حكاية قمر

الجزء الثالث عشر

#بقلم الفتلاويه

#البارت الثالث عشر
قمر .. من كملت كلامي ما حسيت غير ايد ياسر ع حلگي ومرده
بأيده شاغت روحي من الالم ضلت شفتي تنزف دم وهو صار يغلط عليه ويحجي بعصبيه ما فهمت شي من كلامه جنت حايره بألمي
ياسر .. عفتها وطلعت لان لو باقي يمها يمكن ارتكب بيها جرم من وره كلامها الي كله سم
قمر .. ضليت بالغرفه نايمه وابجي وانعل بروحي من وره الساني الي ما اسيطر عليه بالله اني شلون هيج تكلمت اووف مني ابد ما اعرف اتصرف
دخل للغرفه شفته طلع ملابسه لبس وطلع ما رجع اله العصر
واني انوب شفتي ورمت شلون بيه باجر ما اكدر اداوم تالي خابرت صديقتي رقيه وگتلها باجر ما اداوم لان تعبانه عبالها اني حامل كتلها لا ويني ووين الحمل خليني هسه ما اريد شي هو شحصلت من الرجل حتى احصل من الابن خلصت كلامي واشوف ياسر وراي
ياسر .. يعني هاي اسرار بيتج تطلعيها للرايح والجاي مو
ليش هيج انتي تعيسه وياي ولج حتى عمامي ما اخليهم يجون لبيتنه علمود محد يغثج بحجايه امي ما خليتها تضل يمج خاف تأذيج بكلامها
وكل هذا مو بعينج عبالي من راح تصيرين ابيتي تحبيبني يابه ما ردت محبتج بس ع الاقل احترميني بس الظاهر ابوج ما عرف يربيج واني الي راح اربيج
قمر .. ضليت ساكته ما جاوبته لان بس اجاوبه خاف يرجع يضربني
خلص كلامه وعافني وراح للصاله گمت حظرتله ملابسه وسويتله اكل ورجعت للغرفه
ياسر .. من سمعتها تكلم صديقتها انقهرت يعني لسه هي ما معترفه بيه كزوج عايشه وياي بالغصب هذا الفهمته من كلامها قررت اتركها وما اتقربلها بعد لان كرامتي عندي اهم وكافي بعد هواي ذليت روحي الها شفتها كامت حظرتلي ملابسي وجابتلي صينية الاكل ودخلت للغرفه
قمر .. ضليت كم ساعه بالغرفه منا لمن دخل واني طلعت ما اريد ابقه وياه بنفس الغرفه خاف تصير عركه مره ثانيه رحت شلت الصينيه وغسلت المواعين وعزلت المطبخ گعدت شويه ع التلفزيون ورحت نمت ع الجربايه ضليت نايمه وياس ما تقربلي هو دائما من ينام يشبگني وينام دريت بي زعلان حيل ضليت الوم بروحي ع كلامي والساني وانوب اني تعودت عليه صحيح لسه ما حبيته بس من بيوم ما اشوفه احس بنقص
بقينه متزاعلين اسبوع واحد ما يكلم الثاني بس مجرد كلام سطحي يعني اذا راد يطلع يكلي يعني مجرد كم كلمه لسه
شايل بگلبه عليه حاولت اتكلم وياه يكلمني من وره خشمه وع گد الجواب ويسكت اوووف مليت من هاي الحاله بالله هذا شلون اراضي
قمر .. ياسر مكافي زعل
ياسر .. قمر لا تحجين شي تعبان ومالي خلگ المعارك
قمر .. يعني هسه اني بنظرك ادور مشاكل بس انت الغلطان مو اني مابيها شي اذا حجيت ويه ابن خالتي علي والله اعتبره اخوي
ياسر .. انتي ليش متحسين يعني تدرين بيه اغار وانوب تكليلي انت الغلطان صدك انتي وحده مغروره
قمر .. انت تغلط وتذب غلطك براسي وگتلك ما مسويه شي غلط وبعد بكيفك
ياسر .. عفتها ونمت لان ما تعرف تحجي ضوجتني حيل
