حلم أميرة

15

شريف بيرُد على نيهال.....

"أحنا فى البدايه قولنا الجريمه حصلت بهدف السرقه علشان مالقناش السلسله وتقرير الطب الشرعى بيقول ان القاتل كان بيحاول ياخد الدبله علشان موجود أثار على الايد ...علشان كده احنا عملنا أخباريه بالسلسله لكل محلات الدهب علشان القاتل أكيد هيحاول يبيع السلسله"

"وانتوا عرفتوا مواصفات السلسله منين؟"

"من الصوره اللى جاسر سابها للعسكرى علشان التحرى"

"والتليفون؟"

"التليفون!!....التليفون جاسر قال انها نسيته فى الشقه وده مثبوت فى المحضر"

نيهال بعد ما سمعت رد شريف....عرفت ان جاسر كذب عليها وانه معاه التليفون....

"سرحتى فى ايه؟"

"لا..مفيش حاجه...انا لازم استأذن دلوقتى علشان فى حاجات تانيه لازم اخلصها"

"تستأذنى ؟....انا كمان كنت عايز اتكلم معاكى فى موضوع "

نيهال بتفتكر شريف ومها وهم بيتكلموا وبيضحكوا....

"خليها مره تانيه...انا مش فاضيه فى حاجات عايزه اخلصها علشان قضية وليد....وبعدين انت في ناس تانيه عايزه تشوفك"

"ناس مين؟"

شريف بيفتكر مها وهزاره معاها وبيفتكر رد فعل نيهال بعد ما دخلت وشافتهم وبيعرف ان ده سبب تغيرها معاه الفتره اللى فاتت..

بتقوم نيهال علشان تمشى ...بيقوم شريف وراها بسرعه..وبيمسكها من ايدها....بتبصله نيهال....

"نيهال...انا بحبك"

********************************************

جاسر فى المستشفى....بيبص على زينب وهى فى العنايه المركزه...وشويه وبيخرج الدكتور من عندها وجاسر بيطلب من الدكتور انه يدخُل لها....

"مش هينفع الحاله خطيره"

"ارجوك يا دكتور....هى أكيد لما تحس بوجودى هتفوق وتبقى كويسه "

الدكتور بيسمح لجاسر بـ5 دقايق بس......بيلبس جاسر المريله المعقمه لدخول العنايه المركزه ....بيدخل العنايه بيشوف مامته وهى نايمه على السرير وجسمها متوصل بالاجهزه...بيقرب منها ويمسك أيدها...........

"ماما...ان اسف يا حبيبتى على كل اللى عملته ...انا عارف انى السبب فى اللى حصلك ده...ارجوكى يا ماما فوقى وانا هعملك كل الى انتى عايزاه....ارجوكى يا ماما متسبنيش انتى كمان "

بيمسك جاسر ايد مامته وبيبوسها والدموع نازله من عينه...بعد شويه بيخرج من العنايه ....ابوه بيشوفه وهو خارج ومستنى جاسر يطمنه...جاسر بيجرى على باباه وبيحضنه وبيعيط...ووجدى بيطبطب عليه

****************************************************

حسين واحسان فى القسم......حسين بيكلم العسكرى...