حكاية قمر

الجزء العاشر

#بقلم الفتلاويه

#البارت العاشر

خطيه هو كيف اجه باسني ع راسي وگلي الله يحفظ شبابج يا بويه وشفت عيونه دمعت وفرح گلي شتردون اني حاظر
قمر .. اطلب منك طلب اريدك بس تدعي لبابا يگوم بالسلامه
الحجي .. الله يشافي ويگومه بالسلامه ويكثر من امثالج يا بويه واني سيد ابن رسول الله
#قمر .. اجوي خوالي واقربائنه وبات يم بابا ابن خالوا بقيت يم بابا للمغرب وخابرت السايق عدنه سايق بابا حاطه النه لان يخاف علينه لان بنات وما يقبل نطلع وحدنه ويه سواق غربه لهذا من تصير عدنه طلعه نخابر السايق ابو جعفر
خابرته واجاني وصلت للبيت لگيت ماما صاعد سكرها ويمها خالاتي
منين الگاها من بابا لو من ماما
طمنتها ع بابا خطيه نايمه ما تكدر تكوم وگتلها مابي شي بس لان
سكره مرتفع ما طلعوا  ..
#ياسر .. خابرني سيف وگلي عمك ابو قمر مسوي حادث وبالمستشفى
غلقت الموبايل واخذت اجازه واجيت
وصلت للمستشفى سلمت عليه وبوسته  وگعدت يمه اسولف وتعذرت منه مره ثانيه ع الي صار
#ابو قمر .. بويه ياسر والله احبك واعزك وشايف بيك الرجال الي اتمناك لبنتي بس مثل ما شايف قمر رافضتك واني ما اكدر اجبرها
ياسر .. عمي خلينه من هذا الكلام هسه خلي للزمن انت مريض وما اريد اتعبك
قمر .. صار الصبح وامي خطيه بعدها مريضه گلتلي خلي اروح لابوج گتلها وين ترحين وانتي بالگوه توگفين تردين انوب هم تدخلين مستشفى ابقى واني مناك اخابرج واسمعي صوته ما قبلت ضليت اقنع بيها ما قبلت اله طلعت روحي
قمر .. ماما انطيني حلقتج البسها
ام قمر .. ليش يمه
قمر .. تدرين بالمستشفى الي يشوفوها وحدها لو ما مزوجه يتحارشون بيها انطنياها خلي البسها حتى محد يسمعني كلام
صدگ اخذت الحلقه لبستها وسويت ريوگ لبابا واخذته ورحت للمستشفى اول ما دخلت للردهه شفت ياسر
قمر .. صباح الخير
ياسر وبابا .. صباح النور
قمر .. اليوم شلونك بابا
ابو قمر .. بخير بويه شلون امج خو ما صار بيها شي ادري بيها هسه سكرها ارتفع
قمر .. اي صعد بس هي بخير رادت تجي واني ما خليتها
#ياسر .. هلمره ما گدرت اتباوع القمر ولا اتكلم وياها لان خجلان من الي سوو عمامي  وتعبت بعد ليش اذل روحي
قمر .. بقيت يم بابا للمغرب
ابو قمر .. ياله بويه خابري ابو جعفر خلي يجي ياخذج واليوم ياسر يبات يمي
قمر .. اوك راح اخابره واسويلكم عشه وادزه بيد ابو جعفر
ياسر .. انتظري لا تخابري اني اوصلج شنو بهذا الليل ورجال غريب يوصلج
قمر .. مو غريب من زمان هو ويانه ويوصلنه لاي مكان وبأي وقت
ابو قمر .. بويه قمر خلي ياسر يوصلج
ياسر .. لو بيدي اضربها ع كلامها تريد تطلع ويه رجال غريب والمغرب
قمر .. مشيت ويه ياسر ركبنه سيارته وهم فتح اغنية ( شگول عليك ) بس بدون ما يتكلم هو ساكت واني ساكته
وصلني للبيت ورجع للمستشفى
قمر .. مرت الايام واليوم الرابع لبابا بالمستشفى هم رحتله واخذتله الريوگ اله ولياسر شفت الدكتور المسؤول عن حالته وگلي باجر يطلع
فرحت وصرت اوزع ابتسامات دا اضحك واشوف ياسر اجاني
ياسر .. اشبيج توزعين ابتسامات
قمر .. الدكتور گلي بابا باجر يطلع
ياسر .. امشي ادخلي يم ابوج مو واگفه هنا للرايح والجاي
قمر .. اوك
مرت الساعات ومن ردت ارجع للبيت ياسر وصلني
وشغل اغنية ( شگول عليك )
قمر .. والله سگمتني بهاي الاغنيه
ياسر .. لو ذكيه جان فهمتي ليش اشغلها كل ما تگعدين بسيارتي
قمر .. ما فهمت
ياسر .. اول ما سمعت هاي الاغنيه اجتي صورتج ابالي وجان عمرج ١٥ سنه ومن لحظتها گلبي دگ الج  وكل ما اشتاقلج اسمع هاي الاغنيه
قمر ... سكتت من گلي ع الاغنيه
ياسر .. ليش لابسه حلقه
قمر .. حتى محد يتحارش بيه بالمستشفى
ياسر ... ههههههاي
قمر .. ليش تضحك
ياسر .. يعني لو لبستي حلقه محد يتحارش بيج
قمر .. اي