قمر .. ضلينه اني وياسر نفس الحال كلامنه قليل كل واحد بجهه فد يوم اجاني ياسر وگلي خلي نروح لبيت خوالي ابغداد امي مريضه ولازم اروحلها واجلت سفرها علمودي تكلي اريد اشبع شوف منك
قمر .. تدلل . خلال هذا الاسبوع حسيت بحب اتجاه ياسر ما ادري يجوز لان بعد ما يهتم بيه وغرور المرأه تحب احد يهتم بيها ومن بعد ما يهتم بيه اشتاقيت
لاهتمامه
جنت كل ما اتباوع لوجهه ياسر اظل اصفن بوجهه واشوف شغلات ما جنت شايفتهن من قبل سواء بشخصيته او بجسمه
من يتكلم اظل اتفهه بوجهه واتمعن اصلا مو يم كلامه
حسيت ع روحي اني صرت احبه
ياربي صدگ احبه خلال هاي الفتره محمد بعد ما افكر بي ولا يجي ع بالي صرت احب ياسر صح محمد بگلبي بس ياسر ما ادري ليش گلبي يدگ اله بسرعه
ياسر .. صايرلنه اسبوع منتحاجه ردت اعاقبها ع كلامها وياي وابين الها اني احبها مو مثل مگالت تهمك النومه بس خلال هاي الفتره حاولت تصلح الامور بينه بس جنت ع عنادي وياها صح احبها بس كافي كرامتي اهم وبيومها خالي خابرني وگلي امي مريضه فلازم اروحلها واخذ وياي قمر لان اريدها تتعرف ع خوالي وتقوي علاقتها ويه امي
ياسر .. قمر تعالي ما اريد احد يعرف بمشاكلنه واريدج ما تجيبين امور الطائفيه مثل ما تعرفين خوالي من غير طائفه وامي اريدج تعتبريها امج ما اوصيج بعد
فمر .. صار وتدلل يسوري
ياسر .. اشكرج .. تعجبت ع كلامها هلايام كله دلع معقوله بدت تحبني
قمر .. رحنه لبغداد واستقبلنه خاله ابو عمر احلى استقبال رجال فقير عنده زوجات اثنين الزوجه الاولى ام عمر مخلفه اربع بنات وولد اثنين
وام اسامه مخلفه ولد واحد وبنت وحده
سلمت عليهم وكعدنه اجت ام ياسر شبگت ابنها وبجت اني هم گمت سلمت عليها وهي من وره خشمها سلمت عليه ما اهتميت
ظلوا يسولفون واني ساكته استحي لان اول مره ادخل لبيتهم
اجتني ام عمر وسألتني
ام عمر .. خاله لسه ما حبلتي
قمر .. خجلت كلش گدام الولد وابو عمر وام عمر تگلي ما حبلتي ههه
قمر .. لا خاله بعدني هستونه تزوجنه نلحگ ع الخلفه
ياسر .. عمه خلي بالاول نتونس اذا اجه الطفل يبوگ امه واني ابقه بلا مره
قمر .. فرحت بكلام ياسر ما اعرف ليش صرت افرح من اشوفه يذكرني لو يتلكم عني يجوز لان بديت احبه
ام ياسر .. يمه انت كبرت ومرتك خاف هم تطلع مثل امها وتخلفلك بس البنات
قمر .. خاله واشبيهن البنات ماكو احلى منهن شفايتلي خلفتي كلها بنات
ام ياسر .. اي هم عوزج والله ازوج ياسر واخلي مرته تخلف الولد شنو قلة النسوان
قمر .. شفت ياسر خزرني وسكتت ما رديت
ياسر .. خزرت قمر بمعنى لا تردين
وگلت لامي يمه ومنو گلج ابدل قمر لو اتزوج عليها ما اتزوج عليها لو خلفتلي ١٠٠ بنيه وهنياله اليحط البنات ابيته
ام ياسر .. والله يا ابن بطني ابد ما تطي بمريتك ساحرتك هلقميره
ياسر .. واجمل سحر اتمنى اظل طول العمر هيج مسحور بيها
ابو عمر .. والله يا خالي والنعم من مرتك ادب واخلاق وجمال الله يهنيكم
قمر .. بعد كم ساعه صار الليل اجتني ام عمر وگلتلي نامي انتي ورجلج بغرفة ام اسامه بعدكم عرسان جدد
