#الحب_والغفران
الفصل الثالث
فترة زعل وتفوت
ماعمر والي مالفراق ايموت
سيورها فترة زعل وتفوت
يبرا حالي
وسيور نبني من جديد امالي
ولو غاب مني صوت كاين غالي
نلقى بديل الصوت مية صوت
.............................
انا.. لا مش بنرد ليه
وسام .. امنا شنو
انا.. عادل يعتبر طليقي لكن يقدر يردني له في اي وقت طالما شهور العدة مافاتوش حتى بدون شيخ
وسام .. مافهمتش
انا.. شهور العدة ربي ليش دارهن للولية المطلقة
وسام .. عشان يعرفو اذا في حمل او لا
انا.. يادكتور يافالح ماهو الحمل ينعرف من اول حتى عشر ايام مش مستحق الموضوع لثلاث شهور
وسام .. به ليش ربي دارهن يافكيكة زمانك
انا.. ربي قال في كتابه (يا ايها النبي اذا طلقتم النساء فطلقوهن لعدتهن واحصوا العدة واتقوا الله ربكم ولا تخرجوهن من بيوتهن ولا يخرجن الا ان يأتين بفاحشة مبينة وتلك حدود الله ومن يتعد حدود الله فقد ظلم نفسه ولاتدري لعل الله يحدث بعد ذلك امرا)
وسام .. صدق الله العظيم
انا.. هو بحيث ان الولية لما تطلق الاولى او الثانية اللي هو الطلاق الرجعي ماتطلعش من حوشها الا بعد تمام الثلاث شهور لو ماردهاش ورجعها على ذمته
وسام .. كيف مطلقها وماتطلعش من حوشها
انا.. وسع بالك واسمعني زين لما تطلق اول مرة احيانا يكون السبب لحظة غضب او تعصب بدون تفكير ويندم بعدها فطبعا نحن شنو انديرو انلمو دبشنا ونمشو لحوش هلنا
وسام .. هذا الصح
انا.. لا هذا المتعارف عليه
الصح انها تقعد في حوشها وتعيش مع راجلها زي قبل الا النوم مع بعض لا ويخلو مجال للصلح لو فاتو الثلاث شهور هو مارجعهاش او هي مبتش تقبل اسفه خلاص وقتها تروح لحوش اهلها او تقعد في حوشها اذا عندها عيال وهو يطلع
وسام .. وين الحكمة في الكلام
انا.. ربي يعطي في فرصة للنفوس انها تروق بدون وجع او كلام زايد لان بمجرد مايرمي عليها اليمين في لحظة غضب وتلم دبشها وتمشي لحوش اهلها هضاك الوقت يكبر الموضوع اكثر من اللازم ويدخلو عيت حنة يولعنها بدل مايطفنها وبدل ماكانو ثاني والله ثالث يوم متراضين وكان طولت بكل اسبوع بمجرد مروحاتها لهلها توصل حتى لستة شهور ومرات اكثر
وسام .. ونعم بالله ليه حكمة في كل شئ ومافي شئ فرض الا لسبب
انا .. ومعاها اذا ردت ليه تكون في ضغينة تمت بين هلها وراجلها بسبب الموضوع اللي صار لان من بتجيه اخته او بنته مطلقة وبيسكت مايفتحش فمه على الراجل
وسام بحزن ..ماهو انتي خوتك اكبر دليل ردت فعلهم فيك انتي مش في طليقك
انا.. خوتي مش زي
خوتي تفكيرهم كله كان في الفايدة اللي بتنتهي بسبب الطلاق من عادل
وسام .. يعني مع هضا كله مافهمتش بتردي لعادل
انا.. لا لكن بنتصل بيه على الاقل الثلاث شهور هذين يجي يدبرلي في سكن نين نرتب اموري
وسام .. بتسكني بروحك
انا بتنهيدة .. والله تاعبة يا وسام وانت تزيد عليا امنا فيش كنت نشرح ليك على شهور العدة
وسام .. انا دكتور مش شيخ قالولاك عليا فهميني بيش نسيبك
انا.. بنكلم عادل يدورلي سكن مؤقت ويسكن معاي لانه مازال مش محرم عليا طالما الثلاث شهور ماتموش نين نرتب اموري ونشوف كيف نوصل في صاحب بابا الله يرحمه اللي قال لخوتي اني مش بنته
وسام .. وعادل عادي حيصبي معاك
انا بثقة .. ايه ومستحيل يخليني نين دايرلي حل
وسام .. عجيب امره هالعادل
هيا نخليك تو شوي وتجيك الممرضة تعطيك ابرة مسكن ثانية عشان ترقدي مرتاحة
انا.. وسام
وسام .. نعم زهرة
انا.. شكرا ليك لانك سمعتني لان ربي وحده اللي يعلم اني كنت محتاجة نحكي وانت بكل رحابة صدر سمعتني
وسام .. انا خوك ياهبلة وبعدين مش عادل بس اللي بيدورلك على حل حتى انا بنفكر في حل كوني هانية بس وكل حاجة تنحل باذن الله
انا.. ربي يحفظك يارب
وطلع وسام وجتني الممرضة وعطتني ابرة وشوي ولقيت روحي راقدة
أنت تقرأ
( سلسلة البيوت اسرار) الجزء الأول بعنوان الحب والغفران
Fanfiction#سلسلة_البيوت_اسرار وهي عبارة عن قصص منفصلة متصلة يعني كل جزء قصة مختلفة وابطال مختلفين ممكن يظهرو ابطال الجزء الاول كضيوف او مجرد ذكرهم في الجزء الثاني وممكن ابطال الجزء الثاني موجودين في الجزء الاول دوختكم صح 😊😉 فتابعونا وانتظروا الجزء الاول #ال...
