( سلسلة البيوت اسرار) الجزء الأول بعنوان الحب والغفران

الفصل السابع عشر

#الحب_والغفران
الفصل السابع عشر

ما انريد منك شي غير موده
ياللي هنا قلبي امغير معاك
كل شي منك يا عزيز ايسده
لكن طمع قلبي ايريد رضاك
موش مشكلة حتى انكان اجده
قلبي وعندك حاكمة بهواك
لو كان نقدر يا عزيز انعده
غلاك بعدد لنجوم شوف سماك
        ..................

وليد بصدمة .. شنو
حسام بهدوء.. زهرة يا وليد كنك
وليد بفرحة .. والله صح حب عمرك اختي نا الله قديش نا فرحان انه ماياخذهاش حد غريب الحمدلله ليك يارب
حسام .. فرحان يا وليد
وليد.. واجد تصدق لو قلت ليك تمنيتها ليك بدون مانعرف انها اختي ولما عرفت انها اختي قديش اضايقت لاني عارفك تحب غيرها وماتوقعتش تكون هيا
حسام .. هيا وانت ساعدتني في البداية بانك حكيت ليها شنو صارلي مع سراج
وليد بحزن .. بس انت وجعتها وتحملت عذاب واجد بسببك ماتتخيلش قديش هي ضعيفة وهشة بسبب اللي مرت فيه
حسام بتنهيدة .. عارف والله عارف ونبي مساعدتك ومساعدة الشباب انها تسامحني
وليد.. من ناحيتي معاك ... بس بتحكي لهم كلهم والله خوتي بس
حسام .. مش عارف
وليد.. تسمع نصيحتي خلي الموضوع بينا نحن والنسابة خليهم برا الموضوع لانهم مايعلموش بالتفصيل زهرة بشنو مرت
حسام .. عندك حق به هيا نطلعو تو عشان في حاجة بنقولها وعادي قدام النسابة
وليد.. هيا

ونزل وليد وحسام وانظمو للشباب وقاللهم زياد ان معتصم وفهد خذو نسوانهم وطلعو لان كل واحد فيهم متعود يتغذا عند هله  

