#الحب_والغفران
الفصل العاشر
لاتلوم ولاتندم علي مكتوب
ما يحاسبك ربي الا بذنوبك
لاتقول انا مظلوم
ولاتقول عشت في دنيتي محروم
وياخوي خيرك عالنصيب تلوم
بلومك تبين للعباد عيوبك
وراهي حياتك يوم لاحق يوم
وانت اخترت تعيشها باسلوبك
.....................
انا بصدمة .. شنو
لحظة حسيت فعلا اني بروحي للحظة حسيت قديش نا وحيدة للحظة حسيت بالخذلان للحظة حسيت بالاحتياج ليش يارب كل مانقول الدنيا تضحكلي ترد وتبكيني بجد وشديت عبرتي بالغصب
انا.. ليش
وليد.. زهورة نحن نحبوك ومستحيل نسيبوك هذي كوني واثقة ومتاكدة منها
بس ليش مانبوش تقعدي في حوش عمي لفترة جياب اريج بس لعدة اسباب اولا يام بتنحط في موقف سخيف انها بتطر تكذب بسببك وشنو العلاقة بينك وبينها وهيا مراة حاجة بيت الله
وثانيا لو رقعنا وجودك باي حجة بعد ماينعرفو اهلك من كيف برضو بنرقعو كلامنا اللي قالته يام في الاول
وثالثا حاليا وكلنا وقصدي بكلنا من حسام ويام ووسام وامي وزياد ورائد ووائل وايناس واريج منبوش حد يجرحك حتى بكلمة ونحن عيلتنا مش كلها زينا راه والله عندك بنات عمتي رحمة الله لاتروعك دايرات روحهن متحضرات وهنا ولا وحدة خطم شورهن التحضر
انا بعد مافهمت قصدهم وحسيت براحة وانهم مش كارهين وجودي .. وليد صح انتم عمركم ماحكيتو على اقاربكم لدرجة نسحاب انكم انتم الاثنين بس عمي رمضان وعمي عمر
وليد.. عمامي بباتي 3 وعماتي اثنين عمي محمد توفى الله يرحمه ونا مازالت ماجيت بكل وهو الكبير وبعدها عمي رمضان وبعدها عمتي رحمة وبعدها باتي وبعدها عمتي حليمة
انا.. بس عماتك عمري ماشفتهم جو زروكم اهو قديش ليا ساكنة مع وسام وعميمة حواء ماشفت وحدة منهن
وليد.. بالنسبة لعمتي رحمة كانت تبي حسامي ياخذ وحدة من بناتها وجت قالتها عيني عينك لكن حسام ماعدلش عليها وفاتها وتزوج اللي ماتسمى وبعدها تمت ترسم علينا وفتناها حتى نحن فقررت منها ليها انها تقاطعنا وتخلي علاقتها بينا رسمي بس الا طبعا المناسبات تجي وتقعد هيا وبناتها بالك يحصلن فرصة معانا
انا.. لاحول ولاقوة الا بالله هيا الخسرانة وبه عمتك حليمة
وليد.. ياستي عمتي حليمة هذي قصتها قصة متزوجة راجل الله يعينها عليه بسببه خلاها تقابل باتي رمضان في المحاكم على خاطر حصتها من ورث جدي اللي طلع في الاخير عاطيه ليهن في حياة عينه
انا.. غريبة
وليد.. جدي على وعارته وصعوبة تفكيره زي ماتحكي امي ويام وحسامي وزياد ووسام لانهم اللي عاشو ولحقو عليه الا انه كان حقاني بدرجة كبيرة وعطى عماتي حقهن في حياة عينه بشرع ربي عشان قال هنا عند رجالة برانية علينا وعشان مايصيرش مشاكل بينهن وبين عزوتهن اللي هما خوتهن بسبب الورث لكن اللي كان خايف منه جدي الله يرحمه صار
انا.. بس عمتك ماعليها ملام طالما عارفين ان راجلها السبب
وليد.. اكيد ماحد يلوم فيها لكن راجلها منعها من زيارتنا الا في الحاجة الكبيرة وكان جابها هيا ساعة ويجي يروح بيها بالذات بعد ماخسرت القضية
انا.. ربي يفرج عليها يارب
وليد.. فهمتي زهورة تو ليش مانبكوش تحضري طبعا نا ذكرت ليك عمتي رحمة لانها تجي وتقعد في قعدة سمحة دارتها لما جابت ايناس وعلى امل انها تلفت انتباه واحد منا لبناتها
انا.. كم بنت عندها هيا اللي واحلة فيهن هالوحلة هذي
وليد .. اربعة بس هيا مش واحلة فيهن هما ديمة نسمعو بعرسان جايين لبناتها لكن هيا تبينا نحن عشان ماديتنا كويسة وعلى قولتها نحن اولى ببناتها
انا.. اه صار مش محبة
وليد .. ابدا
انا.. بس غريبة بكل ان انتم ضنا الرجالة متفقين ومتفاهمين وربي يحرسكم من العين لكن البنات هما اللي على خلاف وبعد عليكم
وليد.. بيش تعرفي ان عيلتنا مش مثالية
انا.. فهمت وليد ولايهمك حنشد حوشي منطلعش منه
وليد.. لا زهورة مش حتقعدي في حوشك
انا.. وين بنقعد امنا
وليد .. في حوشنا
انا باستغراب .. كيف
وليد.. نحن كلنا نمشو نقعدو عند يام لما تجيب اريج لان في ايناس درنا هكي ولو تو مادرناش هكي الكل بيستغرب
انا.. بس بنقعد بروحي
وليد.. لا مش حتقعدي بروحك حتكون الشغالة معاك والڤيلا فيها حارس يعني حتكوني في امان ونحن مش حنضايقوك بكل
انا.. خلاص تمام
وليد.. هيا امنا روحي وهذين المحاضرات اللي فاتنك كلهن وفي كتاب تو نجيب منه ليك ولي
انا.. تسلم يارب نعني مانفقدك
وليد.. وتو الدور عليك
انا.. في شنو
وليد.. في تسجيل المحاضرات لي لان بعد ما اريج تطلع من المصحة بنغيب ثلاثة ايام
انا.. اه تمام انت تأمر
أنت تقرأ
( سلسلة البيوت اسرار) الجزء الأول بعنوان الحب والغفران
Fanfiction#سلسلة_البيوت_اسرار وهي عبارة عن قصص منفصلة متصلة يعني كل جزء قصة مختلفة وابطال مختلفين ممكن يظهرو ابطال الجزء الاول كضيوف او مجرد ذكرهم في الجزء الثاني وممكن ابطال الجزء الثاني موجودين في الجزء الاول دوختكم صح 😊😉 فتابعونا وانتظروا الجزء الاول #ال...
