#الحب_والغفران
الفصل السابع
جرحك وجرحي وجرح كل الناس
جروح فايقة من كثرة الوسواس
جروحنا ما اصعبها
جروح بيدينا ناويين عطبها
لو نفكرو ان ربنا حاسبها
ننسوا ونقرو سورة الاخلاص
...........................
انا بصدمة .. انت
وليد .. انتي ... كيف حالك بعد امس
وليد عمر عمره 25 سنة طول وعرض واضح انه يلعب في حديد بسبب تكوين جسمه واضح من شكله لبيس شعرته سودا محلقها على الموضة الجزء اللي في النص مرفوع بالجل والجانبين خفاف مع خط واضح في واحد من الجوانب زي تحليقة كرستاينو رونالدو داير لحية خفيفة وفيه نقرة الزين واضحة حتى من لحيته زايداته حلاوة عيون كبار واسعات لونهن زي لون قهويات ورموش طوال
انا .. بخير الحمدلله
وسام .. احم احم شنو تعرفو بعض امانا
وليد .. اهلين وسو
وسام .. تي عيب يا راجل قدامك دكتور جراح قلب مصنع منع تقول وسو
وليد بضحكة .. تعودت شنو بنديرلك
وسام .. ماجاوبتش تعرفو بعض
وليد .. امس خبطت فيا
وسام بضحكة كبيرة .. ههههههههههههه
وليد .. اسماله الكريم تي غير شنو قلنا نين تضحك هكي
وسام .. صار انت طلعت الحيط الستة في السطاش اللي خشت فيه زهرة
انا باحراج .. وسام
وليد بضحكة .. ولايهمك مفش داعي للاحراج متعود عليه
وسام .. اللي تشوفي فيه رغم انه اصغر خوته لكن اكبرهم حجم
وليد .. مش سادك خلينا نخشو في المهم طالما تبو تمشو لاجدابيا
طبعا وليد عرف لانه قالها له وسام
وسام .. يا سيدي الحكاية
وحكى له وسام شنو صار معاي امس بالزبط وبعد فترة دقايق وليد ساكت
وليد .. هضا ليش طولتي في السيارة وانتي تبكي قبل ماتطلعي
انا باحراج .. اه
وليد .. ولايهمك ماتعدلي على حد والطلاق ماهوش هالحاجة الحرام ومش معناها اذا وحدة والله اثنين والله حتى عشرة مطلقات مش مزبوطات معناها كل مطلقة هكي
انا .. بارك الله فيك
وليد .. عديني نا خوك هنا واي حاجة تبيها تعاليلي طول وخوذي رقمي من وسام عشان يسهل عليك التواصل معاي
انا .. بارك الله فيك ونا نتشرف يكون عندي خو زيك
وبعد ماسلمنا عليه طلعنا ونا نحس في قلبي يدق بقوة في حاجة في وليد مش عارفة شنو نحس في روحي كأني نعرفه واجد رغم اني عمري ماشفته وردينا للحوش ودخلت سيارتي للسور ولقينا عميمة مجهزة روحها واسقدنا لاجدابيا وطبعا ماشاءالله وسام رفع حاجات واجد معاه ولما عاركته لانه مباش ياخذ مني فلوس وقالي وقفت عادل معاي خلاته يكون في نظري راجل مافيش منه ومعاها اخرى قبوله ان يتعالج عشان مايظلمش وحدة اخرى معاه يدل على انه انسان كويس وبعد ساعة وشوي وصلنا للمستشفى وخشينا طول
انا ووسام وحواء .. السلام عليكم
عادل وعيسى .. وعليكم السلام
وسام .. حمدلله على السلامة هكي تفجعنا عليك ياراجل
عادل.. امره الله وصار
ووسام قعد يقرا في ملف عادل وعميمة تسهري مع عادل ونا ساكته مش عارفة شنو نحكي وانتبهو ليا اني ماقلتش حاجة وعيسى ووسام فهمو اني نبي نحكي مع عادل بروحي ونبي نعرف شنو يبيني
