#حكاية_سمر..
،،،،،،،،،،بقلم الكاتبه زينب ماجد،،،،،،،،،،،
البارت_10
سمر.. كتله منو تعرفه اللي اتزوج حبيبتك..
ضحك وكال هههه اخوي.. بقيت مصدومه منو اخوه.. ما احس الا الباب نفتحت. قفلت الخط..
دخل عادل.. كال سمر.. اني مو يمه.. صاح احجي وياج.. لج هيييي شلت راسي.. هاا كال شبيج مثل الثوله.. صار ساعه احجي..
كتله شنو.. كال اريد عشا بساع.. كتله اي.. كمت من يمه.. وكفت بالمطبخ واني افكر بكلام بكر..
كمت اجمع مواقفه.. واتذكر لما جنت اشوفه يباوعلي ويه اركان.. ولما جان يغار عليه من عادل لما جنه ممخطوبين ويعصب..
ومن تزوجت وشلون ما حظر العرس وشلون حماني منهم كلهم حتى ابويه.. معقوله بكر يقصدني..
لا مستحيييل ما اعتقد بكر فد يوم يحب هه ويحبني اني.. بس هوه كال اتزوجت اخوي.. وهوه عنده بس عادل وخالد..
اوووف من شوكت هيج وليش ما انتبهت.. اشتغل واني بدوامة تفكيري.. انداريت ما احس الا انضربت بشخص..
من صدك كمزت وراحت روحي ووكعت سلة الخيار مني وخليت ايدي على كلبي.. واني اباوع لبكر.. كال شبيج..
بقيت صافنه عليه.. ونفسي احسه اختنك.. انوب نزلت راسي.. وكتله ماكو شي ولميت الخيار..
كال سمر.. لتشغلين بالك بشي.. انسي كولشي.. رفعتله عيني كتله شنسى.. كال اللي سمعتيه..
كتله بكر من شوكت هذا الحجي.. كال يا حجي.. كتله اللي اتحبها وتقصدها ..اني صح..
نزل راسه وهز اي.. كتله من شوكت.. كال من جنتي صف اول متوسط.. حبيتج.. كال اني جنت هم زغير..
بس انتي حب مراهقتي وبقيت محتفظ بهلحب لحد كبري.. وما كدرت فد يوم اعبر عنه..
كتله بكر مو متحمله اللي تكوله.. كال وداعتج بس هذا.. ولتخافين والله مطالب شي بس سعادتج.. مستعد اضل طول عمري هيج ما عندي اي اشكال..
كتله اني مرت اخوك بكر.. كال انتي مو هيج.. ولا راح تصيرين هيج.. كتله ليش راح تخرب صورتي وتحاول ما انسعد ويه عادل..
كال لو اعرف عادل يسعدج.. جان سعيت باصلاحكم والله بس انتي مو اباله.. كتله ابعد مني واني ادخل باله..
كال ولا راح ادخلين سمر افهميني.. عادل يحب غيرج وناوي يتزوج.. وكفت صفنت بوجها..
انوب ابتسمت.. كتله يتزوج وهوه يبيع موبايلي حتى يشتري الشرب مالته.. اسكت بكر لخاطر الله عادل ميملك الربع.. ههه يروح يتزوج..
كال الفلوس متوكف بعينه وراح ياخذها مني 10 ملايين.. درتله بعصبيه وليش تساعده يتزوج عليه..
كال والله مساعدته.. بس جان لازم اسوي هيج والا راد ينطيج لابوج ويتبره منج.. وتنذبحين..
وكفت كباله.. كتله يعني اشتريت ستري من عادل.. نزل راسه.. كتله هلكد اني رخيصه..
كال لا طبعا انتي اشوف من عادل بنفسه.. انوب لزمني من اديه وكال ليش تهتمين لهل امور.. انسي ومستعد اعوضج باللي تردين ..
وخرت اديه وكتله اللي اريده ما اشوفك كدامي ولا اريد المحك.. كال اخاف عليج يأذوج..
كتله هذا مو شغلك.. افتهمت.. خليت الاكل بالصينيه ومشيت.. دخلت العادل لكيته يشرب.. خليت الاكل..
وانداريت للسرير نمت.. وغطيت راسي.. واني افكر بكلام بكر.. مو معقول ابد مو معقول..
واني اللي جنت حاسبته اخ وضلع.. طلع عينه نكسه.. ويحميني حتى اصير اله.. بقى الكلام يروح ويجي ابالي..
ومكدرت انام ابد.. شلت راسي.. لكيت عادل غافي بمكانه ومماكل.. كمت شلت الاكل ضميته ونضفت الميز..