قمر .. خاله والله زحمناكم
ام عمر .. يا خاله وين الزحمه انتي هم بتنه وهذا بيتكم ترا ازعل منج
ياسر .. صحت قمر وگتلها بعد ما تجادل ويه امي واني الي ارد ع امي
ياسر .. قمر لا تحجين شي بعد ويه امي ترا مريضه واستحمليها لخاطري ولو اني ما عندي خاطر عندج
قمر .. ياسر ليش هيج تحجي وانت تعرف خاطرك ومعزتك شنو
بس دائما تحاول تغثني بكلامك
الظاهر صارت عندك المغثه متعه كل شويه وغاثني بكلمه
ياسر .. قمر اسكتي مو وكتها لا تنسين احنه مو ابيتنه
قمر .. ع امرك وتدلل عفته ودخلت للغرفه شفت غرفة ام اسامه كلش حلوه ع الرغم هي صايرلها مزوجه ابو عمر ٢٦ سنه بس اليگول غرفتها غرفة عروس
طلعت ملابسي غسلت ونمت حمامهم داخلي بالغرفه
حطيت راسي ع المخده وتذكرت كلام ام ياسر دمعت عيوني بس ما بجيت ما اريد ابجي ابيت مو بيتي شويه واجه ياسر
ياسر .. قمر طلعيلي ملابسي من الجنطه
قمر .. تدلل
رحت طلعت اله تراكسود طب غسل وطلع اجه تمدد يمي ع الجربايه ساكت بس اسمع نفسه
قمر .. درت وجهي اله ياسر ليش لسه ع زعلك مو اعتذرت الك وگتلك اسفه
ياسر .. قمر دائما تجفصين بالكلام وتجين تعتذرين والله مليت منج وتعبت
قمر .. تدنيت نمت ع صدره مشتاقتله صدره يامه بجيت عليه اول ايام زواجي لان جنت بحاله صعبه وجان فعلا رجال وما تركني وعمري مراح الگه مثل ياسر
ياسر .. قمر وخري من يمي اريد انام نعسان
گلت لقمر توخر من صدري لان اضعف گدامها واني اريد اعاقبها
قمر .. من گلي وخري استهضمت روحي بعدت عنه ودرت وجهي وصرت ابجي بالساكت هسه گدرت احس بشعور ياسر من جنت اطرده من يمي بس هو جان متمسك بيه جنت اگول ماعنده كرامه اووف والله عذبته بدون ما احس
.
گعدت الصبح شفت ياسر ماگو كمت بدلت وغسلت وجهي وطلعت شفته گاعد ويه بنات خاله ديمه عمرها ٢٢ سنه وسميه عمرها ١٩ سنه
اني شفتهم لو حسيت بغيره ونار بسرعه رحت صبحت عليهم وگعدت يم ياسر
ديمه .. صحي النوم يا عروسه
قمر .. يا عروسه صرت قديمه
سميه : قمر تحظري ياسر راح ياخذنه العصر يفررنه نتونس ونغير جو
قمر .. اوك حتى اتحظر من وقت
ديمه .. قموري اكلج هم حبيتي ياسر من بعد الزواج لان ندري بيج جنتي ما تحبي وعذبتي گلب ابن عمتي وضحكت
قمر .. اني بدون اي شعور واصلا ما ادري شلون هيج حجيت گتلها والكفيل احبه واموت عليه
سميه .. ها ياسر علمتها تحلف مثلك
ياسر .. من عاشر القوم صار مثلها
بس تعجبت قمر ليش تحلف ادري بيها جذب متحبني
ظليت اتكلم مع بنات خالي وما داير بال لقمر مطنشها
قمر .. شفت ياسر ما شايفني ولا يدري بوجودي عفتهم ورحت للمطبخ يم خاله ام اسامه
صبحت عليها وگعدت يمها وضلت تتكلم عن ياسر وتوصيني عليه وتگلي ما تلگين مثل ياسر رجال شويه ودخلت باجي ام ياسر
ام ياسر .. صباح الخير ها قميره شو كاعده ماتكومين تساعدين المره
قمر .. صار باجي كمت حتى ما اريد اتجادل وياها وادري تدور المشاكل
ام اسامه .. يا ام ياسر هاي شنو البنيه خطارنه وترديها تشتغل شنو هاي
ام ياسر .. ما راح ينقص منها شي احسن ما گاعده وتسولف
