شاليه 17
الفصل السادس
-مروة !!! انتى بتتكلمى منين و فى ايه ؟!! ؟
-انا فى.......
"صوت مزيكا هادية"
"قطع الخط"
"مروة,زميلة داليا فى الجامعة و كانت معاها فى دروس ثانوية عامة,مروة من النوع اللى تبقى من صحابك بس مش قريبة قوى,تحب تتكلم معاها عادى بس مش تقتحم حياتك او مش تبقى best friend
كما يقولون,كانت مروة معتدلة الجمال,طويلة,ذات شخصية ودودة,كانت مخطوبة ل "امير" فى كلية الشرطة اثناء ما كانت هى لسه بتدرس فى كلية الصيدلة,بعد التخرج على طول اتجوزت,عايشة فى حياة عادية و مستقرة مع وجود الخلافات المعتادة بينها و بينه,و كانت شخصيتها من الستات اللى بتحب تستغل كل الفرص زى العروض اللى بتبقى على مسحوق الغسيل و اشترى اتنين تاخد التالت هدية..."
"بعد الجواز مبقتش فاضية لمتابعة اصحابها بتوع الجامعة,كل فترة زيارة ليها فى البيت عشان يسلموا عليها و يستعيدوا ايام المذاكرة و الأمتحانات,لحد ما اتفاجئت داليا بمكالمتها دى اللى بتستغيث فيها..."
"مكانتش داليا عارفة تعمل ايه,تتصرف ازاى و تلحقها ازاى و هى مش عارفة اصلا هى بتتكلم منين و ايه اللى حصلها,لحد ما جالها اتصال تانى كانت نسياه و رايح عن بالها خالص..."
-ايه يا داليا ينفع كده ؟!!
-........
-انتى فين كل ده ؟
- .........
-الووو ؟ داليا ؟
-ا ايوة
-انتى كويسة ؟
-مين معايا ؟
-مين معايا ؟ انا ماجد يا بنتى !!!
-ماجد ؟ اااااه اه
انا اسفة يا ماجد معلش الدنيا ملخبطة معايا شوية, خير ؟
-خير ايه , مش كلمتينى ليه عشان اقدم ال سى فى بتاعك للفندق ؟
-اااااااااااااخ,نسيت خالص الموضوع ده !
خلاص لو الشغلانة اتاخدت مفيش مشكلة ...
-لا لا , بصى انا مسافر بكرة هاتيه و انا هوصله
-مسافر ؟
وهتوديه ازاى و انت مسافر ؟
-ههههههه يعنى ايه ازاى ؟!
مسافر الشغل !
-ليه هو الفندق فين ؟
-الفندق فى شرم الشيخ!!
-شرم الشيخ !!!!!!
و انا اللى فكراه هنا ؟!
-انتى لما قلتيلى انك عارفه الأسم قلت يبقى عارفة مكانه!