وغطيت عادل واباوعله.. معقوله باعني لبكر ب10 مليون.. معقوله يريد يتزوج عليه.. نزلت دموعي بهدوء..
بقيت كاعده وصافنه على عادل وهوه نايم.. لحد مصار الصبح واني منايمه..
مثل كل يوم. كمت تنضيف وشغل وتعب وخطار. ووووو وحياة متخلص.. بكر ما شفته طول اليوم..
واجه وما انتبهتله ولا جنه موجود.. بقيت اتهرب منه كل يوم.. واحاول ما اقصر بشغلي واسمع الحجي واطلعه..
مر شهر واحنه على نفس الحاله ..اهلي اصلا محاولو يتصلون بيه ولا حتى امي.. كلهم زعلانين عليه..
وبكر من ذيج الليله ما حجيت وياه حرف.. وهوه مستمر بحمايتي شحده اليوكف بعيني..
بس مو مستحمله حتى دفاعه ما اعرف ليش.. لحد ما مره جنت جاي اغسل مواعين.. سمعت عمو خليل صاح رناوي بابا فد ستكان جاي..
كالتله تأمر حبيبي.. واجت يمي.. لزمتني من ثوبي بتعجرف وكالت سوي جاي.. كتلها المواعين بيدي متشوفيني ..
كالت تسوين وكلمه زايده ما اريد مفهوم.. ما رديت.. وما سويت.. لشوي صاح عمو خليل رنا وين الجاي..
اجتني تركض كالت مو كتلج سوي الجاي.. كتلها ومتسويه انتي مو كتلج جاي اغسل مواعين..
ضربتني راشدي ولزمتني من شعري وتغلط عليه وتسبني.. شبيج رنا دوخررررري احاول اوخرها من شعري وهيه تغلط بنت الجايفه
وامج هيج وامج هيج.. دفعتها حيل ووكعتها بالكاع وكتلها امي اشرف منج ومن امثالج.. خل اشوفج تجيبين سيرتها والله اموتج..
كالت تسوين هيج.. عافتني وركض تبجي العادل.. كالها شكو كالتله سمر ملختني وسبتني وتغلط على امي..
اني وكفت علسنك رجعت اغسل وما احس عادل الا جرني من شعري للكاع.. ضربني.. كتله هاي شبيك والله ما حاجيتها شي.. .
جرني سحل من شعري للطرمه ودفرات بجسمي ويفشر ويغلط واني بس ابجي وادافع عن نفسي.. ومخليه اديه على راسي
دفرني دفره نومني للكاع. انوب داس بكل قوته على ساعد ايدي.. حسيت روحي طلعت من الالم..
كمت اصرخ بلا وعي.. وصوتي صدوك على بالصياح.. اجه ابوه هم كام يضرب وامه تغلط.. والله شفت الموت بين اديهم وهمه يتناوبون على قتلي..
لحد ما اجه بكر.. وصرخ بيهم.. كلاااب سكط.. وشالني ودفعني وره ضهره.. وكام يغلط ويسب ويرزل حتى امه وابوه..
انوب اجاه عادل يتضارب وياه ويكله معليك انته بسمر لو اموتها ما تدخل مرتي.. بكر مثل الحجه رادها وانهد على عادل بوكسيات ودفرات
على عينه على وجها.. اني فقدت من الالم بس ابجي واصرخ.. واهله يحاولون يشيلون بكر من فوك عادل ماكو..
نهى لحد ما تخربط.. امه فقدت كالتله تموت اخوك علمود هاي الساقطه.. كاللها ماكو غيركم سكط ونعلللل..
جر ايدي ومشا بس متت من جرها كمت اصرخ بالزايد.. دار وجها.. كال ايدج تأذيج.. اني يا مأذيتني روحي فرفحت من الالم..
جر عبايه امه علدرج وكال امشي.. لزمته امه.. كالتله عادل ما يصحى كوم شوفه خاف مات كاللها عساه ووخر امه..
واخذني وصعدني بالسياره.. اني مو واعيه على شي من الالم.. شلون اخذني شلون وصلت للمستشفى كولشي ما شفت من شدة الالم..
دخلوني.. كالوله عدها كسر بالساعد.. لازم نكبسها فورا. اووف كبسولياا لو حسيت روحي طلعت.
وبكر لازم وجهي ويكولي هانت سمر اتحملي شوي بس شوي. واني اضرب برجلي من الم..
كملت.. اخذني ومشاني للسياره.. احس تخدرت.. كعدت.. اتحرك.. بعد ما حسيت علدنيا نمت.. ليوييين كعدت..
