( سلسلة البيوت اسرار) الجزء الأول بعنوان الحب والغفران

الفصل السادس

#الحب_والغفران
الفصل السادس

اللي كبر بالمال يصغر قبره
واللي فقد الحبايب يخسر صبره
واللي خسر الصاحب يخسر قدره
والعظم ينكسر ويعيب لكن يبرا
الا كسرت الخاطر مصيبة غبره
.........................

وسام بوجه مقلوب .. به

وركب لداره بدون مايسئل حتى شنو صارله وكلنا استغربنا ضيق وسام لان وسام من نوعية الناس اللي تحسي معاش في منها اللي ماتزعلش من اي حاجة وقلبها صافي وضاربة الدنيا بكراع كلب حشاكم وديمة يقول مافيش حاجة تستاهل

اريج .. كنه وسام وجه مقلوب هكي
انا.. ان شاءالله خير
حواء.. وسام ماينقلبش وجه هكي الا حاجة كبيرة
ايناس .. زعمك حسام صايرة معاه حاجة
حواء .. لا ماظنيش لانه قبل ماتجو بالك بساعة كنت نحكي معاه سكايب
انا.. خلوه شوي واكيد هيهدا وحيقول شنو مزعله
حواء .. ان شاءالله
انا.. به عميمة بنعدي لحوشي المغرب على اذين نتوضى ونصلي ركعتين قبل ما يذن وكان وسام نزل ومازال مضايق ابعتيه ليا ونا نفهم منه
حواء .. حاضر يابنتي

وطلعت ونا نفكر في عادل وضيق وسام وصليت ودعيت لعادل بالشفاء ودعيت لوسام بهداوة البال واتصلت بعبير بعد ماصليت المغرب واطمنت منها على عادل وقالت ليا انه تو في الملاحظة بعد ماركبو له بلاتين في كراعه بسبب الكسر المضاعف اللي تعرض له في الحادث والحق ماخاطريش ناكل وشوي والباب دق ولاني مازالت لابسة سروال واسع وعليه بلوفر طويل حطيت وشاحي على راسي وفتحت لقيته وسام كلمته يخش وخليت الباب مفتوح وقويت الدفاية وجيت قمعزت حذاه

انا.. بما انك جيت هنا معناها مازالت مضايق وعميمة بعتتاتك ليا
وسام ..........
انا.. به اندير كبيتين كابتشينو ونجيبلك طرف من الكيكة الروسيه نعرفك تحب الحلو
وسام ..........

