دار الأيتام

بارت 19

بارت 19
#الكاتبة_نبأ
#دار_الايتام
..............................
*سامر*
مرت الايام وانتقلنه للبيت الجديد هذاك البيت ما بعناه قفلناه وعفناه
وتعامل سما بارد مو مثل اول محادثه
صارو بيت عمي يجون ولاحظت سرى ما تجي وياهم
واليوم أربعاء يعني باجر عرسي
جنت كاعد على سفرة الغده وياهم
ناكل ونسولف
جابو طاري شهد بالغلط
غصيت ونغزني قلبي
كمت وانسدت نفسي
اهلي ضلو يصيحون علي ارجع اكل
سديت باب الغرفه بقوة وغضب
طلعت ملابس سود من الكنتور ولبستهن
شعري جان مرتب وخربطته
وعيوني من الخنكه صارت حمرة
ضليت خازر نفسي بالمرايا والغضب مستحلني
لزمت شيشه العطر وشمرتها على المرايا
سمعت دكت الباب
اخذت سويج سيارتي
فتحت باب الغرفه ونزلت
ما اهتميت لاحد
رحت ركبت السيارة
أخذني كلبي للنجف
هناك دوة علتي هاي
نزلت للمكابر
ودموعي ما رضت تسكت
طفل ومضيع امه
مضيع حضن دافي
صحراء وما بيها مي
ورده ذبلانه ومحتاجه احد يرويها
جنت ضايع أشبه بصافرة روز وهيه بالماء من غركت التايتنك
وصلت لغرفتها
وشمرت روحي
ما اكدر أوصل كميه الوجع
كأنو هسه جديد فراكهه وجرحي جبير
تمددت يمها على الكاشي البارد
وجانت شته بوكتها
الكاشي رغم بارد بس حرارة قلبي طاغيه
ما جنت احس بشي عبارة عن كتله وجع
عبارة عن وجع طفل يتيم بيوم العيد وما يمه اهله
هيج جان شعوري
احجي وياها واعاتبها
ليش رضيتي بالفركه وعفتيني اتلوة بفراكج وحدي!!
شهد حبيبتي دريتي باجر عرسي !!
دريتي اكو عروس منتظرة أصير الها!!
دريتي بقلبي شكد يحبج وما يكدر يحب غيرج!!
درررريتي!!
يا طفلتي يا حبيبتي يا عسولتي
مشتاق لعيونج الي جانت بستاني الأخضر
لوجهج لتصرفاتج
اريد احضنج حيل وتاخذيني وياج
ما اريد هل دنيا بدونج مالها طعم
تعبت واني امثل القوة بلياج
مليت جزعت
كل يوم انتظر شوكت الله ياخذني
حتى يجمعني بيج لان الدنيا ما رضت تجمعني وياج
ارجعيلي!!
حطيت راسي على صورتها الي ع الكبر
وما دريت بالدنيا طشت لو رشت
صحيت على ايد دافيه
جانت عيوني مغوشه
شهد!!
فتحت عيني ووضحت الرؤيا
طفلة لازمه مي ورد وتبيع
:عمو ليش نايم هنا بارده
ضليت صافن عليها
عمو!
تمنيتها من حبيبتي الصغيرة وقابل بيها
: عمو اشتري مني وأسفه لان كعدتك
نطيتها فلوس وما اخذت منها مي
: الله يسعدك عمو ويرزقك
ابتسمت بإلم وراحت الطفله
تربعت ودنكت راسي وعيوني غركانه بالدمع
حسيت على سيارة طبكت
باوعت
نزل منها ماهر
ماهر: الله يساعدك سامر
كعد يمي وحضني من اجتافي
شهكت وبجيت
سامر: ماهر شهد سوتها صدك وبعد ما رجعت!!!
ماهر: اششششششششش صير قوي بعد اخوك
سامر: ما ضَل حيل بيه اني مكاني هنا مو يم احد علتي هنا دواها ماهر
ماهر: باجر عرسك وامي بقت مقهورة بالبيت عليك
سامر: كلمن يفكر بمصلحته ماهر محدً يحس بيه
ماهر: قدر الله ما تكدر تسوي شي مكتوب هذا وهسه كوم وياي خلي نرجع كلها ضَال بالها عليك
سامر: شعندي راجع شعندي هناك
ماهر: كلنا هناك اهلك وناسك ننتظرك
والدنيا شوفها ليل تدري الساعه هسه ب11 وضالين على ضوة السياره
باوعت على ضوة الغرفه محترك
سامر: هسه روح جيب ضوة مثل هذا خلي اخليه الها اعرفها تخاف بالليل
ماهر: ما اعرف شكلك والله رايح اجيب واجي
راح ماهر
لزمت القران وقريت الفاتحه ودعيت الها بالمغفرة
وادري بيها هسه هيه طير من طيور الجنه وكاعد تشوفني وتحس بيه
اجه ماهر
وشديت الكلوبات وعدلت الغرفه
رحت على سيارتي جنت جايب بطانيه جديده
وخر القديمه وحطيت الجديده
بوست الكبر وودعتها
رحت وما التفتت بعد
وصلنه للبيت الفجر
البيت هدوء جان عاتم
دخلت لغرفتي
قاط بيجي واسود معلك على الكنتور
ووياه شياش مال عطور
وباقات ورد
وجان اكو بوكس(صندوق) مكتوب عليه ورقه
قريت
من سما ..