ياسر .. مو اگلج فاهيه ليش همه يفرقون بين المزوجه والما مزوجه عادي يتحارشون بالاثنين
قمر ..  شفت ياسر متغير ومو مثل قبل لا يأذيني بكلام ولا يتباوعلي حتى من يتكلم وياي ما يتباوعلي وكلامه قليل وياي فرحت گلت خلصت منه 😍
طلع بابا من المستشفى
ومرت الاسابيع واني ما سمعت شي عن ياسر ولا شفته بس سمعت من ملك  انو هو خطب
وبيومها جنت رايحه ويه ملك للطبيبه لان خافت ع الطفل جان مهدد بالاسقاط وبشرتنه الدكتوره الطفل بخير شگد فرحنه
رحت ويه ملك لعيالها وبشرنه باجي ام سيف
شويه وجان اشوف ياسر دخل علينه الظاهر جان نايم
ياسر .. اجيت لبيت عمتي ام
سيف وگلت لملك تكول لقمر اني خطبت
قمر .. ملك ليش ما گلتي ياسر هنا
ملك .. يا ولج نسيت اصلا هو گلي ما اكلج هو هنا ومعبالي تجين
لبيتنه لان ما يريد يشوفج شگد فشله هسه عباله اني گتلج تجين ضحكت ع قمر خفت لا تعصب عليه ههههه
قمر .. واني هيج ميته ع شوفته
ام سيف .. يمه ياسر بارك لملك الطفل طلع بخير ومابي شي
ياسر ..  مبروك يا ام السان هسه راح تجيبلها بنيه مثل لسانها
ملك .. اني عندي السان
ياسر .. لا مو انتي وحده ابالي
ملك .. خو گول قمر الي ابالك وفضها
قمر .. واني شعليه اثگلي شويه
ياسر .. قمر گلبج ما حن مو تعذبت هواي
قمر .. وليش حتى يحن هو انت العذبتني مو اني
ياسر .. ليش اشفتي مني لو متعذبه العذاب التعذبته شگلتي ولج من عمرج ١٥ سنه واني احبج ١٠ سنوات واني اتعذب
قمر .. ما جبرتك تحبني واكيد هسه من تزوج راح تحب مرتك وتنساني
ياسر .. تدرين الي راح اتزوجها خطايتها راح تكون برگبتج
قمر .. ليش واني شمسويتلها شو حتى ما اعرف منو الخطبتها
ياسر .. صح راح اتزوجها بس گلبي راح يكون وياج راح اكون وياها فقط بالجسد لان راح اخذها فقط حتى تخلفلي ومن راح اتقربلها راح اتخيلها انتي ويجوز اطلگها
قمر .. تدري انت واحد ما بگلبك رحمه شلون تسوي هيج ابنات العالم حط اختك بمكانها مراح تنقهر لو واحد هيج سوا ويه اختك
ياسر .. ليش انتي بگلبج رحمه ولج لو حجر هم تحرك بس انتي مكيفه ع تعذيبي الي يوم احط طلقه براسج وبراسي واخلص
قمر .. ياسر اني ما جبرتك ع حبي ولا فد يوم لمحتلك وجانت علاقتي وياك علاقة اخوه
وهسه كافي خلص الكلام وشتريد تسوي سوي حياتك وانت حر بيها
بس اكلك حط الله بين عيونك ولا تظلم البنيه ياسر .. شوف منو يتكلم عن الظلم والله ماكو رجال ع الكره الارضيه ذل روحه ونزلها مثلي وانتي  شايله خشمج عليه لعد ابقى والله طول عمرج ما تعرسين وتحلمين تصيرين ام وكافي لهنا وبس ذليت روحي هواي شنو انتي جرد مره والخلقج خلق غيرج بس والكفيل يا قمر لأخليج ما ترتاحين بحياتج ابد مثل ما سلبتي الراحه مني وخلتيني معلعل ويجي يوم وهم راحتج تنسلب لان الله عادل اجيتج بالحلال وانتي رفضتيني
ياله خاله ام سيف في امان الله راجع لبغداد
قمر .. شفتي باجي ام سيف شسوه بيه ياسر يعني هيج الزواج بالغصب وحرام الغصب شلون اعيش وياه واني ما اطيقه ولا اطيق قربه الي
ام سيف .. شوفي يمه خلي انصحج  والله ما تلكين رجال يحب مره بكثر ما ياسر حبج يا يمه خسرتي رجال طول عمرج ما تلگين مثله وترى الرجال اهم شي عنده كرامته وشفتي ياسر شلون گلج ذليت روحي الج لوما يحبج ما سوه هيج
وبعد انتي فكري بعقلج واترگي گلبج والمات ما يرجع يا يمه ومحمد صايرله ست سنوات ونص ليش هيج تضيعين شبابج وعمرج اني نصحتج وانتي بكيفج بعد
#ياسر .. اوف حتى جذبتي ما نفعت وحركت گلبها گلت خلي اجذب عليها واكلها خطبت بلكي تنقهر لو تغار
جلمود ما شفت شي بوجها غير الفرح والله لاخليها طول عمرها بلا زواج ..
.
#قمر .. ضليت لليل يم ملك تعشيت وسيف وصلني للبيت 
اني ونايمه صرت افكر بكلام ياسر وباجي ام سيف   ياربي ساعدني ولا تخليني بهاي الدوامه