رحمة

بارت 8

#رحمة
#طيبة الربيعي
||البارت الثامن||

مغمضة عيني ومجلبة بالرجال لكن من همس بأذني

فاروق: تكدرين تنزلين حتة الجلب انصدم بالتسلق مالتج، ظهري راح

ابتعدت عالسريع.. يبووو علية شكد عيب دخلت بثوبي من الخجل.. يمة من الرهبة دموعي يجرن.. انتهبت عالرجال شطولة وشضخمة حنطاوي بشعر ولحية سود.. وشكلة منصدم بفعلتي..

رحمة: اسفة كلش اعتذر

طبيت ركض امنيتي لو ماكلني الجلب ولا هذا الموقف.. اول مرة اشوفة اني شايفة ولدهم كلهم بس هذا اول مرة اشوفة وبالعادة محد يكعد هيج وقت شعجب هذا كاعد.. رجلية يطگطگن اطگطگ وكلبي نبضاته اسرع منهة ماكو..

نسرين: صباح الخير
نزيت: صباح النور، خرب بيج فززتيني
فتحت الثلاجة: شبيج حبي ليش وجهج اصفر، تريگتي؟
رحمة: مابية بس فزيت، لا توني جنت بالحديقة اشتم هوة بس طلع سم علية
باوعتلي: ليش شكو'طيبة_الربيعي'
رحمة: لج عندهم جلب، اول مرة اشوفة وراد يهجم علية لو ما صاحبة موجود، مدري شگلة وخنس
نسرين: اويلي بس لا شفتي فاروق😍
رحمة: ليش منو فاروق
نسرين: لج هذا رئيس الحراس واصحاب البيت يثقون بي ثقة عمياء وكلشي منعرف عنة غااامض الى درجة، شحجيتي ويا الله عليج
رحمة: لج كلشي محجيت والله راسةً طبيت من الخوف والرهبة، باعيني الي هسه ارجف الجلب يخوف
نسرين: اي هذا ماكس يخوف وميمشي بكلمة احد غير فاروق
رحمة: عوفينة من فاروق وماروق، اريد اروح اشتريلي هدوم للطلعة ذنيج اسلتن استحي اطلع بيهن كدامهم
نسرين: نخلص شغلنة بالأول وبعدين ناخذ الأذن من ام سامي
رحمة: ماشي

بعد ما خلصنة شغلنة اخذنة الأذن من ام سامي وطلعنة.. لبست تنورتي السودة وبدي اسود وسترة سودة طويلة.. من طلعنة لمحت الرجل نفسة واكف يحجي وية الحراس.. شافنة رأسةً دنگت ومشيت

نسرين دغتني: لج دشوفي شلون خلقة، من فدوة المحمد
رحمة: يمعودة ليسمعوج
نسرين: اويلي ياريتة يسمعني، لج حتة بناتهم ميتات عليه ومحد تگدر تحصلة
رحمة: لا صدگ؟
نسرين: اي والله
رحمة: مو لهل درجة ترة شكلة عادي
نسرين: دروحي انتي يا عادي، بس لحيتة وشواربة يسون الحراس كلهم، شخصيتة تموت وجسمة اويلي يابة، خو من اروح انضف مكانة ابقة اشم بهدومة
رحمة: ياااا لهل درجة
نسرين: ايي واكثر همينة

خبصتني بي طول الطريق لو ادري ماحجيلهة ابد.. ضامة ٥٠٠ الف علة صفحة اصرف منهة لأحتياجاتي الخاصة.. اشتريت المحتاجتة واخذتلي هدوم شوية محرزة اطلع بيهن كدام العالم..

الحلو انو لبس مو موحد يعني بكيفنة شنو نلبس نلبس.. رجعنة وية المغرب الاذان يأذن والجو حلو.. تذكرت ماما من تخبصني عالصلاة تگلي من يأذن الأذان تعوفين كلشي من ايدج وتگومين تلبين نداء ربج للصلة بينج وبينة..