عيسى .. تعالي ياعمتي امي برا راه سلمي عليها
وسام .. حتى نا بنسلم عليها
وطلع عيسى ووسام وعميمة حواء
انا.. حمدلله على سلامتك
عادل.. الله يسلمك يارب
انا.. ان شاءالله الضرر بس زي ماقالت عبير
عادل .. اه الحمدلله كراعي بس
انا.. ربي يشفيك ان شاءالله
عادل.. زهرة
انا .. نعم
عادل.. سامحتيني
انا.. من يوم ما اطلقنا ولما اتصلت بيك صبيت معاي وماخذلتنيش زي ما الدنيا خذلتني سامحتك من قلبي يا عادل ومش شايلة في قلبي عليك شعرة
عادل بتنهيدة .. الحمدلله
انا.. كنك ياعادل
عادل .. تعرفي مقولة ( داين تدان)
انا.. اكيد
عادل .. خفت الحادث اللي صارلي بسبب اللي درته فيك
انا.. اسس معاش تكمل انا مسامحتك ومستحيل ربي يعاقب انسان على ذنب شخص مسامح عليه بس ليش انت تقول هكي
عادل.. عشان بعد ما الدكتور طمني اني من العصبية الزايدة نعتبر خفيت وبرغم الفترة القصيرة الا الدكتور قالي اصراري هو اللي عجل شفاي
انا بفرحة .. تمام الحمدلله يارب
عادل .. فرحانة يازهرة
انا.. وليش مانفرحش ليك وانت اكيد تو بتبدا حياة جديدة وسوية
عادل.. يعني مش حتدعي عليا عشان بنبدا حياة جديدة
انا.. ليش ياعادل اظن فيا هكي
عادل.. عشان اللي صارلك معاي
انا.. ونا سامحتك عليه ولو كنت نبي نردلك يا عادل كنت رديت ليك من اول ما وافقت انك تتعالج لكن نحن خلاص صعب نكونو لبعض بالذات مع موضوع العيال انت من حقك يكونو عندك عيال ونا زيك فحرام نحرمو بعض من النعمة هذي
عادل .. عندك حق
انا.. به ليش ظنيت فيا هكي ياعادل اني ندعي عليك
عادل باحراج .. لان يوم الحادث كلمت بنية تشتغل في الصيدلية اللي احذا السوبر ماركت بتاعي عجبتني وسئلتها اذا مرتبطة او لا واذا ماعندهاش مانع ترتبط براجل مطلق وهي وافقت ولما جيت مروح صارلي الحادث قلت بالك عشمك فيا او دعاك عليا
انا .. اولا معاش تفكر هكي مرات اللي صارلك حكمة من ربي مرات كان بيصيرلك شئ مش كويس والحادث كان النجاة منه ربي ليه حكمة في كل شئ وبالعكس يا عادل والله نفرحلك لو تزوجت واستقريت في حياتك
وثانيا والله من يوم ماسيبتني بعد ما اطمنت عليا ورتبتلي اموري ونا ندعي لك في كل صلاة ربي يهديك ويعطيك ماتتمنى
عادل .. والنعم بالله ربي يحفظك يارب وحتى انت ربي يريح بالك ويعطيك ماتتمني ويجيك نصيب خير مني
انا.. امين يارب ... لا مازال نا على التفكير في المواضيع هذين على الاقل نين نعرف اهلي من قبل
عادل .. وصلتي لحاجة
وحكيت ليه كل شئ وعرض زي الاول اني استحقيت لحاجة لاي مساعدة نقوله
أنت تقرأ
( سلسلة البيوت اسرار) الجزء الأول بعنوان الحب والغفران
Fanfiction#سلسلة_البيوت_اسرار وهي عبارة عن قصص منفصلة متصلة يعني كل جزء قصة مختلفة وابطال مختلفين ممكن يظهرو ابطال الجزء الاول كضيوف او مجرد ذكرهم في الجزء الثاني وممكن ابطال الجزء الثاني موجودين في الجزء الاول دوختكم صح 😊😉 فتابعونا وانتظروا الجزء الاول #ال...
