شاليه 17
الفصل السابع
"كانت داليا بتعدى الشارع و لما شافت ماجد بيحذرها رجعت بسرعة لورا ل درجة انها وقعت على الأرض,و بعدها قامت و ماجد بيسندها عشان تلاقى الناس ملمومة حوالين العربية اللى كانت هتخبطها,راحت تشوف اللى حصل,لقت شاب صغير شوية,باين من لبسه المرمطة,انه شغال فى ورشة مثلا,بس لمة الناس و الدم اللى كان على وشه منعها من انها تشوف شكله,مشيت هى و ماجد فى طريقهم"
-انتى كويسة؟
-اه يا عم دى المرة المليون تسألنى!
-اصلك مش كنتى شايفة المسافة بينك و بين العربية قد ايه,لو مكنتيش اتحركتى سنتى لورا كان زمانك.. يلا الحمد لله
-الحمد لله
-خد الورق اهو
-طب استنى نقعد فى اى كافيه اعزمك على حاجة
-بيتهيألى كده انك متأخر,بص فى ساعتك
-اوبااااااا,9 و تلت
بس مينفعش بردو....
-لا ينفع,خليها مرة تانية,ساعة لما يقبلونى فى الفندق ابقى اعزمنى
-ههههههههه ماشى , ورينى الورق كده
-اهو,كل الورق موجود مفيش حاجة ناقصة
-اوك تمام,هقدمه و ارد عليكى على طول بالتليفون,مش عايزة حاجة ؟
-لأ شكرا
-بقولك ايه , انتى قلتيلى انك هتحكيلى على العيلة و حجات كتير عشان الشغل و السفر و كده
-بعدين بعدين,دى مواضيع طويلة قوى و محتاجة وقت
المرة الجاية
-ماشى,يلا عشان الحق الطيارة,سلام
-سلام
"رحل ماجد و هو فى حالة من الحيرة من غموض داليا و تغيرها عن ايام الجامعة,برغم ان ظروفها لم تختلف كثيرا بموت اهلها فهى فى الحالتين كانت وحيدة,و فى حالة اخرى من الفضول على ما هو متأكد انها تخفيه..."
"و رحلت داليا ايضا,فى الطريق جاءها اتصال على التليفون"
-الو ؟
-"صوت وش"
-الوووو ؟
-دا..دااا..دالياااااااا
انا بموت ..
-انتى مين ؟
مروة!!!
ارجوكى قوليلى جملة مفيدة انا مش عارفة اعمل حاجة,انتى فين طيب ؟
-مش قا..قادرة اتكلللللم
-طب,انا هتصرف خليكى عندك
فى حد معاكى ؟
"الخط قطع"
