دار الأيتام

بارت 18

#الكاتبة_نبأ
#دار_الايتام
مسااااااء الكاكاو🍫شلونكم
.................................
*سامر*
اجه يوم الاحد
كعدت من الصبح
فتحت تلفوني
تلفوني الخلفيه مالته صورتنه اني وشهد
اجت عيني بعينها
ودمعت
ضليت احجي وياها
سامر: شهودة طفلتي المدللة وحبيبتي صحيح اليوم راح اخطب بس هل شي شكلي مو بقلبي بس انتي الي انزرعتي بقلبي وما طلعتج ومهما يكون حبيبتي راح ابقه احبج نامي بسلام
مسحت دموعي
وكمت بقوة
اليوم جمعه
والعائلة ببيت جدي كلها مجتمعه
لان اليوم الخطبه مال ولي العهد هههههه
بس نزلت من الدرج
شمرو علي جكليت والهلاهل
سلمت عليهم
خوالي وعمامي والجيران ماكو واحد ما جاي
رحت للمطبخ
وطلعت كدامي سرى
جانت عيونها مدمعه
ضلت تباوع علي وبعدين طختني بجتافي وراحت
صفنت وضحكت
هاي شبيها استغفر الله
كعدت بالمطبخ تريكت
خلصت واجت امي علي
عفاف: يلا يمه حضر نفسك ترة فد شوية ونروح الهم عيب المرة خابرتني كالت محضرين كلشي
سامر: عليمن مستعجلين يا يمه
عفاف: لا تنسه مو همين وره العقد مالتك العقد مال اختك
سامر: هاااااا هم صدك لعد اذا هيج رايح احضر نفسي
صعدت فوك
دخلت للغرفه
ولكيت سرى وجه على الكنتور
وجان تطلع بقاطي
طلعته واندارت علي
جانت عيونها مليانه دموع
ابتسمت بألم وباوعتلي
سرى: اليوم يوم خطبتك يعني خلص راح تروح لغير وحده واني راح ابقه هنا طالما تمنيتك الي بس حظي ما كعد وياي شكد اذيتني وما ردتني بس بقيت احبك الك وما فد يوم كرهتك ابد وهسه اتمنى الك السعاده وشوف حياتك وأريد منك طلب اخير خليني اني البسك القاط
تحجي وهي تبجي وتشهك
هزيت راسي بمعنى اي
جنت لابس اسود ونزعته اليوم لأول مرة
نزعت ملابسي
رمشت عيوني ودمعت
تقربت علي وصارت تلبسني
عيونها من كثر ما باجيه مورمه وصايره رموشها ليفوك
سرى صاحبه عيون كلش كبار وسود و رموش طوال
لبستني وخلصت
وبقت بس السترة
سرى: مد ايدك خل البس اياها
لبستني اياها وصارت وره ظهري
حطت راسها على ظهري
وصارت تبجي
انداريت عليها
سامر: لتبجين ترة هذا الي كاتبه الله اني مو اخر شاب بهل دنيا سرى تلكين الاحسن مني ويستاهلج شبيدي عليج بت العم بس قلبي ما هواج وهسه روحي غسلي وجهج وكافي صيري قوية
باوعتلي وصفنت وجانت شفايفها ترجف
دنكت راسي وهيه كامت وراحت
سديت الباب بقوة وضربته
طبيت للحمام حتى اسوي شعري
وتعطرت
فتحت الباب ونزلت
صارو يشمرون علي ورد وجكليت وهلاهل
طلعت بالطرمه وتلكوني اصدقائي بالكليه
حضنوني لان ما شايفيني من زمان
وصارو اهلي وناسي واصدقائي كلها تهوس
صعدت بالسيارة
ورحنه لبيت سما
كعدنه الزلم بالاستقبال
اجه الشيخ
عقدنه وخلصنه
بعدين صاحوني حتى نلبس حلقات وذهب
دخلت
وجانت كاعده لابسه فستان ابيض وجتافها كله طالع وعليها غشاوة
كعدت يمها
وبعده قلبي يتذكر شهد
عيوني دمعت
وصارت سلسله افكاري كلها على الذكريات
قطعتها للسلسلة امي
عفاف: هاك يمه لَبْس مرتك
لبستها
ناس فرحانه وناس تمثل الفرح
واني جنت امثل الفرح بس بداخلي يحترك
خلصنه المراسيم
وصار وكت الصور
اخذنه صور النه
