SA PAGHIHINTAY
Sa paghihintay ko sa loob ng jeep
Palihim kong sinusulyapan ang aking mga katabi
Pilit hinahanap sa mga hanay ang taong matagal ko nang hinihintay
Mainit sa loob ng jeep –
Siksikan ang mga katawang hapo sa buong araw
Sagsag sa balat ang mainit na hininga ng katabi
Nakakabwisit ang ingay ng katapat
Nakakahirin ang mga busina ng ibang sasakyan
Nakakaburyong ang pinaghalo-halong ingay
Masakit sa ilong ang pinagsama-samang usok, alikabok at putok
Hanggang kailan pa kaya ang aking pagdurusa?
Hanggang kailan pa ako maghihintay?
Matiyaga kong tinitigan ang aking mga kasama
Mabilis kong tinipa ang kanilang mga itsura
Hinahanap ko kasi ang taong hinihintay ko
Baka kako isa sa mga ito
Hinahanap ko ang taong
may aura ng isang pasikat na araw
may kakayahang paulanin ang paligid ng mga talulut ng rosas
may ganang mapahinto ang oras
may kapangyarihang patigilin at ariin ang tibok ng aking puso
Hinahanap ko siya –
Sa loob man ng jeep o sa labas nito
Na sa pagitan ng mga siwang sa loob ng sasakyan
O sa dagat man ng mga tao
Matiyaga ko siyang hinihintay
Hinahanap
Inaabangan
Inaantabayanan
Pinapangarap
Ah! Baka nagkasalisi kami...sayang!
BINABASA MO ANG
Spirito ng Kape
PoetryKalipunan ng mga tula at prosa na hinugot mula sa ulong lango sa spirito ng kapeng nilamig.