رساله اعتذار :-
سامر حبيبي يا جميلي يا حبي الطفولي والي نولد وياي وانزرع بداخلي يا زوجي ورجل بيتي المستقبلي او بالأحرى باجر تصير الي وملكي وحلالي وتصير كلك اني وأخبط دمي وي دمك وأصير شخص واحد وي روحك ونبضك اسفه واشدد اعتذاري على الي صار شلت بخاطري عليك شوية بس فكرت بالموضوع وانت معذور وهذا من حقك وأتمنى تتقبل هل هديه وباجر أريدك تتأنق بيه وتطلع احلى عريس بالدنيا واقهر البنات بيك ههههههه احبك.
ابتسمت على كلامها
هل بنيه صدك خبله مثلي
طلعت تلفوني من جيبي
رسلت الها رساله
سامر💬: وصلت الهديه مشكورة سمسم
سما💬: هلا حبيبي عجبتك؟
سامر💬: اكيد تعجبني غير منج بعد
سما💬: حبيبي فديت ان شاء الله باجر تطلع تجنن بيه واكيد انت راح تحلي القاط مو هوه يحليك
سامر💬: وانتي راح تطلعين أميرة وحلى عروس بالدنيا
ويجي الامير يخطفج ونروح بعيد
سما💬: ما بقه بس ساعات قليله ويطلع الصبح
سامر💬: ي صح بس ليش كاعده
سما💬: جنت نايمه وصليت صلاة الفجر ودعيت الله يوفقنه
سامر💬: جنت بالنجف اني
سما💬: صدوك!! ما كلت الي
سامر💬: طلعت ضايج من البيت ورحت بدربي لهناك
سما💬: اذا هيج روح ارتاح ونام كم ساعه
ودعتها ورحت نمت
كعدت الصبح على صوت سجى
وهيه تهوس ووتتمركص يمي
سجى: عريسنه جكليته حامض حلو باكيته
واليوم اركص ركص وأكسر الكاشيه
افرح واركصلك يا ماي عيوني وضلع من ضلوعي اليوم معرس
شلت المخده وضربتها
اجت دغدغتني وتضحك
وكعت من الجربايه وجريتها وياي وانضرب راسها بالكاع
همزين جانت مفروشه زوليه ما تأذت
وكعنه وهيه بعدها تضحك
سامر: سدي حلكج كافي
سجى: يلااا لك اليوم اخلص منك وتاخذك وحده بس هُـُـا مو تتزوج وتصير اخو مرتك وتنساني اموتك واكتل صاحبك
حضنت راسها وضليت اضرب بيها بالشقه
سامر: لج اكو وحده تكول هيج ليش اني انسه روحي والكبد وضلعتي
سجى: يمه احبببك ولَك
سامر: يلا كومي اريد ريوك
سجى: ٺــڊٍلَل عريسنه
كمت سبحت
باوعت على عيوني بالمرايا بعدهن مورمات
وهنه منا كبار ولونهن اصفر فاتح والجفن صاير احمر
طالع عبالك وحش بريء ههههههه
نزلت تريكت
وكالعادة مثل الخطوبة كلها متجمعه
اجو علي باركولي
صاحت علي امي
عفاف: يلا يمه شوية وتبدي الزفه والنَّاس تمشي هم يالله تحضر نفسك
صعدت فوك
لَبْست القاط
ضليت أدور على الحذاء
وينه ماكو ما لكيته
صحت على امي
حسّيت على ايد كرصتني
انداريت
سجى
لابسه فستان احمر مخصر ومرتب وطالعه ملكة وشايله بيدها الحذاء
شالت الحذاء بوجهي وتبتسم بخباثه
سجى: هاك لا تصرعنه بصوتك استاذ سامر العريس
سامر: بت ثائر شمسويه بنفسج
سجى: بعد اخت العريس غير لازم اتالق واطلع احلى وحده بالساحه وأكسر على العروس لوووو حضرتك تغار موووو هههههه
سامر: انجبي بله ههههههه الخبله
لبست الحذاء
سجى: يلا الزم  ايدي وخل ننزل على الدرج ونسوي اجواء الاخ واخته
سامر: حضرتج عايشه الجو
سجى: اخويه وادلل عليه
سامر: شعندي غيرج ادللي
لزمت ايدها ونزلت
هلاهل والديجي والصلوات على محمد ترست البيت
اجت امي شايله حرمل وفرته علي
ضحكت ومشيتها الها
تلكاني سيف بالطرمه يهوس
سيف: زوجناه وخلصنه منه
حضني وباركلي
ضربني بعكسه وغمزلي
سيف: باجر الآلي واخذ اختك
سامر: خل يخلص العرس واني الك هههههه
سيارة عرسي جان السايق ماهر
ما قصر بالركص
وصلت لبيتهم
جانو مغشينها ولابسه البدله
رفعت الغشاوة وبستها براسها
كعدت بصفها وهمست الها
: طالعه تخبلين سمسم
ابتسمت ودنكت راسها
كمت وحطيت الكبوس عليها
ومشينه بالزفه
رحنه راسن لقاعه الفندق
هناك احتفلنه
خلصنه احتفال
زفوني لغرفتي
سيف: دير بالك على اختي لك نذل ما اوصيك وغمزلي
سامر: انجب هههههه
دخلت للغرفه جانت كاعده على طرف الجربايه
رحت كعدت بصفهه
رفعت الغشاوة منها
نغزني قلبي واجت شهد ببالي
دمعت عيني
دنكت راسي وحجيت
سامر: سما اذا جوعانه هذيج الصينيه روحي آكلي راح ادخل اسبح اني
اخذت ملابس وفتت للحمام
فتحت المي البارد
اريد اطفه نار وتعسر بيه
بقيت جوة الدوش
شوية وطلعت
فتحت ضوة خفيف
نازعه البدله والصينيه ما مفتوحه ونايمه
رمشت عيني
باوعتلها
مبين باجيه ونايمه
اخذت بطانيه ورحت نمت على القنفه
..............................
يُتبع♥️💬.