما شفت منه نظره اليه مو زينه او يباوع بجسمي او هيج.. ابدااا محترم حد العلاقه بيناتنه مشاعر بقلبي وبقلبه فقط..
متخرج.. حتى بكلمة حبيبي او مغازله.. وجنت احترم هلشي منه واعشقه لاحترامه .. رحنه للدكتور..
وقدمنه تقارير بكر.. عاين بكر..
(الكلام اللي بللغه العربيه.. يعني كلام انكلش)
قال يحتاج الخضوع لعمليه.. قلت ..هل في امل باسترجاع نظره يادكتور.. كال ولمَ لا.. الامل خطوه جيدہ نحو النجاح.. لمَ هكذا متشائمه..
قلت لا انا غير متشائمه.. لكنني قلقه جدا حيال ذلك.. قال هل انتي زوجته.. قلت. لا انا ابنة عمته.. كال اه ضننتك زوجته لشدة قلقك..
ابتسمت.. بكر دار وجه.. كال شجاي يلغي وياج.. كتله يسألني على علاقتك بيه.. كال وشكلتيله.. كتله اني بنت عمتك.. يكول اعتقدتج زوجته..
كال من حلكه لباب السما ضحكت.. حددلنه الدكتور موعد العمليه.. ورجعنه.. لحد ما اجه يوم العمليه..
جنت حيل خايف.. دخل بكر للعمليات.. واني وابراهيم كاعدين بره.. اني خوف والدموع متجمعه بعيني وادعي..
باوعلي ابراهيم.. كال شكد تحبيه.. كتله منو.. كال ما حاج تخفين.. عيونكم واهتمامكم ابعض.. واضح ميحتاجله تفسير..
كتله ابراهيم ما اعرف شنو اكولك بس الصار والديصير ثق مو بيدي ولا بيد بكر.. مشاعرنه مدا نكدر نتحكم بيها..
كال بالعكس اتمنالكم الخير.. لان تلوكون لبعض.. كتله اشكرك.. لزم ايدي.. وكال لتخافين يطيب والله.. كتله انشالله..
ساعه وطلعو بكر.. جان كاعد.. كتله تحس بشي.. كال ما احس بشي بعيني.. اجه الدكتور للغرفه انطاها العلاج ..
شوي شوي كام يروح المخدر من بكر..كام يضرب بأيده.. ويصيح من الوجع.. لزمت ايده واني ابجي.. واكله اتحمل يروحي..
كال ولج عيني احسها احتركت اريد احكها موتتني. كتله ميصير والله بس اصبر.. بقيت لازمته وهوه يلوب..
لحد ما سكن ونام.. تعليمات الدكتور مينزل راسه للكاع يبقه نايم.. ولو كام يرفع راسه.. ما اعرف السبب بس جنت اعاني منها..
بكر ما يكعد ابمكانه من كد المه.. يضلي يروح منا ويجي منا.. مرت 5 ايام.. صار المه اقل..
اخذناه اني وابراهيم ينزه عن نفسه لان تعب كولش من اوجاعه وحتى صار ما يتحمل الكلمه حتى عليه كام يغلط ويرزل ..
نفسيته تعبت من كد الالم.. رحنه اخذنا نزهه بحدائق عامه.. جان الجو بارد كوووولش بالمانيا.. بس اكو شمس قليله..
كعدت اني وياه.. بالحديقه.. كتله انشالله هنا مرتاح.. كال اي بس شوي برد.. كتله نرجع..
كال لا خليني هنا مرتاح احسن من جو المستشفى والغرف.. كتله يروحي.. انشالله هلالم كله يصير سوالف..
ونكعد بعد 50 سنه واطفالنه نجيبهم هنا ويلعبون واحنه معجزين ونباوع عليهم هههههه.. كال اوووف شوكت.. كتله بعد 50 سنه شبيك..
كال والله بيج دفره.. ضحكت.. كال انشالله الله يحقق امنياتنه ووعد لو صار هلشي واتزوجنه..
اجي واجيبج لهلمكان اللي يشهد حبنه.. كتله يارب يحققها.. ادردش وياه علمود ينسى عينه..