ام اسامه .. هاي عود انتي الفاهمه
اگعدي يمه شنو هسه اني شمسويه شو هو قوري وع النار
قمر .. عفتهم وطلعت رجعت للغرفه تمددت
ياسر .. رحت للمطبخ سألت ع قمر وامي گلتلي ما تعجبها كعدتنه
مريتك مزعوجه الظاهر ما نعجبها
رحت دورتها لگيتها بالغرفه نايمه
قمر .. من شفت ياسر دخل گعدت كتله رايد شي
ياسر .. قمر اني شگتلج مو گتلج اتحملي امي كم يوم ليش هيج وياها
قمر .. ظليت باهته من كلامه ما اعرف شأرد
ليش هو اني شسويت شو گعدت شويه وطلعت لان تعبانه واذا اجذب اسأل خالتي ام اسامه هي جانت موجوده
ياسر .. گتلج ما اريد مشاكل وتحملي كم يوم
قمر .. انت ليش دا تحسسني اني ادور المشاكل دا اكلك ما سويت شي گوه تريد تخطأني وتطلعني مو زينه
ياسر .. صحت بصوت بس مو عالي گلي قمر گتلج كم مره لا تعلين صوتج وكافي دلع انتي مو ابيت ابوج وهسه صرتي مره متزوجه
قمر .. زواجه گشره
ياسر .. الظاهر طول عمرج ما راح تعترفين بيه ولا تشوفيني الزوج المناسب ماطول خشمج يابس ع شنو شايفه روحج انتي جرد مره والله لأخليج تندمين من وره السانج وكلامج السم
عفتها وطلعت
قمر .. كل ما اريد اصلح الامور ازيدها شلون اني بلساني المايسكت
كعدت شويه واجتني مرت عمر وگلتلي راح نتريگ كمت گعدت يم ياسر
اكلت شويه وگمت لان نفسي انسدت من وره المشاكل
ام عمر .. هاي شنو خاله شو ما اكلتي
قمر .. خاله والله ما اشتهي واكلت علمودكم
ام ياسر .. عوفيها خيه نسوان تتعيقل
قمر .. باجي ليش حتى اتعيقل اني ما سويت شي غير ما اشتهي اكل ما جرمت ولا غلطت
ياسر .. قمر كافي خلي اتزقنب
قمر .. صار خليت وگمت
بعد الريوگ طلعت للحديقه كعدت ع المرجوحه اجاني ياسر صاير اعصاب ولج انتي شنو من مره ليش ما تضبين السانج يعني ناويه تموتيني گتلج ضبي السانج كم يوم
قمر .. ما اسمحلك تصيح عليه اني ما سويت شي وانت شفتها شلون
تحجي كافي تعبت منك ومنها ومن كل العالم اريد ارجع لبيتنه لان بعد ما استحمل
ياسر .. تنجبين وتسكتين مو بكيفج ارجع
عفتها وطبيت لان تعبتني واني گتلها امي لا تكلميها وهم ادري بأمي ما تسكت
صار العصر طلعنه اني وبنات خالي وقمر ومرت عمر طلعنه دا نمشي وواحد تحرش بقمر لزمته سگطته
قمر .. جنت دا امشي بصف ياسر واجه واحد يخرع ذب كلام الي ما اشوف اله ياسر هاجم عليه اله شويه ويموته جوه ايده اجوي الناس فاگكوهم
اجاني ياسر سحب ايدي بقوه ومشينه وگلي هسه اتاحيتي من تحارشو بيج اني مو گتلج لا تلبسين هيج ملابس لو تردين تعرضين جسمج
قمر .. ياسر كافي لا تخربط بالكلام واني شعليه قابل گتله تعال تحارش بيه
مرت عمر .. هاي اشبيك خويه هي شدخلها شو جانت تمشي وهو اجه تحارش وتدري انت ولد هلوكت محد تخلص منهم ياهي اليشووفوها يتحارشون بيها
قمر .. بعد كلام مرت عمر سكت ياسر وكملنه فرتنه بس اني طالعه روحي وانوب معدتي توجعني ودا احس بدوخه وزيدها عليه ياسر من وره كلامه كرهت الطلعه
سميه .. ياسر جعنه خلي نطب للمطعم