وصبيت درت اللي قلت عليه ومديت له الكباية وخذاها مني

انا.. احكي يا وسام والله ماعندكش ثقة فيا
وسام .. لا مش هكي والله
انا.. به فضفض وريح بالك
وسام .. اكيد بنحكي اصلا جاي هنا بنحكي بس اهم حاجة امي ماتعلمش
انا.. كون مطمن
وسام .. سبب ضيقي خوي
انا.. ان شاءالله خير شنو دارلك
وسام .. انا مش مضايق منه مضايق عليه وعشان تفهمي ليش مضايق عليه نحكيلك قصته
انا.. وكلي آذان صاغية
وسام بتنهيدة.. خوي حسام اكبر مني بسنتين ونحبه واجد ومانتحملش فيه شئ وخشيت للطب عشان نكون زيه وحبيته بسببه
خوي كان انسان جدي لكن مش عارفة شنو صارله حاجة قلباته وعرفت انه حب وحب صح مش بتاع لف ودوران خصوصا بعد اللي صارله وهو طالب لكن حاجة خشت فيه وقلباته راس على عقب وسيب حبيبته وتعذب واجد وكنت نجيه ونقوله خاطري نعرف السبب كان يقولي انه مايقدرش يقول ومايقدرش يكون معاها وتفاجأنا بيه بعد فترة بس قصيرة انه يبي يخطب ونا فرحت سحبته رد لحبيبته لكن للاسف طلعت وحدة ثانية وكنت متاكد ان خوي يبي ينسى حبيبته بيها
انا بتأثر.. شنو ذنبها اللي تزوجها
وسام بضحكة هزوة .. تو تعرفي شنو ذنبها
انا.. كمل يا سيدي
وسام..خطبها وماكانش سعيد زي اي راجل بيستقر وبيفتح حوش وبسرعة حدد موعد الفرح وتزوجها وسكنها في الشقة اللي فوق اللي هيا الدور الثالث
وبعد زواجهم ممكن باسبوع سمعنا صوت عراكهم لعندنا لتحت وماباش حد فينا يدخل ووقتها حتى خواتي مش متزوجات ايناس بس مقرية فاتحتها ونزل حسام مضايق بكل وحكى لنا سبب العراك
انا.. شنو السبب اللي يخلي عروس ادير عركة مع عريسها وهي ليها اسبوع بس متزوجة
وسام .. قال حسام انها تبي ادروج تفتح على برا مش عاجبها ان شقتها دروجها على داخل وان كل طلعة وخشة محسوبة عليها على اساس ان امي وخواتي بيضايقوها وامي طبعا تبي راحة ولدها هي اللي اقترحت عليه انه يصين الملحق ويزيد عليه ويدير ليه باب لبرا وطبعا الحوش اللي نحن فيه وجاب مهندس وعدله زي مايبي مع ان لو تشوفي الشقة فوق تعرفي انها ماعندها عقل وطبعا حايلنا عليه بيش يخف التوتر بينهم انهم يسافرو شهر عسل على الاقل نين يكمل الملحق صيانته وقلت ليه انا المسؤل عليه وفعلا درت هكي المهم كمل الحوش وروح خوي وبه تقدري تقولي حياته هدت شوي وطبعا خوي كان يشتغل في مستشفى ومصحة ويمسك توكات ليل وفي ليلة من الليالي شكله تعب كلم صاحبه خذا بداله التوكة وروح وياريته ماروح
انا .. عليش تقول هكي
وسام .. خوي من عادته يخش من الباب الرئيسي بتاع الحوش مايستخدمش في الباب الثاني بتاع حوشه بكل الا لما طالع هو ومرته ويسلم على امي قبل بعدين يخش لحوشه ولانه كان تعبان حتى السيارة مادخلهاش خلاها قدام باب الحوش وخش سلم على امي وطلع لحوشه واستغرب ان الحوش هادي على غير عادة فتوقع انها راقدة وخش بدون مايدير اي حركة ولما فتح الباب شافها هي وواحد في سريره ودار نومه طبعا عطاهم الاثنين طريحة لان حسام كان جسمه رياضي بسبب الصالة والرياضة اللي يلعب فيها فعطاه طريحة رباش القبور وبعدها اتصل بهلها وخلاها قاعدة زي ماهي ولما مسك الراجل اللي معاها وهو يسئل فيه من امتى يعرفها ومن امتى يجي للحوش طلع انه صاحبها قبل مايتزوجها وحتى حملت منه واجهضت ودارت عملية ترقيع غشاء بكرة في مصر بيش ترجع بنت زي ماكانت لما هلها جبروها على الزيجة من خوي وطلع كل ليلة يمسك فيها حسام في المستشفى او المصحة يجي هو وطبعا جو هلها وطلعت بفضيحة بينا وطلقها في وقتها طول قدام هلها ومعاش طبعا نندرو شنو صار فيها
انا بصدمة .. معقولة وحدة تقدر تخون راجلها بالشكل هضا كيف حتى قدرت تجيبه للحوشها ونست ربي ونست انه زي ماقالي الدكتور زمان اللي دارت الشئ مرة تقدر اديره مرة اخرى يعني مافكرتش ان صاحبها هضا يضحك عليها بس وبعدين شنو نهاية العلاقة عقلها وين بس
وسام .. ضالها الشيطان اعوذ بالله منه ويخلي الانسان ينسى ربه وبعدين هي من شكلها كانت واضح انها يادوب تصلي بس لانها كانت تقعد بلا محرمة قدامي وتلبس في قصير عادي
انا.. لاحول ولاقوة الا بالله وبه خوك بعد الصدمة هذي شنو صار فيه
وسام بحزن وتنهيدة عاليه .. خوي كان داير روحه قوي قدام هلها وبمجرد ماطلعو وطلقها فطن لروحه والصدمة بانت عليه انصدم صدمة عمره وقعد زي المهستر ويقول عشمها فيا عشمت فيا هضا ما شاد بس نين طاح علينا وقعد حاله هضا قريب ثلاثة ايام جاته حمى قوية ويهذي ويقول عشمت فيا عشمها فيا وعلى طول قلت اكيد يقصد حبيبته وبعد ماناض من الحمى صدمنا بخبر سفره برا ليبيا وانه معاش يبي يقعد فيها
انا.. قصدك ماجاش بكل
وسام .. يجي في الضرورة بس وينعدن على الصوابع فرح ايناس واريج ومرة امي مرضت وجياب ايناس ومرض مرت عمي عمر هذين المرات بس اللي جاء فيهن وكنا طامعين على جيبت اريج يجي
انا.. قصدك ليه ثلاث سنين ماجاش صح
طالما من جيبت تسنيم لانها بعد فرح اريج طول صح
وسام .. اصلا هو كان قاعد يحضر في فرح اريج لما ايناس جابت
انا.. اه به ماقلتش شنو اللي مضايقك هكي
وسام .. المعفنة طليقة خوي
انا.. كنها
وسام .. مكفهاش سيب البلاد من بعد اللي دراته فيه يشئ القدر يتلاقى معاها في امريكا وتطلع تسكن في نفس البرج اللي ساكن فيه
انا.. مافهمتش
وسام .. ماهو الفالحة خوتها زوجها لشيباني عشان يستر العار اللي دارته وشكله حالته مرتاحة وعنده شغل في امريكا بيطول ومن بخت خوي شغله يجي في نفس الولاية اللي حسام قاعد فيها
انا.. عليك بخت
وسام .. بس مش هضا اللي يضايق
انا.. امنا شنو
وسام .. انها عرضت عليه روحها تخيلي وقالتله عادي زي ماكنت نخون فيك نخونه معاك
انا بصدمة .. شنو
وسام بتنهيدة .. زي ماسمعتي وحسام ماتحملش شلبكها كف من اللي يحبه قلبك واتصل بيا طول وحكالي كل شئ صاير وانه مش قادر يتحمل انه يتنفس هو وياها الهواء نفسه مش لابال تكون معاه في نفس المكان ونا خايف عليه
انا.. من شنو
وسام .. حسام لما سيب حبيبته يعتبر كانه انهار رغم انه هو اللي سيبها وبيش يصلح غلطه صلحه بغلط اكبر بنت شافها مريضة جاية ليه عجبه شكلها وبدون مايسئل تزوجها وخلاص وبعد ماطلقها وصارتله الازمة قعد يدور على حبيبته الاولى زي المجنون ويقول من عشمها فيا لازم ندورها بيش تسامحني
انا.. ياحرام وانت ليش مادورتش عليها معاه
وسام .. انا مانعرفهاش من ورغم انه كان يحكيلي عليها لكن كان يتجنب ذكر اسمها او وين يتلاقى هو وياها حتى وليد يعتبر مخزن اسراره اللي نا مانعرفش معظمهن مايعرفش حتى اسمها ولما نحكو عليها نقولو في الاسم اللي متعود حسام يسميها بيه
انا.. بس وين اختفت اكيد عارف سكنها وين
وسام .. هذي المشكلة هيا لاسباب خاصة بيها ماقالتش ليه وين تسكن بالزبط ودور عليها واجد وكانها بالنسبة ليه فص ملح وذاب ولما ايس قرر يسافر
انا .. وتو شنو بيدير
وسام .. اقترحت عليه انه ينهي اموره ويرجع ساده خمس سنين غايب علينا
انا.. احسن والله ومافيش احسن من حضن الهل بالذات لما يكونو زيكم
وسام .. تعالي جاي شنو قصة المشية بكرة لعادل
انا بضحكة .. تو كيف فطنت
وسام .. لا بجديات كنه عادل
انابحزن.. دار حادث وطلع من عينها وكراعه حصلت كسر مضاعف نين ركبوله بلاتين وطالب يشوفني
وسام .. اه
انا.. اصلا حتى لو ماطلبش يشوفني كنت مستحيل نقعد بعد ماسمعت بالحادث
وسام .. خلاص معناها بكرة نمشو للجامعة نعرفك على وليد وبعدها نجو ناخذو امي ونسقدو لاجدابيا بيش نوصلو بدري ونروحو بدري