كال سمر هواي افكر وتأنيب ضميري يكتلني لان افكر بحبج وشلون اني اعشقج.. احس اللي دا اسويه غلط لان مرت اخويه..
ومرات ارجع اكول هيه مو مرته.. الزواج البينهم غلط وابقى بحرب نفسي بين كلبي وصوت ضميري..
سمر ..ههههه انشالله اللهم امين.. يله برد الجو خل نرجع.. كمنه رحنه للفندق.. وبعد ايام فتحو عينه..
وجانت العمليه ناجحه الحمدلله.. كتبولنه الدوه ووصونه يسمر عليه ومشينه.. كملنه اجراءتنه ورجعنه..
بالمطار.. امشي واباوعله.. كتله بكر تشوف بعينك.. كال اي قليل بس مو مثل قبل..
كتله المهم رجعت يربي والله فرحانه واني اشوف عيونك مفتحه.. ضحك وكال يحفظج الي.. صعدنه الطياره.. وكلبي طاير بعيونه..
.. وبكر نام.. اوووف شكد ارتاح واني اباوعله.. احس اني بأمان.. بقيت صافنه بوجهه وهوه نايم..
وين جان.. وليش ما حبيته من زمان.. ليش هيج صعب عليه.. اووف شصار لو هوه الخطبني مو عادل..
وصلنه مطار بغداد.. خابرنه اهله وكنالهم وصلنه.. اخذنه تكسي وللاسكان.. وصلنه البيت.. ابوه جان محظر عزف وموسيقى..
وخروف ذبحوه جوه رجله والفرع كله التم يركص علموسيقى والطبل وبكر مبتسم وفرحان بينهم..
دخلت للبيت.. سلمت سلامهن ثكيل.. بس عمتي وبنات عمي وامي .. دخل بكر للبيت وكبت الهلاهل والجكليت فوك راسه..
ويكلله يوم عرسك انشالله .. وهوه فرحان ويباوعلي ويكلهم انشالله هيج واتزوج الا اذبح ثور ههههههه..
كالتله امه جنك على زواج انته بس كول اصفط النسوان كدامك.. كاللها استريحي انتي ونسوانج..
اني رايد البالي.. ضاجت وبقت تراقب عيونه وعيوني.. اني ما كمت اباوع لبكر ضايقتني بمراقبتها..
رحت لغرفتي بدلت ونمت.. اجت امي.. كعدت كتلها هااا يوم.. كالت شو نايمه.. كتلها صوت الطياره براسي..
ومنايمه ابد من البارحه.. كالت يمه عمتج تعرف بسالفة بكر.. كتلها يا سالفه.. كالت تفهميني شنو اقصد..
اخذت نفس.. وكتلها ما ادري هيه تكول سامعتنه.. كالت شنو يعني سامعتكم سمر.. شنو بينج وبين بكر..
انتي ما تجوزين ما تخافين.. كل الصار ما اخذتي عبره منه.. بعدج مستعده تغلطين وتندكين .. كتلها والله يمه ما اعرف..
اسوي الصح واعيش بذل لو اسوي الغلط واعيش براحه ما اعرف.. كالت يعني شنو قصدج تسوين الغلط وترتاحين..
على شنو ناويه سمر.. كتلها ناويه اطلك من عادل.. لان حرام ابقى بذمته واني مشاعري بغير مكان..
حتى لو عادل ممتقربلي وممحسسني اني زوجته.. بس خيانه اعتبرها مشاعري لغيره وضميري ممرتاح بهشكل..
كالت سمر استري علينه وعلى نفسج لا تظنين بيوم ابوج لو اخوج يوافقون على زواجج من اللي ابالج..
شنكول يمه اطلكت لان تحب اخو زوجها و تريد تتزوجه.. كتلها يوم عادل مو زوجي.. كالت هذا الحجي احجي للناس مو اليه سمررر..
خافي الله بينه واستري على روحج يمه.. كتلها لعد شلون يوووم.. قابل انهزم مثل مسويتي يله ارتاح..
