دار الأيتام

البارت الاول

الكاتبة_نبأ
دار الأيتام
————————*
هلاو رجعت الكم بقصه جديده ||°
واليوم راح نبدي اول بارت وكلش حلوة تابعوها ويانه🖤°•|/
———————-*
...هستوني طالع من الدوام وضايج
والشمس تصكع براسي
لبست نظاراتي الشمسيه و صعدت بالسياره وسقت بسرعه
علكت بإزدحام وبعد ما طلعت
لفتت نظري طفله
خدودها حمره من الشمس و شعرها ضارب بيه الشمس وعسلي
يُبين بملامحها الحزن وملابسها مبهذله عيونها تلمع
شفت بايدها سله ورد
وتفتر على السيارات
قطع نظري بيها الشرطي الي واكف يمها ودفعها
شفتها ضلت تبجي
ما تحملت ونزلت من السياره
ودفعته
وكومتها عيونها جانت خضره وتجنن
اجه ضربني من ورا وكمتله
سامر: شطولك شعرضك وحارس وطني ما تستحي على شواربك تستقوي على بنيه صغيره كلكم الشرطه هيج ما يهمكم بس الراتب
: احترم نفسك اخي هيه جانت هنانه مخالفه للقانون ...قاطعته
سامر: قانون كال قانون اترخص اني
لزمتها من ايدها وصعدتها وياي بالسياره وهيه تبجي
جانت السيارات تمشي ما كدرت احجي وياها وهيه تتوسل بيه انزلها بس قفلت البيبان
وصلت لمكان بيه في وأشجار
نزلتها ووياها سلتها
طلعت بطل المي من السياره وغسلت وجهه وأيدها
:عمو حباب عوفني هسه ماما جيهان ما تقبل ما اريد أتأخر تكتلني وما تنطيني لفه
استغربت من كلامها لزمتها من اكتافها واباوع بعيونها الي جنها متاهة من حلاتها
سامر: وينها هاي ماما وانتي ليش هيج طالعه وحدج ما تخافين
:ما اعرف احنه عايشين ببيت هيج(فتحت ايدها ع كبرها بمعنى كبير) وهواي جهال بعمري همين وكلنا نشتغل ما نكعد واذا احد كعد وبقه نايم تجي تضربه ويطلع اوا احمر وما تقبل احد يتاخر لان تسويله همين اوا وما تنطيه عّم (وتأشر على حلكها)