وبعد السهراية وتغيرت جو وسام طلع ونا وتيت حاجاتي وتمددت ورقدت وثاني يوم نضت و غيرت دبشي وطلعت لقيت وسام يستنى فيا
وسام .. صباح الخير
انا .. صباح الورد
وسام .. نطلعو بسيارتك والله سيارتي
انا .. بسيارتي
وسام .. به
وركبنا وطلعت وقعدت نسهري انا ووسام
وسام .. اه بنقولك حاجة
انا.. شنو ان شاءالله خير
وسام بضحكة .. خير اطمني بس بنوقضك على حاجة
انا.. شنو
وسام .. ردي بالك تنفجعي لما تشوفي وليد
انا بخوف .. كنه شنو وجه متشوه
وسام بضحكة .. لا لا عليك فيلم هندي عقلك عدى شوره
انا .. ها امنا شنو
وسام .. بالعكس وليد وسيم جدا شكله لكن جسمه بســ والله نقولك خليه نين تشوفيه
انا.. خزيه عليك شغلتني هكي
وسام .. اهو وصلنا للجامعة خليني نتصل بيه نشوفه وين

واتصل وسام بيه وعرفنا انه في الكافتيريا ولما وصلنا عنده وصبا يسلم علينا
انا بصدمة ............
#حياة
سلسلة البيوت اسرار :هي عبارة عن سلسلة متصلة منفصلة وتتكون من عدة اجزاء #الحب_والغفران الجزء الاول منها
ملاحظة للامانة .. الشعر من صفحة اشعار وقصائد وخواطر ليبية