لكيته مطفي السياره وغافي ..اباوع ايدي شاديها بركبتي.. وبيها الم يكتل.. مديت ايدي على رجله..
فز.. كال هاا شلون صرتي.. كتله ليش مبقينه هنا.. رجعنه للبيت.. كال شفتج نمتي وما ردت اصحيج خفت تكعدين..
كلت من تكعد اوديها للبيت.. كتله رجعني.. كال ماشي.. مشينا للبيت.. وصلت.. كال راح ادخلج غرفتي.. واني انام بصاله..
دخلني لغرفته.. كال لتشغلين المكيف.. ترى موزين عليج ..البرد يكوم يصل علعظم.. هزيتله اي..
جاب العلاج والمسكن الم.. كال اشربي علمود تنامين ومتحسين بشي..
اخذت العلاج ونمت.. كعدت العصر.. على صوت بكر وهوه يطلع ملابس من الكنتور..
كتله وين عادل.. كال بجهنم انشالله شتردين منه.. كتله شلونه.. كال مثل الحصان ذاك جاي ياكل..
كمت من عنده.. كال سمر لا اطلعين.. ككتله اشكرك بكر جد ما قصرت.. وحميتني ووكفتلي وكفه الاخ ميوكفها..
كال سمر.. ارجعي.. ابتسمت وطلعت.. رحت للغرفه.. دخلت شفت وجه عادل خفت.. مسوي خرايط..
وجه صاير بنفسجي من كد الضرب.. اتقربت يمه.. كال ما اريد اشوف وجهج ولي مني..
كتله انطيني ذنبي شنو وتعاملني هيج.. كال ما اريدج كوه هيه كوه ما احبج.. وخري مني لا تخليني اكسر ايدج الثانيه والله..
ابتعدت منه ورحت للسرير.. سمعت عمتي تتصايخ ويه بكر.. تكله اريد فلوس اتسوك.. كاللها ماكو ومن اليوم ورايح ..
فلس احمر ما الكم يمي.. كالتله شلوون نموت من الجوع.. كاللها ويضربكم وجع.. شلي اني بيكم.. كالتله امك اني خاف الله بكر..
كالللها من تناوبتو البارحه على هلمسكينه ما خفتي الله.. مو بنت اخوج هاي.. بساع نسيتي الدم البينكم.. شسوت..
كالتله وعلمود سمر انته غاضب علينه.. ما حجه وياها وراح.. اني نايمه علسرير واستمعلهم والغرفه صنطه..
بس عادل يلعب بتليفونه.. دخلت عمتي على عادل ما تدري اني هنا بالغرفه..لان نايمه والدوشك سبرنك ومتغطيه غايصه جوه ممبينه..
طبت و كالت الله لا ينطيها انشالله فرت راسه علينه..
الله يفرها كون.. كاللها عادل شكو.. كالتله اريد فلوس كاللها واني منيلي.. متشوفيني كاعد.. ربع ما عندي..
كالتله شلون بله بس مسميكم عليه ولد.. ولكم البيت فارغ اريد مسواك تحجون صدك..
كاللها يمه والله ماعندي شسوي.. قابل لكيت تعيين وما تعينت.. كالت شدعي عليج سمر عساج بسرطان انشالله..
كالها يمه لا تصيحين على راسي تردين سمر ذيييج نايمه وروحي احجي وياها لا ادوخيني..
اجت عليه اني سويت نفسي نايمه.. شالت الغطا وضربتني على ايدي المكسوره.. وكالت كومي يلمسعده كومي..
صحت من الالم اخخخ وكمزت ..كتلها ها عمه.. كالت من عمه العماج وموت الفاج واخلص. منج..
نايمه وهاجمه البيت فوك راسي.. كتلها شسويت.. كالت لاا ممسويه بس لاعبه بعقل هلاغبر عليه.
كتلها والله لا حاجيه ويه احد ولا متقربه يم احد.. عمه الله يخليج خلصيني بس الم ايدي كافي عليه..
كالت كومي بنت الجايفه كومي.. ترحين بساع على هذا النذل ابني.. تقنعيه ينطيني فلوس اتسوك..
كتلها واني شلون اقنعه.. ومنو اني وياخذ مني بكر ويقتنع.. كالت لا تتمسكنين..
امج الباكت فرحان وشردت بيه لبغداد لو غيرها.. بتها نفس الطينه.. كتلها.. عمه شنو هلحجي قابل شعندي ويه بكر اني..
حرام عليج هلكلام.. صاح عادل بدون لغوه روحي اطلبي من بكر مسواك وبلا ما تراددين لا اسحلج ومحمد..