ضربتني راشدي حيل.. كالت هذا الحجي لو عدتي مره ثانيه اكص السانج والله.. اني من شردت من اهلي.. شردت ويه الغريب..
واهلي كالو انطيناها اتزوجت ابغداد وسترو السالفه.. لو انهزمتي انتي شنكول يمه..
شردت ويه اخو رجلها.. غير ابوج يطك ويموت.. هوه من سوالفج شكل وياه ضغط ويوميه واكع..
تسوين هيج يموت والله.. كتلها يوم ابوي مفكر بيه فد يوم ما فكر بمشاعري.. يعني انتو من حبيتو حلال واني حرام..
كالت ولج يا حلال يا حررم يمه هذا اخو رجلج انتي ناويه تصخمين وجوهنه ولج سمر عقلي يمه وانسي..
لو اطلكتي يجبروج تتزوجين اي واحد والله وما يخلوج تحجين.. وحتى لو انهزمتي مفكره ابوج ما يوصلج..
والله لو ترحين لاخر العالم هم يجيبج.. سمر اعقلي وسدي السالفه.. هزيت راسي.. كتلها يوم هسه اني اريد انام..
خليت راسي علمخده طلعت هيه.. اوووف رجعت لهنا لا هله ولا مرحبا.. شكد جنت مرتاحه واني بعيده عنهم.. اووف يارب رحمتك وعفوك..
نمت ساعه وكعدت.. طلعت لكيت بكر.. كتله لا تنسى علاجك تره اذا خربطت عينك ترجع..
كال والله ناسيه.. كتله لا تكلي اخر قطره اللي خليتلكياها بلطياره.. كال اي والله.. كتله تحجي صدوك بكرررر..
رحت ركض طلعت الدوه ومشيتله .. كاعد يم اهله يحجي وياهم وابويه وامي كاعدين وعماتي واثنين من عمامي..
واهله.. كتله يله بكر.. واني اهز بالقطره.. كال تعاي.. وكفت كتله هاي صدك تحجي.. جنك عمود كهرباء دكعد خلي احطلك..
مشى للقنفه كعد ورفع راسه.. فتحت عينه وخليتله.. كتله مو تنسه بكر تره مو زين والله..
كال وقتيلي الموبايل وكلما يدك رمشيلي وذكريني تره والله ما اتذكر.. كتله بعيني ادلل.. يحجي واني لازمه وجهه ورافعته..
وهوه مغمض علمود العلاج مينزل.. وانفخ على عيونه.. وخرت ايدي وكتله يله افتح عينك..
فتح وهوه يرمش.. درت عمتي وامي وابوي يباوعون شلون اخليله.. امي تخزر بصفحه وعمتي تزفر بصفحه..
حجت مرت عمي.. كالت شلون اداريه تكول امه مو مرت اخوه.. بربج سمر شكد تعزين بكر.. كتلها ماكو وصف..
كلت هيج لو حسيت عيون امي راح تنط وعمتي كامت.. كال عمو خليل هوه لو ما بكر هسه هيه هيج حالها..
لو تفرش عيونها متجازيه.. ياما عادل شبع كتل من وره بكر علمود سمر.. ابتسمت.. الحمدلله عادل مو هنا جان تضايق..
مر اسبوع جنت واكفه بالمطبخ اسوي اكل.. اجت عمتي كالت عود عبالج ناسيه موضوع.. تبتعدين عن بكر لو استخدم غير اسلوب والله اخليهم يذبحوج..
كتلها عمه ماكو شي وربج.. كالت نجبي اصدكج لو اصدك اذاني اسمعج تكليه اخذك بعيد لغير عالم بس سمر وبكر وحبنه.. يلماتستحين
بقيت صافنه.. كالت اصبري بس اصبري وشوفي شسوي وراحت.. صفنت هاي شلون مصيبه يربي
مشيت.. جان يطب عادل وحنين من بره وعادل ضايج وطالعه روحه.. كالت عمتي هاا.. كالتلها حنين شكلتلكم الصوج مو مني تسموني العاجر.. عادل عنده ضعف..
