شاليه 17
الفصل العاشر
"لازم اعمل حاجة مهمة الأول"
"كانت اخر جملة قالتها داليا بعد ما وافقت على الشغل فى شرم ,مشيت من المكان و بسرعة روحت البيت,جابت البوم الصور القديم المعتاد فى كل بيت , المدرسة و الجامعة و الصحاب,قلبت فيه لحد ما لقت صورة مروة و ماجد وشمس و داليا كانت معاهم فى الصورة,شمس دى كانت اعز صديقة ل مروة,حتى بعد ما مروة اتجوزت كانت دايما تخرج و تزور شمس,صحاب و جيران من ايام الأعدادية,..."
"افتكرت داليا انها كانت كاتبة على ضهر كل صورة الوقت و الأشخاص اللى فى الصورة و التاريخ و اى معلومات عن اللى فى الصورة,عناوينهم او ارقام تليفوناتهم لأنهم دايما كانوا بيتصورا فى اخر كل سنة,ف كانت تحب تحتفظ ب ارقامهم عشان يفضلوا على اتصال حتى بعد الدراسة..."
"قلبت داليا الصورة لقت عليها: "داليا و مروة و شمس و ماجد,اخر يوم امتحانات,27\6,الساعة 2 الظهر,كلية صيدلة"
"مشيت ب عينيها على الكلام لحد ما لقت
مروة,19 شارع العقاد,حى الورد
شمس,23 شارع العقاد,حى الورد
"لقت داليا اللى كانت بتدور عليه,بس اللى كانت ناوية تعمله مفكرتش فيه,هتعمله و خلاص و اللى يحصل يحصل!"
"لأن داليا شخصية فضولية,قررت انها تروح زيارة مش على البال,عدى عليها شهور عشان تنبش فى حاجة مش فهماها و لازم تفهمها ..."
"بعد نص ساعة"
"فى الشارع"
داليا:تاكسى !
-اؤمرى ا ابلة
-حى الورد الله يخليك !
-انناشر كنيييه
-انناشر ! ليه ان شاء الله !
-هو كده ا ابلة مش عاجبك انزلى فى الولعة اللى احنا فيها دى و اتحمصى بقى لحد ما تلاقى تاكسى تانى
و هيقولك انناشر بردك !
انتوا عارفين البنزين بكام !
-حسبى الله و نعم الوكيل !
اطلع !
"استحملت داليا غتاتة السواق و استغلاليته المعروفة فى معظم السواقين,و استحملت رغيه المتواصل ب انها تقول "اه" "ربنا يهدى" "ان شاء الله" على اى حاجة عشان تهرب من الرغى و شكوته المستمرة من الطريق و السواقين اللى معندهمش ضمير , ما شاء الله عليه يعنى !
و شتايمه الخارجة لكل سواقين الميكروباص اللى بيشوطوا عشرة فى سكتهم عشان بيلعبوا
Need for speed
العتبة version !
او بيتخانقوا على زبون,او بيفكوا لبعض فلوس,او بيسلفوا بعض سجارة !
