وليد فى مكتبه ....بعد ما أتاكد ان جاسر مش فى الشركه .....بيفكر ان ممكن جاسر يكون مخبى موبايل أميره فى مكتبه... بيخرج من مكتبه وبيروح عند مكتب جاسر ....بيفتح الباب وبيدخل بسرعه وبيقفل الباب وراه....وليد بيدور على التليفون فى كل مكان فى المكتب...بيدور فى دواليب الملفات والرسومات ....بيقرب من المكتب وبيدور عليه ....بيفتح الدرج الاول وبيطلع كل حاجه فيه وبيفتح الدرج الثانى مش بيلاقى فيه حاجه وبيحاول يفتح الدرج الثالث لقاه مقفول بالمفتاح......وقف وليد وهو بيفكر ....ازاى يفتح الدرج ده.....
**********************************
نيهال ووفاء على السفره ....
"مين اللى كان بيتصل بيكى على الصبح كده يا نيهال"
"دا المقدم شريف اللى ماسك قضية أميره"
"وبيكلمك فى الوقت ده ليه"
نيهال بتسكت شويه ....وبتقرر انها تحكى لـ مامتها على كل حاجه...
"ماما ...انا كنت عايزه اتكلم معاكى فى موضوع.....انا مكنتش عايزه اقول لحد...بس انتى عارفه ان مش بقدر اخبى حاجه عليكى"
"خير يا بنتى...فيه ايه"
"فيه واحد عايز يتقدم لى"
وفاء بفرحه "مين يا نيهال ...انا اعرفه؟"
"شريف"
"شريف اللى كان بيكلمك فى التليفون من شويه؟"
"ايوه يا ماما"
"وانتى رأيك ايه "
"مش عارفه.....بصراحه يا ماما انا مش هقدر افرح وأميره لسه ميته "
بتفهم وفاء ان نيهال موافقه....بس موت أميره هو اللى مانعها..
"يابنتى الحى ابقى من الميت..وبعدين أميره لو عايشه كانت أكيد هتفرحلك....هو هيجى أمتى"
"مش عارفه...هو كلمنى بس انا قولتله نأجل الموضوع شويه"
"خليه يجى يا نيهال...على الاقل اتعرف عليه هو وأهله وهم يتعرفوا علينا ونقرا فاتحه والخطوبه والفرح نأجلهم شويه"
"انتى رأيك كده يعنى"
"انتى ليكى رأى تانى؟"
"مش عارفه على العموم هو مشغول اليومين دوول فى القضيه...أدعيلنا يا ماما اننا نوصل للقاتل بسرعه"
"يارب يا بنتى......متعرفيش انا قد ايه فرحت أن وليد طلع برىء"
"الحمد لله يا ماما.....انا هقوم بقى علشان لسه هعدى على جاسر فى المستشفى "
"خير ...ماله جاسر"
"مامته تعبانه شويه....هروح اطمن عليها....دى برضوا كانت حماة أميره"
"وانتى عارفه هى فى انهى مستشفى؟"
"اه ...شريف قالى على العنوان"
أنت تقرأ
حلم أميرة
Actionلعشاق المغامرة والخيال والاثارة والتشويق مكانكم هنا فى الرواية ده بقلم : احمد عز الدين