كسرت خاطري
سامر: تعاي وياي ما طول بعد وكت واشتريلج هواي عّم واوصلج وهيج ما تتاخرين
هزت راسها بمعنى موافقه
لزمت ايدها وبستها بخدها
خليت السله مالتها ليوره وصعدتها بصفي بالصدر
وصلنه لمطعم
وصيت على بيض وحليب لان مبين عليها ما عدها صحه وتعبانه
جابوه وشفتها تاكل بشراهه
ضحكت عليها وضلت تباوع علي
:ليش تضحك
سامر: يحلوه مو هيج ياكلون تحطيها بصمونه وتلفيها وتاكلين
علمتها شلون وصارت تاكل
ع غفله وهيه تاكل صفنت
سامر: كملي اكل ليش وكفتي
: تذكرت أصدقائي بالبيت خطيه هسه جوعانين
سامر: هسه ناخذ ويانه الهم وانطيهم
ابتسمتلي وكالت
: عمو انت حباب
سامر: وانت تخبلين وحبابه بس انتي شسمج؟وشكد عمرج
: اسمي شهد ووو عمري (ضلت تطلع اصابعها وتحسب) هلكد واثنين وياهم و7اشهر
سامر: عمرج 12 و 7 أشهر
شهد: هاااااا ييي
الي عرفته ما داخله مدرسه وعايشه بدار أيتام اكيد مبين من حجيها
سامر: يلا خلي اوصلج
صعدنه بالسياره ودلتني على مكانها
وجان شكي بمحله هو دار أيتام
قبل لا تنزل صحت عليها وخليت بايدها خمسه وعشرين وانطيتها علاكه بيها اكل
أخذتهم وراحت حتى بدون ما تكول شكرا
......
شهد
من اخذت الورقه الحمره الي ما اعرفها هاي شنو
والاكل اول ما دخلت تلكيتهم بالغرفه
واخذو العلاكه مني وياكلون
اجت ماما جيهان و عصبيه كعادتها
وضلت تصيح علينه وتكول من وين الكم هل اكل
رفعت راسي بخوف
شهد : اني جبته عمو نطاني اياه ونطاني هاي الحمره
لزمتي من فكي حيل وعصرت وجهي دمعت عيوني جرت الحمره من عندي
ورفعت حاجب وابتسمت بمكر
اخذتها وراحت
ضليت ابجي واجو أصدقائي يواسوني
تغطيت بفراشي ونمت
ثاني يوم كعدت من وكت ع صوت ماما جيهان تصيح علي
:شهدددددد تعاي هنااااااا
طفرت من مكاني ورحت اله للادراه
شفت بيدها فستان قصير زيتوني لفت انتباهي
اجت علي وعليها ابتسامه عاديه وبقايه بمكاني بخوف
كرصتني من خدودي
: شايفه هذاك الفستان روحي البسيه
رحت اخذته ولبسته وجان حلو
: يلا هسه روحي آخذي السله واطلعي
مشيت عادي وأخذت السله وطلعت
...............
سامر
وصلتها ورجعت
وطول الطريق أفكر بيها وبعيونها ولمعتهم ولمن ضحكت غمازتها شاكه الخد الأحمر
تصرفتاتها شعرها البني الطويل
ضربت الستيرن ع كيف
واحجي بيني وبين نفسي هيه هاي اخذت فكرك طفله اخذت فكرك
ما حجيت الكم على نفسي
اني حنطاوي مايل للبياض عيوني عسليه شكلي طبيعي صاحب كفشه ولحيه طولي 183cm ومعضل شويه
اشتغل ب شركه ابويه صيرفه وتجاره بالفلوس
تشتغل وياي بت عمي الغثيثه سرى لازكتلي فد لزكه ولابسها
دائماً تغيثني واطلع مِن الدوام
عائلتي مكونه من ماهر الكبير عمره 31متزوج وعنده ولد
وأمي وابويه متزوجين عن حب بالكليه طبعاً الوالد عنده ماضي هههههه
اختي سجى عمرها 18 سنه كلش قريبه علي ونصفي الثاني
واني سامر عمري 23 سنه ادرس اداره واقتصاد
من رجعت للبيت تلكتني امي
سلمت عليها ودخلت وراي سجى جانت عد صديقتها تدرس
سلامنا غير شكل عدنه حركات
دخلت للصاله لكيت الفصعون الصغير ابن اخويه غيث شلته ولاعبته
:يوم الي اشوف ولدك بيدك
التفت على امي وابتسمت راح بالي يم شهد
لزمت راسي وضليت امسح بوجهي اخذت نفس
رحت لغرفتي بدلت
اجت سجى ضلت تباوعلي باستغراب
: اشو مو على بعضك سمرمر
سامر: ماكو شي وداعتج
: اممممم ما اعرف اكو شي صاير وياك اليوم
سامر: تعاي نكعد واسولفلج
سولفت الها كلشي
سجى: ليش ما تتبناها اذا هيج بالك يمها مو احسن
سامر: والله ما فكرت هيج عود اشوف اذا شفتها باجر الله كريم
سجى: اتمنى تشوفها وتحجي وياها انت هسه نام وارتاح وفكر بالموضوع

نمت وما حسّيت بالدنيا
كعدت ثاني يوم
تريكت ورحت للدوام وتلكتني بت العم استغفر الله
سرى: هلاوو سمرو حبي شلونك يولو
سامر: بلا شو وخري لا تعكرين مزاجي
سرى: ي هو انت دومك هيج ولا عبالك بت عمك كالب وجهك عبالك مدري شمسويتلك
سامر: شوكت تقتنعين يا اختي ما احبج ليش تسحلين كرامتج خلي علاقتنه ع كد الشغل وهاي هيه
سرى: اني احبك وبكيفي
وفرت راسها وراحت
ضليت اشتغل وبالي يم شهد بلكي اليوم أشوفها
صارت ب1 وطلعت
رحت ع المكان الي نفسه البارحه لكيته بيها ما لكيتها
بعدين رحت بصف الملجئ و باوعت ما موجوده
افتريت بالافرع وشفتها
واكفه كبال محل العاب
وتباوع وأيدها ع شباك المحل
ولابسه فستان زيتوني قصير ورجليها جنهم كيمر السده
نزلت بلهفه وشافتني واجت علي
: هلو عمو حباب
ضحكت من كل قلبي
سامر : شهدو يحلوه اسمي سامر
: عمو سامر حباب
تحجي واني ميت ضحك
سامر: شهد اليوم نروح نفتر واخذج مدينة ألعاب وناكل موطه
شهد: صدوك عمو واصعد بهاي الوييييي واوكع
سامر: اسمها زحليكه و هسه بس نروح تركبيهم كلهم ونتونس واعرفج عليهن
لزمتها من ايدها ورحنه

يٌتبع.........
—————
هُـُـ❀ـُـُاُآي جانت بدايه القصه بس بيها هواي احداث ترقبوها
والأسبوع الجاي عندي هواي امتحانات شهريه يعني اذا افرغ انزل الكم
انتو بَـßÊـسّ ادعولي انجح ويارب الموفقيه للجميع

الكاتبه نبأ
في أمان آللـْ•̣̣̥·̩̩̩̥•̣̥ـْـّہ 🖤