كمت وبكلبي اكله من شالك محمد انشالله.. رجال بلا غيره يبيع مرته علمود الفلوس..
رحت لغرفة بكر دكيت الباب.. فتحها بكر.. وطب.. دخلت الغرفته.. كاعد يشتغل علكومبيوتر ..
كتله بكر مسواك ما عدنه ياريت تنطي لعمتي تتسوك..
شال راسه.. وباوعلي بجمود.. وانتي شكو.. مو ايدج مكسوره.. كتله اي مكسوره خو ما ناكل.. الثلاجه فارغه..
رجع يكتب علكيبورد ويحجي.. كال هاي سوالف امي مووو.. كتله بكر الله يخليك تعبت والله ما بعد بيه حيل..
فكو عني.. ضرب علكيبورد.. وكال سمر شبيج.. معليج بيهم.. كتلج نامي ولتهتميلهم..
كتله شنام.. لخاطر الله.. عمتي وعادل محمليني ذنبك.. كال اي ذنب.. كتله يصيحون من وراج ما ينطي مصرف..
الكرسي مالته دوار.. دار الي بسرعه وباوعلي.. كال مالج شغل بيهم.. واليأذيج بس انطيني اسمه..
كتله بكر لا انطيك ولا تنطيني.. فدوه العينك خلصني واتسوك.. هز راسه وكال انشالله.. بس ارتاحي..
كمت.. كال وين خليج كاعده.. كتله راسي طبل اريد اروح اتمدد.. كال اخذي علاجج مو تنسين.. كتله ماشي وطلعت..
لاكيت عمتي.. كالت هااا.. كتلها يكول هسه راح اتسوك.. ومشيت.. صاحت.. شووف بيدها تكلبه وبيدها ترجعه..
ولدي وصارو خرك بيد بت رجاء.. دخلت للغرفه.. عادل كال هاا.. كتلها شهااا.. كال هسه اتسوك..
ضحك ودار وجها.. كتله انته مو هامك امري.. حرك حاجبه وكال بالمره.. كتله ليش.. كال ما احبج وما اريدج ياريت تفتهمين هلشي..
وكتله عشنو مبقيني هنا.. كال شعليه اني اتفقت ويه بكر لو سترت عليج وما انطيتج لابوج يذبحج ينطيني 10 ملايين اتزوج بيهن حنين..
كتله بسس.. كال اي.. كتله ما اريد تسترني ولا اريد ابقى عندك.. كال عساج انشالله شنو ميت عليج..
درتله وجهي بيئس.. ورجعت طلعت جنطه لميت ملابسي بيها وكتله اريد اروح لاهلي.. كال عساج لا ترجعين شسويلج..
كتله كوم وديني.. كال يله امشي.. دنطلع.. طلع بكر كال ها وين.. كتله اذا رجلي ميريدني شعندي هنا..
اروح لاهلي احسنلي.. دار وجها العادل.. كاله اني شتفقت وياك.. كاله شسويلها اجلب برجليها ما تريد تبقى.. ختروح
كاله عوفها اني اوديها.. كاله خفتا وراحه.. عافنه ومشا.. كال سمر شبيج كولي يا الله وارجعي..
كتله بكر وديني لخاطر الله.. كال سمر يأذوج.. كتله ليش اني هنا ممتأذيه.. متشوف حالتي شلونها.. وجهي مورم..
ايدي مكسوره رجلي تأذيني.. يعني شيسون بيه اكثر.. كال والله يزيدوها عليج.. ابقي اتحملي والله ما اخلي احد يمسج..
جان تطلع امه تكله ودها ودها.. خلنخلص عسا درب السد لا رد انشالله.. كتله بكر امشي فدوه..
طلعنه جان تصيح وراه بكر.. لا تنسا تتسوك للعشا تره ما عدنه شي ..ما رد عليها وطلع ركب السياره ومشى..
دار وجهه عليه.. كال ليش تتخبلين والله ميرحموج.. كتله بكر يضربوني ويأذوني يوم يومين وتالي يسكتون..
اني ما غلطت ولا جرمت.. اذا جرمت بشي فجرمت بحق نفسي مو بحق احد.. كال مراح يفتهمون هذا الكلام سمر..
وصلنه للبيت.. كال ماكو منج امل.. باوعتله كتله بكر تعبت.. كال اعرف بس والله ازمه وتعدي..
اني اعرف شلون اخليهم يلزمون حدودهم وياج.. كتله مشكور ومتقصر.. اصلا خجلانه منك بكد ما سببتلك اذيه من وراي..
