( سلسلة البيوت اسرار) الجزء الأول بعنوان الحب والغفران

الفصل الأول

#الحب_والغفران
الفصل الاول

كل يوم وقت النوم كيف العادة
تنزل ادموعي مالية الوسادة
كل يوم كيف امبارح
كل يوم دمعي فوق خدي سارح
كل يوم نفس الجرح نفس الجارح
كل يوم شوك افراش نومي طارح
نار رقت ماعاد الها خمادة
كل يوم نفس العبرة
كل يوم نفس الصوت نفس النبرة
كل يوم نفس الدموع ونفس هالوسادة
كل يوم انقول غدوه يبرا
ترجع جديدة بدت غير اعادة
         .......................

عزيز بعصبية .. شنو سمعيني كويس
انا بصوت يرعش .. اطلقت
عزيز وجاء شدني من شعري .. اطلقتي ومن قال ان نحن عندنا بنات يطلقو
انا بخوف .. ماتشوفش في ايدي المجبسة خلاص معاش قادرة نتحمل
عزيز وهو يخبط في راسي بالساس .. تتحملي غصبن عنك بتجيبي لنا العار ياكلبة الكلبات (حشاكم) هذا ماناقصنا
امي تمشي على عكوزها .. حرام عليك يا ولدي سيب اختك
عثمان .. خليه يربيها شكلك انتي وباتي ماعرفتو تربوها بتجيب لنا العار ماناقصنا غير تقعد مطلقة في حوشنا
انا وبدم ينزل على جبيني ورفيس في بطني وظهري بعد ماعزقني على الوطا .. والله مادرت العار هو ديمة يضرب فيا والله مادرت العار والله مادرت حاجة
عثمان وانضم لعزيز في ضربي .. شنو مادرتي شئ جايتينا مطلقة وتقولي مادرتي شئ
انا ببكاء ومعاش حاسة بحاجة من كثرت الضرب .. والله مادرت حاجة والله مادرت حاجة
امي .. حرام عليكم اختكم بتقتلوها
عثمان  .. خلينا نقتلوها بالك نفتكو منها ومن عارها والله ترجع ليه غصبن عنها
انا ببكاء وبصوت مبحوح .. اقتلوني افضل ولانرجع ليه
عزيز وهو يدلف فيا بكل قوته تقول راجل زيه وتعدى على شرفه .. خلاص امنا الشارع هو اللي يناسبك
انا ببكا.. حرام عليكم بتعزق اختك
عطية .. ومن قالك انك اختنا باتي جابك وقال انك بنته من مرا ثانية لكن ماتشبهي لينا في حاجة لا في شكل ولا فصيلة دمك زينا اكيد انتي بنت حرام تسحابينا مش حيجي وقت ونعلمو
عثمان وقف على ضربي .. شنو تقول انت
عطية .. زي مانقولك تلاقيت انا وصاحب باتي الله يرحمه سليمان وحكالي على اساس يسحابنا نعلمو ان باتي لما تزوج مرته الثانية كان عندها بنت عمرها شهرين
عزيز رفعني من شعري وكرني لباب الحوش بدون اي رحمة  ولا شفقة وعزقني ودفل عليا .. معاش تلزمينا طالما نحن مانعرفو اصلك منين يبقى انسب مكان ليك الشارع

وسكر الباب وخش ونا حاولت نصبي ماقدرتش قعدت متلوحة في الشارع رغم ان في جيران شافوني لما عزقني لكن ماحد عدل ولا كأني بني ادمة ملوحة بدمي  وشوي طلع ولد جيرانا من حوشهم فطن بيا جاني يجري
فارس .. زهرة زهرة تسمعي فيا
انا بصوت واطي ويرعش .. نسمع فيك
فارس .. حاولي تصبي يازهرة نكلم امي ونرفعك للمستشفى
انا ببكاء.. مش قادرة يا فارس كلملي عمتي عافية تساعدني
فارس بخوف .. باهي به
وعدى فارس يكلم في امه وجتني تجري وتلف في محرمتها على راسها
عافية .. كنك يابنتي منو اللي دار فيك هكي
فارس .. امي مش وقت سؤال تو حاولي تصبيها نين نقرب السيارة
عافية .. هيا يابنتي ساعدي روحك
وبشوي شوي ومساعدة عمتي عافية قدرت نصبي وركبوني للسيارة وعدت عمتي عافية لبست عبايتها وجابتلي وشاح حطاته على راسي وضمتني ليها ورغم ان ضمتها وجعتني بسبب جسمي المدقدق لكن كنت محتاجة ليها وقعدت نبكي وبس
عافية .. من اللي دار فيك هكي
انا ببكاء .. خوتي ضربوني وعزقوني في الشارع بعد ما قلت ليهم اطلقت
عافية .. وليش يابنتي اطلقتي
انا.. عييت يا عمتي تعبت واجد جيتهم وايدي مجبسة ولاهمهم يا عمتي وضربوني بدون رحمة
فارس .. حسبي الله ونعم الوكيل تي وينه الجبس تهو مفتفت من كثرت الضرب
عافية .. معقولة عزقوك في الشارع هكي
انا ببكاء .. عطية قاللهم اني مش اختهم وان بابا لما تزوج ماما كنت عندها وعمري شهرين
فارس.. لاحول ولاقوة الا بالله كنهدا يديرو فيك هكي
عافية .. ومن امتى كانو حَنان عليها ديمة يضربو فيها وحارمينها من كل حاجة حتى قراية ماكملت ولولا دورة التمريض كنهدا مالقت حتى بيش تصرف على روحها
فارس .. وعمتي خديجة من هضا كله وين
عافية بتنهيدة .. عمتك خديجة مرا كبيرة ومشكلة كراعها خلتها تكبر قبل وقتها وتعتبر عاجزة لاحول لها ولاقوة