ياسر .. دخلنه للمطعم وكلهم طلبوا اكل بس قمر طلبت عصير
قمر .. طلبت عصير لان ما اشتهي اكل
ديمه .. قمر ليش ما طلبتي اكل
قمر .. والله ما اشتهي
ياسر .. قمر بيج شي يوجعج شي ليش متاكلين شو لا تريگتي ولا تغديتي وهسه تكولين ما تشتهين
قمر .. لا ما بيه بس ما اشتهي
مرت عمر شاورتني گلتلي خاف حامل
سميه .. سمعت ترا
ياسر .. شكو ولج
سميه .. مرت عمر شاورت قمر وگلتلها خاف حامل وضحكت
ياسر .. فرحت بداخلي تمنيت صدگ يصير عندي طفل من قمر
قمر .. لا ويني ووين الحمل بعدني
مرت عمر .. شنو قابل بكيفج هو يجي رزق من الله
ياسر .. وصل الاكل والكل گاموا ياكلوا اله قمر تشرب عصير گلبي ما انطاني اتركها بدون اكل شلت قطعة بيتزا وانطيتها
قمر .. ياسر والله ما اشتهي مو گتلك معدتي متخربطه
ياسر .. حبيبي لا ترديني
قمر .. فرحت من گلي حبيبي ما اعرف ليش صرت افرح من هيج اسمع منه يجوز لان صدگ حبيته
اخذت القطعه واگلتها خلصنه اكل وطلعنه نفتر شويه ولن متقيئه
ياسر .. شفت قمر وگفت وصارت تتقيأ بالحاويه
قمر بيج شي تعالي خلي اخذج للمستشفى خاف عندج تسمم
قمر .. ياسر مو گتلك ما اريد اكل تلعب روحي
  زوجة عمر .. ياسر قمر يمكن حامل لان هاي اعراض حمل اجر سياره خلي نروح للمستشفى ونطمن
قمر .. لا ياسر لا تأجر ما اروح للمستشفى گتلكم ما بيه شي بس معدتي توجعني
ياسر .. اش كافي راح ااجر سياره
قمر .. صدگ ياسر اجر سياره هو گعد بالصدر واحنه الاربعه تحاشگنه بالوره
وصلنه للمستشفى سوينه تحاليل والدكتوره گلتلي سوي تحاليل حمل رحنه سوينه تحاليل وطلعت التحاليل الدكتوره گالت حامل
اني من گالت حامل صرت ابجي من فرحتي يعني راح يصير عندي طفل شعور ما گدرت اوصفه غير بس بالدموع
ياسر .. من سمعت بقمر حامل كلش فرحت بس من شفتها صارت تبجي انقهرت ونسيت فرحتي دريت بيها مقهوره لان صارت حامل من واحد ما تحبه
قمر .. مرت عمر وسميه وديمه باركلي واني بس ابچي
ديمه .. ولج فضحتينه اليگول الج ١٠ اسنين ما عندج اطفال وهسه صار عندج طفل
زوجة عمر .. لا ديمه اشبيج والله هاي فرحه ما تنوصف اني هم من دريت بروحي حامل هم صرت ابجي
اجاني ياسر وبارگلي وباسني طلعنه من المستشفى للبيت اول ما دخلنه البنات بشروا الاهل
ابو عمر .. مبروك يا بويه ان شاء الله الولد الصالح
ام اسامه .  مبروك يمه يتربى بعزكم
ام عمر .. والله دريت بيج حامل لان مبينه الف مبروك يمه
ام ياسر .. ما باركتلي بس باركت لابنها ياسر وگلتلي اكيد حامل بأبنيه تطلع ع امها
ياسر .. يمه واشبيها البنيه شيجي من الله قابل وقانع بي المهم تمام الخلقه
دخلت للغرفه غسلت وبدلت وتمددت لان ياسر ظل سهران ويه خاله وولد خاله واني تعبت من الفره
ضليت متمدده وكامشه بطني وابجي من فرحي ما جنت متصوره اصير حامل بهاي السرعه واصير ام بس جنت مقهوره من ياسر لان مو كلش فرحان
ياسر .. دخلت للغرفه شفت قمر كامشه بطنها وتبجي انقهرت لسه تبجي لان حامل
قمر هيج كارهتني وتبجين لان حامل حتلوا تكرهيني بس هذا ابنج ومن دمج
