حلم أميرة

5

الحلقه الخامسه

بيفتح العسكرى باب مكتب شريف ......

بيدخُل العسكرى "شريف بيه ...فى واحده بره عايزه تقابل حضرتك"

"مين دى؟"

"مقالتش اسمها"

"دخلّها "

بتدخل نيهال المكتب واثر الدموع والحزن باين على وشها

شريف اول ما شافها افتكرها "اتفضلى."

نيهال "انا نيهال صاحبة أميره حسين"

شريف "اه انا فاكر حضرتك"

نيهال مستغربه هو فاكرها منين

شريف "انا كنت موجود فى المشرحه ساعة ما حضرتك اغمى عليكى "

نيهال بتحاول تدخل فى الموضوع " انا عندى معلومات بخصوص القضيه وكنت عايزه اقولها "

شريف "معلومات ايه ؟؟"

نيهال "انا عارفه مين اللى قتل أميره "

"مين ؟؟...جاسر؟؟"

نيهال بتستغرب من كلام شريف " جاسر!!....ايه اللى خلاك تقول جاسر؟"

"بصراحه من أول ماشوفته وانا شاكك فيه...مكنش قلقان ومراته مخطوفه..وأما عرف انها اتقتلت ...حسيت انه مش مصدوم من الخبر زى حضرتك ووالدها الاستاذ حسين"

"هو ده اللى خلاك تشك فيه ؟"

"مش كده وبس وانا بسأله ..كان فيه خلافات بينه وبين المجنى عليها ..سكت شويه وبعدين رد..... بحكم انكوا صحاب....كان فيه خلافات بينهم او المجنى عليها مقلتلكيش انه كان بيعاملها وحش "

بتفكر نيهال فى كلام شريف وبتفتكر كلام أميره لما قالتلها انه بقاله فتره مش بيتكلم معاها زى الاول وانها خايفه ليكون شك فيها...بيقطع تفكير أميره صوت شريف

"استاذه نيهال...استاذه نيهال."

"هاااا....كنت بتقول حاجه"

"ايه.... سرحتى فى ايه؟؟...........كنت بسالك كان فيه بينهم مشاكل "

"لا...اه...يعنى مش مشاكل بس أميره كانت قالتلى انه بقاله فتره متغير معاها...واما سألته قالّها انه عنده مشاكل فى الشغل"

شريف ساكت ومستنى نيهال تكمل كلام

"بس ده مش معناه ان جاسر ممكن يعمل كده"

"ليه مش ممكن يعمل كده؟"

"مش عارفه ....بس جاسر محترم ومتعلم و بيحب أميره...لالا معتقدش انه يعمل كده"

"لما جاسر مش هو اللى عمل كده ...مين اللى قتل أميره ؟"

"البواب ومراته"

**********************************************************

فى بيت حسين ...احسان بتتكلم مع حسين... باب الشقه بيتفتح وبيدخل وليد