( سلسلة البيوت اسرار) الجزء الأول بعنوان الحب والغفران

الفصل الثامن

#الحب_والغفران
الفصل الثامن

سادك تنهيد ونقطة دير وابدا من جديد.. يا قلب واجد سادك تنهيد
ياقلب لا تتكدر
واطلب الله همك بعيد يودر
ياقلب هلي صار بابه سكر
واجد احمول العذاب شلته كيد لا يشغلك من غاب
لاتحسر .. مامن اللي طارت وهي في الايد
اقعد مع روحك شوي وفكر
اذكر بكاك وحدك يوم العيد
ياقلب واجد سادك تنهيد .. نقطة دير وابدا من جديد
           .............
انا بصدمة .. بسببي نا عليش
وليد.. كنك انصدمتي
انابضيق.. كيف ماتبينيش ننصدم وانت تقولي ان عيلتين ديمة مجتمعين وتفارقتو بسببي
وليد بهدوء .. اهدي بس اولا من قال ان تفارقنا نحن مستحيل ربي يفرق بينا وثانيا من قال ان مانجتمعوش صح نحن مانجوش للحوش لكن يام ووسام والبنات ديمة يجو عندنا وبسببك نحن مانجوش اولا نحن فاهمين الحكاية كلها
انا باستفهام .. حكاية شنو
وليد.. حكاية طلاقك واللي داروه فيك خوتك صح لا وسام ولا يام  ولا البنات ماحد فيهم قال ان خوتك طلعو مش خوتك لكن قالو لنا انهم تبرو منك عشان اطلقتي بس لانهم مايقدروش يقولو لنا زي ماقالو للجيران انك قريبة يام من بعيد لان نحن نعرفو اقارب يام كلهم بالذات وامي بنت عمها عظم رقبة 
انا.. والله وما زعلنيش انهم قاللولكم وحتى لو قالو لكم اني حاليا بلا هل واني مش عارفة اصلي ولافصلي لان هذي حقيقيتي لكن اللي مزعلني اني نا السبب في انكم معاش تجو لحوش عمكم اللي كبرتو فيه بسببي
وليد.. مش هكي الحكاية
الحكاية هيا اننا نحن جونا فستري بكل ومش متعودين على التقيد حتى رجالة ايناس واريج اضايقو في البداية لكن بعدين خدو على الوضع لان في الاخير هنا بنات عمي لكن انتي غير مانندروش عليك طبعك شنو ومرات بدون مانقصدو انضايقوك وانتي اللي فيك سادك لان نحن بس نشوفو كيف خوت يجيهم قلب يتبرو من اختهم عشان اطلقت حاجة واعرة وكأن الطلاق جريمة لازم تتعاقب عليها تصدقي وتأمني بالله
انا.. لا اله الا الله
وليد.. تخيلي زياد وامي قالو لو توافق نتبنوها نحن على اسم باتي لو خوتك يتبرو منك رسمي وتقعدي من عيلتنا ولينا الشرف انك تكوني اختنا بالذات يام  وهي تشكر في حسن اخلاقك ونحن عندنا ثقة كبيرة بحكم يام على الناس
انا بعيون مرقرقات .. بارك الله فيكم ... انتم اللي ماتعرفونيش ومن حكي عميمة بس عليا تميتو تبو تخلوني اختكم واللي كبرت معاهم وزعميتهم هم اللي ربوني تبرو مني حتى لو مكنتش اختهم معقولة تهون عليهم العشرة وتصدق اكثر حاجة قاهرتني هو عطية
وليد.. ليش
انا.. لان عطية كان الصغير في خوتي وماكنوش يعطو فيه فلوس واجد ولما كنت نشتغل وناخذ في راتبي بتاع المصحة كنت نقسم فيه بالنص عليه طلع اكثر واحد مسموم فيهم صح عمره مامد ايده عليا اللي كانو يضربو فيا ديمة عزيز وعثمان لكن عطية عمره ما حز عليا ولا عمره مد ايده عليا
وليد.. مازالتي تقولي خوتي
انا.. صعب نتغير بسهولة وبالذات ونا مش عارفة هلي الفعليين حيتقبلوني او لا واذا عندي خوت وخوات او لا
وليد .. ان شاءالله تلقيهم وحيحبوك معقولة انتي ماتنحبيش
انا.. تسلم يارب ...حي على الوقت الحق عدى ماحسيت بيه تو عميمة تنشغل عليا هي سلام
وليد .. سلام
انا.. وليد ماتقولش على اني ماعنديش هل على الاقل نين نلقاهم خلي اهلك وخوتك فاهمين ان خوتي تبرو مني وعزقوني عشان اطلقت بس
وليد بحب.. كوني هانية وديري في بالك لو هلك الاصليين مابوش يقبلوك نحن عندنا استعداد نقبلوك معانا
انا .. تسلم يارب