كال يا اذيه سمر تحجين صدك.. جان مخلي ايده علكير مال السياره.. خليت ايدي فوك ايده وطبطبت عليها..
كتله هيه روح وحده.. اذا يردوها خل ياخذوها.. وابتسمت بوجها.. جاي انزل لزم ايدي كال خابريني كل شوي طمنيني
لا تخليني بالنار.. ابتسمت وكتله انشالله.. نزلت وسديت الباب هوه تحرك ومشى.. رحت دكيت باب الكراج مالتنه..
طلعت ماما.. من شافتني كالت شعندج جايه.. نزلت دموعي بس شفتها.. عافتني وطبت جوه..
دخلت وراها.. فاتت مني اختي نجوى صرخت فرح وكمزت حظنتني حظنتها حيل جن صار سنين مشايفتها..
انوب اجو اخواني الصغار هم حظنوني ويبوسون بيه.. كلت النجوى بابا وين.. كالت بعد بالشغل.. كتلها خفر.. كالت ما اعرف..
كتلها واحمد.. كالت طلع قبل شوي.. باوعت الدنيا مغرب والاذان يأذن.. واني ابيت اهلي.. هيج شعور مريح.. تصاحبه الابتسامه..
دخلت لماما للمطبخ.. لكيت عيونها حمر وتمسح بيهن.. كتلها ماما.. كالت اششش لا انه امج ولا اعرفج..
كتلها شسويت.. والله مسويت شي.. ودموعي نزلت.. كالت اسس كلبه كل هلعمايل وتكولين ممسويه شي..
صخمتي وجوهنا الله لا ينطيج.. كتلها مو ذنبي يوم ذنبج انتي.. دارت وجها بعصبيه وكالت الج عين اتهميني..
كتلها اي يوم انتي اي.. كله منج انتي اللي خليتيني امشي بهلطريق.. بقساوتج ويايه.. كل ما اجيج اسئلج كلتيلي عيب..
كلما سويت شي وكلتيلي عيب عيب عيب.. هاي العيب مالتج هيه الدمرتني.. انتي اللي خليتيني اسئل غيرج ليش عيب..
انتي اللي تركتي الناس واصدقاء السوء همه اليعلموني.. ما لزمتيني مره وحذرتيني العب بجسمي..
ما كلتيلي فد يوم ماما سمر.. اكو اماكن بجسمج مو ممكن تتقربيلها.. ما علمتيني هلشي ممكن يخسرني حياتي..
كلما جنت احجي وضربتيني وكلتيلي عيب عيب عيب.. ولا مره كلتيلي حرام.. ولا مره فكرتي تزرعين خوف الله بداخلي..
كل همج جان خوف الناس والعيب.. ماما الناس ما موجوده بخلواتنا.. يعني العيب ممكن نسويه بخلوتنه لو جنه جاهليه شنو..
بس الله الله موجود بكل مكان.. فقط لو كايلتلي حراااام.. الله ميقبل تسويين هيج الله ميقبل تكولين هيج ..وتشرحيلي عن عقابه بنار جهنم..
جان خفت واني طفله.. جان خفت اغلط اخاف الله يعاقبني بالنار.. جان خليت الله بين عيوني بكل مكان حتى بيني وبين نفسي..
بس انتي جان هامج الناس مو الله.. واني دفعت ثمن اغلاطج يوم.. اني دفعت وغالي والله غالي الثمن.. كعدت على ركبي ابجي ومخليه اديه على وجهي..
اتقربت مني امي.. وتبجي وياي واخذتني الحظنها.. كالت يمه والله قساوتي عليكم جان قصدي احميكم.. يمه انتو اعز من روحي..
والله ييمه الليل منايمته من وراج ويوميه افكر شصار بيج وشسوو بيج.. وادعي الله ورسوله يوكفون وياج..
خليت راسي بحظنها وابجي واكولها ماما تعبت منهم ما اريد ارجع والله تعبت.. بقت تبوس براسي وتشم بيه وتبجي وتكلي شبيدي عليج يمه
كاعده بحظنها اما احس اجتني دفره على ضهري وكعتني للكاع ..باوعت شفته بابا..
بقيت ازحف ليوره من الخوف.. لابس ملابسه العسكريه ..جر اسلاحه وسدده عليه وكال هاي النكسه الا اغسل عاري بدمها..يتبع
🌺🌺🌺🌺🌺
اووف منين تلكاها.. تروح هناك عيشه مره.. تجي لاهلها امر وامر.. اووف اني اكتب واشبع قهر على يوم انجلط من قصصي😢
شاركوني توقعاتكم.. متابعه شيقه..
#زينب_ماجد
