#الحب_والغفران
الفصل السادس عشر
نشريك يا راحة البال
لو ليك في السوق تاجر
وعلى خاطرك ندفع المال
وانفضي ارفوف المتاجر
..............
حسام بصدمة .. اه
زياد.. كنك زهرة هيا اللي طلعت اختنا
وسام وجاء قربني من حسام .. زهرة عمر عبدالجواد بنت عمنا الله يرحمه
حسام ومازال تحت تأثير الصدمة .. اهلين بيك
زياد بضحكة .. هضا اللي ربي قدرك عليه اهلين بيك
وسام .. شنو امنا تبيه ياخذها في الاحضان
زياد بغيرة.. لا مش لهدرجة بس مش اهلين بيك
وليد.. كنكم مع حسامي راه مازال مصدوم راعوه شوي
حسام .. فعلا مازلت مصدوم نورتي عيلتنا زهرة
انا بصوت واطي .. منورة بيك
على طلعت ايناس واريج وبنات رحمة وبنت حليمة يسلمن على حسام ولفت انتباهي بنت من بنات رحمة اسمها جيداء لبسها يختلف على خواتها تحسيها محترمة وهادية وحتى سلامها على الشباب ديمة باحترام اما الاخرات حدث ولاحرج مكياج صارخ وسروايل قصيرة ظابطة وعليهن بلوزات قصار وخلخال في الرجل وشعر مطلوق ولفت انتباهي نظرات وسام شورهن لكن ماعرفتش اي وحدة منهن وطبعا عدت الليلة وباتن بنات عمتي رحمة وطبعا ماخلصنش ماما عفاف ويام من كلام عمتي رحمة اللي يقهر
رحمة .. اهناك واحد يدور على من يقاسمهم في ورثهم
حواء.. اهو قلتيها بروحك ورثهم
رحمة .. انا قلت حاجة
عفاف بعصبية .. اسمعي يا رحمة اولا عيالي عمرهم مايرضو انهم ياكلو فلوس حرام باتهم رغم انه مات وهما صغار لكن عمهم رباهم صح وكان على حق زهرة حتى لو ماطلعتش فحقها محفوظ رغم ان بنتنا مستحيل اطالب بحقها لان خوتها مافصولش على بعضهم وطول عمرهم ايد وحدة
رحمة .. وشنو عرفك انها ما اطالبش بحقها
حواء.. لانها تبي خوتها ماتبيش فلوسها
رحمة .. بسـ
عفاف.. لابس لا سو رحمة انت بنت عمنا ومحترمينك لانك الكبيرة لكن فتنة وتجاوز حدود مش حنسمحولك واه قبل ماننسى زهرة بنتي حتى وماضنيتنهاش خط احمر ماتفكريش اضريها حتى بكلمة
زياد.. امي زهرة وين
عفاف .. في دار الضيوف مع البنات
زياد.. ناديها ليا
حواء.. كنها في حاجة
زياد.. لا غير حسام يبيها امبدري كان مصدوم ما هدرزش معاها
عفاف .. تو نكلمها
وجت ماما كلمتني وطلعت للزياد وكنت مغيرة دبشي ولابسة توتة سرواله ضابط لكن ماليتها طويلة لتحت الركبة ولامة شعري لاني مازالت مانيش راقدة
زياد.. زهورة البسي محرمة وتعالي
انا.. حاضر
خشيت خذيت وشاح لفيته على راسي وطلعت
انا.. ان شاءالله خير
زياد.. خير يا قلبي غير حسام بيسلم عليك كويس امبدري من الصدمة ما رحبش بيك مزبوط
انا بتوتر .. مش هو سلم عليا امبدري
زياد بضحكة .. كنك توتري زهورة حسام هضا كبيرنا عمر وقدر ونحن مانمشوش الا بشوره مايغركش الرجالة الكبار اللي سلمتي عليهم راه غير اسم كبار لما توفى عمي رمضان كلهم ماعاد عبرونا راه ولما وقفنا على رجلينا تمينا مهمين عندهم لكن نحن تمو معاش يفرقو عندنا
انا..عليش ماهو لما توفى عمي رمضان مش كانت الحالة المادية كويسة
زياد.. اه لكن توقعو انا نحن مستهترين وحنضيعو الرزق في وقت قصير لكن مايسحبوش ان ورانا حسام بدل مانضيعو التمينا اكثر وقوينا بزيادة
انا باستغراب .. كيف حسام وشن له علاقة بالتجارة وهو دكتور
زياد .. حسام عنده دماغ ماشاءالله احيانا نقول حرام يحصره بالطب لكن لما تفوق وخش على الاورام وتما دكتور شاطر فيهن عرفت ان الدماغ هضا في مكانه
انا.. بس كيف قوى التجارة
زياد.. وزعنا كلا على حسب ميوله وخلانا تحت قيادة وحدة اللي هيا نا رغم اعترضت في البداية لان الحمل كبير لكن لان خوتي معاي ماحسيتش بكبر الحمل وكنا ديمة نخلو في حسبة لخونا او اختنا من كل شئ
انا.. كيف
زياد.. اصلا تو جاء وقت الكلام هضا زهورة انتي نصيبك في ورث باتي في الحفظ والصون كنا كل مانقسمو نحطو في حساب ذكر على جنب بشرع ربي اذا تبيه موجود
انا.. زياد انا نبيكم انتم مانبيش فلوس ولا ورث ولاهدايا انتم بس كفايتي والله
زياد.. بس هذا حقك
انا.. انتم قسمتو الورث بينكم
زياد.. لا ماقسمناش ولاعمرنا فكرنا في القسمة لان كل واحد فينا ياخذ في حقه من كل تجرة او صفقة بالعدل
انا.. خلاص امنا ليش تسئل فيا اذا نبي ورثي
زياد.. ماهو.......
انا.. مافيش ماهو يا خوي زيي زيكم في كل ما ادير وحتى كان ماتبو تعطوني شئ مسامحة والله يكفيني انكم انتم حذاي انا نبي حب واهتمام مش فلوس
زياد.. ربي يحفظك لينا
وليد.. وينكم لتو حسام من بدري يستنى
زياد بضحكة .. نسيته بكل... هيا زهورة
أنت تقرأ
( سلسلة البيوت اسرار) الجزء الأول بعنوان الحب والغفران
Fanfiction#سلسلة_البيوت_اسرار وهي عبارة عن قصص منفصلة متصلة يعني كل جزء قصة مختلفة وابطال مختلفين ممكن يظهرو ابطال الجزء الاول كضيوف او مجرد ذكرهم في الجزء الثاني وممكن ابطال الجزء الثاني موجودين في الجزء الاول دوختكم صح 😊😉 فتابعونا وانتظروا الجزء الاول #ال...