هوه اجه ضربها بقوه يكلها بعد صيحي بعد.. كولي عادل ما بيه خير وما يخلف.. بقيت صافنه..
درت وجهي على رنا.. كتلها شكو. كالت امي مو تحجي على رنا لان صار سنه ونص وما حبلت..
تكلها اني مابيه شي الصوج من ابنج.. واخذت عادل وسوتله تحليل.. كتلها وطلع عادل ميخلف.. كالت ما ادري.. التحليل هيج يكول..
بقت بيومها الاجواء متوتره بالبيت بسبب عادل واللي صار.. اني تانيت لليل.. خابرت بكر..
كال هلا بـ سمسمايه .. اني بالبيت تره تعاي لغرفتي ليش تخابرين.. كتله اسمعني بكر.. عمتي اجت وهددتني ابتعد منك وتكول تعرف بسالفه..
كال اوف من امي اووف اليوم فاتحتني بموضوع زواجي وتكلي اريد ازوجك.. كتلها ما اريد استريحي..
كالت البالك لا تحلم تصير.. كتلها لعد اخذي راحتج واطمني كل عمري ما تتزوج اذا هيج..
كتله بكر لازم ناخذ قرار ونحسم هلامر ما نكدر نستمر اكثر بهلوضع.. كال سمر اني متاني الكلمه منج اخذج واروح..
كتله وين تاخذني.. كال لعد شلون.. كتله بكر نتزوج هنا وبنص اهلنه ..كال اكيف بس سمر منو راح يقبل بطلاكج وبزواجنه..
اني خايف عليج مو عليه.. كتله بكر لنصير انانيين.. عندي اهل لو شردت وياك شيكولون للناس..
ابويه عنده ضغط لو عزيت وجهه وشردت وياك يموت.. ما اكدر اجيبلهم العار حتى لو اذوني الله مستحيل يوفقنه ويباوعلنه واهلنه غاضبين علينه..
وبعدين اهلك بكر.. تكدر تعوف اهلك وتمشي وياي.. اهلك كل اعتمادهم عليك ابوك مريض وعادل ما يعين نفسه غركان بالعرك..
كولي تكدر تتركهم وننهزم.. سكت.. كتله اعرفك متكدر.. يخابروك يكسرون خاطرك.. تاخذني ونرجع..
ويذبحوني والله.. كال لو صرتي مرتي بعد منو يمسج.. كتله بكر حتى لو مرتك ما اكدر اجازف واهرب وياك واني على ذمة عادل..
صعب.. كال سمر مراح يقبلون بينه والله.. كتله اول بس اطلك منكلهم على علاقتنه.. تمر وقت كفايه ونبلغهم..
كال سمر بعد متطلكين واخطبج لو ما قبلو اخذج وانهزم لتلوميني.. كتله لاااا اذا اطلقت ومقبلو بعلاقتنه بكل الطرق..
نضطر نهرب كم سنه وبعدها نخليهم امام الامر الواقع اما هسه ما اكدر انهزم وياك واني مرت عادل..
اطلع بعيونهم عاهره والله.. كال هاهيه هسه بس اطلقي.. والله كريم.. كتله راح ننجمع بكر مـℳOــو..
كال تأكدي فد يوم الله راح يجمعنه لا تخافين.. كتله يله مع السلامه.. كال ترافقج السلامه سمسم..
سديته وطلعت برا اخذت نفس.. شفت عادل كاعد يشرب اركيله ..اتقربت منه.. كتله يصير نكعد يمك..
شفته مخلي الشرب كدامه.. كال كعدي. كتله شربت لو بعدك.. كال لا اكمل اركيله واشرب..
كتله عادل بطل منهن والله راح يدمرنك.. كال عساني هسه عاد اني شلوني..
كتله عادل اريد احجي وياك بموضوع ..كال تفضلي..
كتله عادل اريد اطلق منك… يتبع
🌺🌺🌺🌺🌺
وانطقت اخيرا 😃😃😃 شاركوني ارائكم وتوقعاتكم.. متابعه ممتعه..
#زينب_ماجد