اجو اخذو ويانه
ومن ضمنهم اجت سرى اخذت ويانه
جانت تبتسم او بالأحرى تتصنع ابتسامتها
وره شويه عقدو لسيف وسجى
وصرنه كلنا بالصاله كاعدين
شغلو اغنيه
وركصنه سلو على أنغام الاغنيه
من جنه نركص عيني بعينها
بس مجنت اشوفها هيه
جنت اشوف شهد بمكانها
تتراوالي وتتخيلي شهد
خلصت تخيلاتي على صوت الهلاهل
اجت امها اخذتها
واحنه رحنه رجعنه للبيت
اتفقنه يصير العرس الخميس الجاي
وسيف وسجى ورانه بيوم الجمعه
بدلت ملابسي
وتمددت على فراشي
اخذتلي غفوة
وكعدتني سجى
كالت
سجى: اصدقائك جوة كلهم يريدوك
سامر: هسه شويه ونازل
راحت سجى
شفت إشعارات على شاشه الموبايل
سما💬: جنت طالع تجنن حبيبي يا رب يوم الي يجمعنه بسقف واحد
ابتسمت بس بداخلي ماكو سعاده
جاوبتها
سامر💬: هلا جنت نايمه هههههه وانتي ما قصرتي بجمالج سمسم جنتي طالعه مثل الأميرة
راسن شافت الرساله وجاوبت
سما💬: صح النوم قلبي هذا اكيد جمال عيونك أميري الجميل
سامر💬: سمسم يمي اصدقائي منتظريني زحمه اعوفهم بعدين نحجي
سما💬: اخذ راحتك
غسلت وجهي ونزلت
لكيتهم بالطرمه
تلكوني اصدقائي بالهوسات
سيف جان وياهم
شالني على اجتافه وصار يهوس بيه
وهمه يذبون علي ورد وجكليت
جنت امثل الفرح وابتسم بإلم 
جايبين هدايا
كعدنه بالاستقبال
وصرنه نتداول الحجي والسوالف
جنت مشتاق لكعدتنه سوة وأيام الكليه
هذولي صحبتي وأصدقائي
سيف: ما ناوي ترجع للكليه حرامات انت وصلت مرحله ثالثه وما بقالك سنه وتخلص
سامر: شي اكيد ارجع لان حلمي هذا بس مو هسه تعذرني
سيف: انت هسه شوية راجع طبيعي ومقبل على الزواج وحياة جديده لازم تخلي الكليه من ضمن اولويات حياتك
سامر: ليش منو كلك مرتاح مثلاً وفرحان على هل زواج هو كله علمود ارضي امي وأهلي بس اني ولا الي نفس أزوج
سيف: قابل تضل طول عمرك ما تتزوج المحروسه شهد الله يرحمها وراحت لدار حقها وهذا وعد الله وكلمت مكتوبله هل يوم
سامر: اني مو اول ولا اخر واحد يوفي لحبيبته وباقي على العهد متدخل قلبي غيرها هذا ( اشر على قلبي) ما هوى غيرها ولا راح يهوه
كمزني واحد من اصدقائي
صادق: اللللله علللللييييك اللللله عليك يا عمار كوسوفي انت بطل ووفي
يوسف(صار ياشر بيده على شكل كيتار): تيرررااا تيراااا تيرااااا امممم تيراااا
ضلينه نضحك على تصرفاتهم
سامر: بابا شبيكم تخبلتو هههههههه
صادق: متأثرين بالبطل
سامر: حب حقيقي هذا
يوسف(لزم كلنسه وصار يلحن بإيده): حببببب اييييه الي انت كايه تقووول عليه
كرار: تيررررراااااا ترارااا
شمرت عليهم خاشوكه الجاي
سامر: ولكم كل واحد بطول النخل شوكت تكبرون كل واحد وشواربه جنها خيوط شليف وتغنون وتصرفاتكم الطفولية
صادق: اني صراحه تبت
يوسف: تبت لو عصير ابوووووااااه
سامر: خرب تفاهتك بابا توب
يوسف: توب مال سيارة كر كر كر
صادق: لتحاول وياه ههههههه
ورة شويه
يوسف وصادق ترخصوا وراحو
بقينه اني وسيف
جان يكلب بالتلفون ويضحك
سامر: شبيك تضحك ضحكنه وياك
سيف: دا احجي وي اختك حرام
سامر: واني هم قبل شويه جنت احجي وي اختك
سيف: هااا يعني وحده بوحده مو