حسام .. امبارح وسام سئلني بحكم معرفتي بزهرة شنو كان خاطرها ونا قلت نقوللكم كلكم وقبل كل شئ خلونا نحكو في موضوعين مهمين
زياد.. ان شاءالله خير
حسام .. خير باذن الله ... انتم عارفين اني سيبت امريكا نهائي وبعتت اوراقي للمستشفى هنا وقبلوني عشان تخصصي نادر هنا وفكرت بان نحن في العيلة اثنين دكاترة وان شاءالله بعد خمس سنوات حنكونو اربع دكاترة فقلت ليش مانفتحوش مصحة ونشتغلو فيها بدل انا ووسام نشتغلو في رزق غيرنا طبعا اذا في ميزانية
زياد.. فكرة مشروع سمحة وناجحة اخرى
وسام .. ونقدرو نشغلو معانا دكاترة ممتازين غير مش لاقين فرصتهم
حسام .. شنو رائد ووائل ووليد ماقلتوش رايكم
رائد.. هذي ماتبيش راي
وائل.. نحن بعدكم مافيش كلام
وليد.. الراي رايكم والشور شوركم وبعدين حد يكره يتخرج يلقى عمله جاهز
حسام ..ها يا زياد في ميزانية للمشروع هضا
زياد بثقة .. واثنين زيه بيت السبع مايخلاش من العظام
حسام .. تم معناها بكرة باذن الله تعالى تكون دارسة الجدوى عندك
وسام .. مجهز كل حاجة
رائد .. من عاشر قوما اربعين يوما صار منهم لابال ليه معاهم خمس سنين
وائل.. فعلا الاجانب عمليين واجد
حسام .. لكن حياتهم باردة مافيهاش الدفا اللي عندنا ولمة العيلة الا من رحم ربي
وسام .. به الموضوع الثاني
حسام بتردد.. انا كنت الدكتور اللي قالت زهرة لكم عليه انها مرتبطة بيه  قبل ماتتزوج
زياد و رائد و وائل بصدمة .. شنو
حسام .. غير اسمعوني
زياد حاول يكون هادي .. عادي يا حسام اللي فات مات
حسام بعصبية .. لا ماماتش لان هذي حبي ونبض قلبي ونصي الضايع اللي ندور فيه في كل جية ليا هذي النفس اللي اخيرا رجع ليا لا ماماتش ولولا لعبة حقيرة من كنت نسحابه رفيقي راهي مرتي وام عيالي تو
زياد.. تحكي بجد حسام انك تبيها مازلت حتى بعد ماتمت مطلقة
حسام .. ماهو نا مطلق والله في فرق بين الراجل والمرا
رائد .. لا مافيش فرق لكن عقول بعض الرجال هيا اللي دايرة فرق
حسام بحب .. والله نبيها ولو كانت متزوجة عشرة ومطلقة منهم  وعندها قبيلة عيال نبيها والله
زياد.. تحبها لهدرجة
حسام .. ماتتخيلش قديش كرهت حياتي والندم ياكل فيا اني صدقت رفيق عمري وكذبت رباية ايدي
وائل باستغراب .. كيف رباية ايدك احكيلنا حسام خاطرنا نعرفو كل حاجة على زهرة
حسام .. زهرة كانت زي الحاجة الخام اللي ماتعرف شئ في الدنيا ومافيش زيها 
وليد.. كيف
حسام .. ابسط شئ تخيلو مزيل العرق ماكنتش تعرفه لانه امها اللي ربتها ماكنتش تعرفه
زياد بشك .. وكيف عرفتها انها ماتعرفاش
حسام .. من كثر ماتخش للحمام بعد بذل مجهود كانت ديمة تغسل في روحها لانها ماعندهاش ثقة في المسك اللي كانت ادير فيه ولما جبته ليها لدرجة سئلتني كيف تستخدمه
وائل بوجع .. معقولة مكانش عندهم تلفزيون تتفرج عليه وتعرفه من الاعلانات
حسام .. كان عندهم لكن مانعينه عليها بحجة انه يفتح عيونها فهذا ليش حاجات واجد ماكنتش تعرفها حتى غسول الجسم ماتعرفش شنو هو الا لما نصحتها بيه دكتورة الجلدية عشان جتها حساسية من الصابون اللي تغسل بيه وجت تسئل فيا عليه
زياد بحزن .. به نحن تو نبو نعوضوها على كل اللي فات مع انه مكانش لينا فيه ذنب
حسام .. انا نقوللكم لكن نبي حتى نا مساعدة بيش تسامحني
زياد فرحان ان حسام يبيني ومازل يحبني ولانهم كانت عندهم ثقة فيه فما تخيلوش اللي داره فيا حسام شنو
زياد.. نساعدوك يا حسام ونا نلقى لاختي راجل خير منك وين
وسام .. هيا انطق نبو اي حاجة تسعد زهرة
حسام .. زهرة في قلبها طفلة انحرمت من حاجات واجد ماعاشتهنش اول حاجة ديمة خاطرها في درجيحة
وليد.. درجيحة
حسام .. اه درجيحة مرة حكتلي ان امها ركبت ليها درجيحة في سورهم وهي عمرها عشر سنين جاء عزيز قطعها قبل حتى ماتلعب بيها وقال مش كويسة لبنت وكسر فرحتها 
زياد.. هذي ساهلة من العشية نركبو ليها احلى درجيحة
وسام .. ونا انجيب ليها الكرسي اللي زي السلة يتعلق في الساس ويبقى درجيحة في جناحها اخرى
وائل بحزن .. لهدرجة اختنا كانت محرومة
حسام .. اكثر مما تتخيل وراهي تعتبر ما ارتحتش نين خذت راتب بيش قدرت تشري دبش وتاكل كويس والحاجات اللي خاطرها فيهن لكن هذين كلهن كانت عن طريق الفيس اللي كنت نفتح في حسابي ونوري فيها الحاجات بيش تختار منهن وكنت نحجز باسمي او على حساب الدكتورة غنى اذا كان التعامل نسائي و التوصيل كان ديمة للمصحة 
رائد.. لاحول ولاقوة الا بالله
زياد.. به شنو ثاني
حسام .. الملاهي وهذي شوري انتم عارفين ديمة نرفع في تسنيم للملاهي في كل جية حناخذها معاها
وسام .. به وشنو ثاني
حسام .. اهم حاجة خاطرها فيها بس مازال وقتها البحر
وليد.. صح قالتها ليا قالت حتى لما تزوجت طليقها مارفعهاش ليه ولا مرة على قد ماقالت ليه
زياد.. برضو هذي ساهلة
حسام .. وزهرة ديمة خاطرها الدهوير مش مشاوير السوق لا خاطرها زي الجنينات والزرادي لان ديمة لما يحكن الممرضات على زراديهن تلقاها مركزة معاهن وتتمنى تكون زيهن
وسام .. مزرعتنا قاعدة وهضا جو الربيع يا سلام
رائد .. وان شاءالله كل سفرة لواحد فينا يرفعها معاه
حسام .. ونا تو صبو معاي
وسام .. انت شنو بدير ونحن معاك
حسام .. نا بنبدا من بكرة بنطلب سماحها وانتم حاليا ديرو روحكم ماتعرفو شئ نين نوحل ادخلو
زياد.. تمام