#غادرتني_المشاعر
الحلقه {22}
ونلتفت انا واسيل وننصدمو
كان رياض الشاب الي خاش
رياض بحت في اسيل واسيل بحتت فيه بعدين التفتت عليا ع اساس مش معدلا وهي عيونها كانن يبن يبكن
رياض : اووووو سيف شن جو شخبارك
سيف: تمام شن جوك انت وينك مغطس
رياض: قعدين في هالدنيا والله
انا واسيل انبحتو في بعضنا منصدمات
سيف ورياض يعرفو بعضهم
اسيل: هيا نطلعو حي علينا
انا: هيا
وطلعت انا واسيل بدون مانقول للسيف ولانحكي امعاه طلعنا وقعدنا نمشو خشينا محل ماك اب
اسيل: هيييي عليك صدفه
انا: عليك بخت مش صدفه رياض ماجش الا في موعدي ولا وطلع يعرف سيف اخره
اسيل: تي عادي رياض شن فيها انتي تفكري في موعدك وانا انفكر في صدفه الي صارت يانا عليا بعدك كنت مرايفه عليه وااااجد
انا: خليني نكتب مسج للسيف تو يقول كنها هذي
دزيت مسج للسيف وكتبتلا فيه ان الشاب الي خش نعرفه وهذا عليش طلعت
اسيل: دزيتلا
انا: اه دزيتا له
اسيل: باهي تراه رني ع امك وشفيهم وين
انا: اه قاعده انرن حتي انا
ورنيت ع ماما ومشينالهم في محل وقعدنا نختارو انا وبنات في لبسه للشهد
وعدت ماما وعمتي نعيمة للحلواني وتفقنا نتلقو عند سيارتنا بعد انكملو
ونحنا زيطات تهدريز وضحك
اسيل: زعمك رياض عليش خاش محل الساعات
انا: مش عارف بالكي يبي يشري ساعه ولايصلح ساعه
اسيل: بالكي خاطري نحكي امعاه
انا: باهي رني عليه
اسيل: لالا كان يبيني راه رن عليا هو
انا: خلاص ياسولي تزعليش روحك والله تو يكلمك ويجي يخطبك رياض يحبك ويموت فيك
اسيل: ماهو هذا الي محيرني انا ان هو يحبني ليش يدير هكي يثبتلي اقل شي حبا ويخليه علني
خير مانقعدو هكي انكلم فيه وخايفه ولما نتقابل امعاه نقعد خايفه
انا: (نبي نحكي للأسيل ويرن موبايلي)
اسيل: من
انا: سيييف . الووو
سيف: (صوتا رقيلا ) تي وين اختفيتي انتي ومن شاب هذا الي تعرفيه
انا: كنك تعيط
سيف: ها كيف تبيني نحكي امعاك كنتي في محل وفجأه تطلعي هكي ودزيلي مسج تقوليلي شاب الي خش نعرفا كيف تبيني نحكي يانوووور
انا: به وطي صوتك واحكي بأدب تو نقولك
سيف: نووووور متعصبينيش وينك انتي تو
انا:( خفت لان عيط اعياط ) في محل دبش الي جنب المطحنه
سيف: اوكي وسكر عليا
اسيل: كنا
انا: مش عارف بس رقيلا بكل شكلا
وقعدت ع اعصابي ونرجا في سيف وخايفه مش عارفه ليش خفت
شهد: اوني سمحه لبلوزه هذي
انا: اه سمحه
شهد: باهي شن رايك في لون هذا ولاهذا
انا: اي واحد خوذي سماح هنا الاثنين
ونحكي مع شهد ونفكر ومش معها بكل
طبعا كنا في محل ع دورين ونحنا كنا في دور الي فوق وكان مافيش الا نحنا في محل وصاحب المحل مقعمز لوطا ونحنا يبرمن البنات ويخترن للشهد وتخش اتقيسلنا