سامر: ي طبعاً السن بالسن بيب
خطر ببالي موضوع
سامر: سيوفي راح اكلك طلب بس أريدك ما ترفض اريد مصلحتك
سيف: غالي والطلب رخيص كول سيمو
سامر: شوف حبيبي سيف اني عندي مكان بالشركة وي ابويه فارغ أريدك تصير وياي موظف مو قصه اقلل من قيمتك بس بنفس الوكت تبقى يمي وبنفس الوكت شغل اني وياك شتكول
سيف: افتهمك واعرف نيتك والله بس خاف تصير زحمه منك ومن ابوك
سامر: لا ليش هو ابويه يكيف بيك وكلش يفرح اذا اكله
سيف: الي تشوفه صح سويه واني ان شاء الله كدها
كمت وكفت وفتحت ذراعي بمعنى حضن
حضنته حيل هذا ضلعي
سيف: احبك سيمو
سامر: سيفو الغالي نفس ريتي حبيبي
سيف: طول عمرك ضليت اصيل وابن اصيل وما تغيرت
سامر: لو ما انت هيج ما تشوفني هيج
سيف: لسانك ينقط عسل مثلك
دكت عليه امه
سيف: يلا اترخص
سامر : سيف سلملي على اختك
سيف: وانت هم سلملي عليها
سامر: ههههههه يوصل ضلع
طلعت رحت كعدت بالصاله يم اهلي
جانو كاعدين يشربون جاي
كعدت يمهم
ثائر: سامر ابني احنه هسه بيتنه الجديد خلصناه يبقى بس نكعد بيه شوكت عاجبك نكعد بيه
سامر: خلينه من باجر نكعد بيه ما اريد نسوي ثكل على بيت جدي وكاعدين بالمشتمل علمودي
ثائر: ان شاء الله على عرسك يكون وجه خير
سامر: ان شاء الله بوية
باوعت على الساعه ب12
تذكرت سما
خرب نسيتهااا
طفرت من مكاني على السريع
امي صاحت علي شكووو
صيحت
يمه الحب يمه
لزمت موبايلي
الشاشه بعدها بصورة شهد
طارت فرحتي بسما وضليت اباوع على الصورة
دمعت عيني وبست الصورة وحطيتها على صدري
اهتز الموبايل وهو على صدري
سما💬: تصبح على خير♥️.
خرب شكد فشله من البنيه
سامر💬: ﺁﺇﺃﺱـف سمسم هستوني جاي افتح الموبايل ودزيتي و تعرفين جانو يمي اصدقائي وبقه سيف شويه وراح
سما💬: اي وسلامك وصل
سامر💬: هههههههه الله يسلمج سمسم
سما💬: العرس يوم الخميس يعني بعد خمس ايّام وتصير الي وتتحقق امنيتي الي من الطفولة
ضليت صافن شوية
سامر💬: تحبيني؟
سما💬: من زمان من كعدت على هل دنيا وانت صديق اخويه وحبيتك وهويتك من جنت طفلة بس ما جنا ابين هل شي وانتضرت الكليه بفارغ الصبر حتى اداوم وياك
سامر💬: جنت اشوفج طفله صغيره شبسرعه كبرتي وصرتي ويانه بالكليه
صح معجب بيج وبشخصيتج وتصرفاتج النازكة مثلج بس ابد ما مفكر يجي يوم وتصيرين مرتي
سما💬: وهسه؟
سامر💬: لا طبعاً صارت سما مرتي بعد ومسجله بإسمي
سما💬: ادري بيك جنت تحب شهد وبعدك تحبها
سامر💬: اتمنى الشي ما يضوجج بس الشغله مو بيدي
سما💬: نعست اني تصبح على خير.
سامر💬: وانتي بالف خير.
دزيت الرساله بس ما شافتها
معقولة ضاجت
هسه يا يمه ورطتي بت الناس وياي وفوكاها اخت صاحبي
شدعي عليج يمه
لفيت راسي ونمت
..............................
هلاو كيكاتي♥️🍫
مشتاقه الكم هواي😍هووووواي هووووواي بكد السمه
ﺁﺇﺃﺱــsorryـــفه على التأخير
بس تعرفون اني هل سنه بكلوريا وزاري
واحنه بنص السنه ودا نمتحن وهاي ايّام امتحانات
وأكيد هم اكو طلاب يتابعوني ويعرفون
اليوم راح نعوضكم ببارتين
هذا بارت وبعد بارت راح ينزل وراه
وأكرر اعتذاري♥️🌹🙏🏻.
احبكم يا عسل🍫🍃.