قمر ..  تعجبت من سمعت كلام ياسر گعدت ومسحت دموعي وگتله اصلا دا ابجي من فرحي لان راح اصير ام وجنت ما متوقعه بعمري ازوج واصير ام
ياسر .. فرحت من كلام قمر يعني جانت تبجي لان راح تصير ام واني ظلمتها
قمر .. ياسر بعدك تحبني مثل قبل لو تغير حبك
ياسر .. وليش تسألين
قمر.. مجرد سؤال
ياسر .. قمر ماطول اشم الهوا حبج يزيد بگلبي يوم عن يوم بس الظاهر مقسوملي ابقه طول عمري اتحصر ع حبج الي تصبحين ع خير نامي لان انتي تعبانه والدكتوره گالت يحتاجلج راحه
قمر .. فرحت من سمعت كلام
ياسر نام ودار ظهره الي شبگته من ظهره وگتله مراح تتحصر ع حبي لان اني اموت عليك واعشقك واحبك وذايبه بيك كل كلمه تتضمن معنى الحب گلتها لياسر
ياسر .. قمر هذا تأثير الحمل مشاعرج متخربطه
قمر .. اصلا احبك قبل لا اصير حامل وحق الحسين ع احبك وصرت ابجي ليش متصدگني شلون اثبتلك اني احبك
ياسر .. ما اتحملت بجيها درت عليها وشبگتها جانت احلى ليله بعمري راح اصير اب وطلعت قمر تحبني جنت اتمنى يتوقف الزمن بهاي اللحظات
صار الصبح وياسر گلي خلي نطلع يريد يراويني بيته وكلي ما اكول لامه
من طلعنه صبحنه ع الاهل
ام ياسر .. ع خير يمه ياسر وين طالع
ياسر .. يمه طالعين نتونس وافرر قمر لان من اجينه ما طلعنه لوحدنه
ام ياسر .. اي يمه هم حقها بنت ابو البنات تريد تتونس
قمر .. باجي ما اسمحلج تجيبين طاري بابا وشبيهن البنات همزين انتي من ضمن النساء
ام ياسر .. طلع السانج شوف ياسر لسان مريتك
ياسر .. يمه انتي البديتي كل ما تشوفين قمر وگتيلها بنت ابو البنات ترا هاي خلقة الله ورزق من الله
ام ياسر .. والله وعرفت تفر راسك بنت ابو البنات هاي تاليتي ابن بطني يوكف ويه مرته
قمر .. ياسر حبيبي ياله خلي نطلع
ام ياسر .. من يمته صار حبيبج شو شلعتي گلبه وخليتي مسودن
قمر .. بست ياسر بخده وگلت لامه مو بس حبيبي ورجلي وابو بنتي ان شاء الله ردت اقهرها من گتلها ابو بنتي لان هي ما تحب البنات
ياسر .. قمر كافي ياله خلي نطلع
ام ياسر .. اي يمه اطلع وعوف امك
ياسر .. ليش اني وين عايفج غير انتي ابيت اخوج واذا ع الطلعه باجر اطلع اني وياج وحدنه
ام ياسر .. امشي ابن بطني بعد صرت محبس بيد قميره
ياسر .. يمه دخيل الله كافي والله تعبتيني مع السلامه
قمر .. طلعنه اني وياسر ورحنه لبيته البيت ملك لياسر هو مشتري
شفت البيت كلش حلو وجبير وطابقين وحتى مأثث ومفروش لان هو جان ساكن بي
ياسر .. قمري ياله خلي نروح لغرفتنه 😉
قمر .. لا ياسر ما اريد اشوف غرفتك جوعانه اريد اكل
ياسرر .. تعالي لغرفتنه واني اشبعج
قمر .. ياسر لا تنسه اني حامل وبداية حملي
ياسر .. خرب بيج ولج تعالي لا اجي اشيلج
قمر .. حبي اشبيك والله جوعانه 😭 واخاف ع النونو
ياسر .. شو تعالي خلي اشيلج وارتاح من السانج
ظلينه بالبيت كم ساعه وطلعنه فرينه ورجعنه المغرب
ياسر .. قمر لخاطري لا تردين ع امي ما اريد تصير مشاكل بينجن ادري بيها دا تضوجج بس انتي اتحمليها

يتبع ...