رحمة

بارت 14

#رحمة
#طيبة الربيعي
||البارت الرابع عشر||

من خف الحمار الي بوجهي رجعت للغرفة

نسرين: يلة تعاي گدري هذا خلي اشوفة

اخاف اذا صارت صدگ يأذيني.. خلي ماروح احسن شكلة جان كلش مرعب وجاد.. اني هم طوختهة مو رحمة الي تتصرف بهل رخص.. بس اني مسويت شي مجرد جاوبت الرجال بكلام حلو..

گعدت: نسرين لو ماروح اني احسن
باوعتلي متفاجئة: انتي يمكن مشتهية ابو الخمسة واربعينن مووو؟؟
رحمة: عيب شنو رايحين احنة الخدامات واهل البيت كلهم محد يروح بس سامي'طيبة_الربيعي'
نسرين: دنجبي الرجال يريد انساعدة هناك هو الي گلج تعاي مو انتي، والله ازعل عليج رحمة مو جبتيني وهسه تگوليلي ماروح

اوف هم عيب اني جبتهة وادور اغير رأيي.. وانطيت حجي لاستاذ سامي فشلة ومو من الأصول انو اروح اگلة بطلت.. ورطتي حالج يا رحمة

رحمة: خاف عيب يعني اهل البيت شيگولون علينة
نسرين: ميگولون همة يومية مسافرين لمكان يجوز يرحون فد مكان باچر، بلا حجي فاضي وگومي لبسي هذا خل اشوفة عليچ

لبست الثوب وباوعت بالمراية

نسرين: خرب شلون جسم والله لو اني ولد اااخ
ضحكت: مو شوية ضيق
نسرين: دروحي يا ضيق شتريدين لعد تلبسين دشداشة بيبيتي

حلو علية طلعت غير شكل.. مورد بورود بيض وورديات.. رداناتة فضفاضة ومن الكف تچة ضابتة.. بس من الجسم مخصر نوعاً ما ومو طويل يسحل وراية لا.. شوييييية من رجلية طالع..

احس نفسي ممرتاحة زودتهة.. بانت غيرتة يعني يحبني من صدگ بعد علويش اكبرهة وازيد الطين بلة.. هاي هية تورطت بعد.. بس كون ميتهور ويفضحنة..'طيبة_الربيعي'

فدوة شلون يغار.. بس اني هم اغار يعني السواه هو مو قليل.. ماعرف شسوي اثير غيرتة بعد اكثر لو ابطل..

كالعادة مرتضى اجة نومتة يمي.. حبيبي انتة صرت ابني بعد مستحيل اتركك..

گعدنة الصبح سوينة ريوگ الكل تريگ.. اجتي نسرين گالت استاذ سامي يگول ورة الغدة نطلع.. سوينة غدة وحضرنة اكل للسفرة

رحمة: زين معرفتي منو يروح
نسرين: لا بس ماعتقد احد غير سامي يروح، يعني هو مگلي حيجي احد غيرنة
رحمة: تمام

ورة مخلصنة كلشي دخل استاذ سامي

سامي: ها بنات خلصتو
نسرين: اي استاذ غير منتظرين منك الأشارة
سامي: عساس انتي كلشي راح تنتظرين اشارتي، والله اذا سويتهة والتهيتي بنفسچ بعد تحلمين تشوفين المزرعة