دار الأيتام

بارت 15

#الكاتبة_نبأ
#دار_الايتام
*........................*
سامر

من شفتها بالحمام وحلكها دم ومغمى عليها
انصابيت بهلع وضليت اصيح
شلتها وسويت الدرج بايتين
عيوني مجانت تشوف بس هيه
اهلي كدامي يحاجوني وادفع بيهم
ما اسمع بس الصريخ والصياح
اتبهذلنه
اخذت السويج
وعفت اهلي ما اخذت احد منهم
اريد بس الحك عليها
الطريق سويته خمس دقايق
اجه الدكتور واني شايلها
قاس دقاتها بالسماعه
ونقلناها للطوارئ
دخلت وبقيت برا اني
كعدت بالكاع
وصلت بيه ضليت أنوح وابجي
بكل عقلي تروح مني
احس بنفسي ماكو هوى اختنكت
صرت كوة اجر النفس
اجت امي وسجى مخروعات وابويه وياهم
سجى تلطم على خدها
وامي تبجي
اجه بابا كعد كدامي ويهز بجتافي
يسمح بدموعي وارد أنزلهم
فقدت وما اعرف شسوي
ثائر: سامر لتبجي البجي مو للزلم للنسوان صير قوي وايمانك بالله حبيبي والله ما بيها شي لتخاف لتخاف
عفاف: شكالولك هسه ولَك سامر
ثائر: تحاجين بالولد ما تشوفينه شلون مخروع وهابط
حطيت ايدي على اذاني ما اريد اسمع احد
مسحت وجهي وبقيت لازم راسي
حسبه تجيبني وحسبه توديني
انتظر شوكت ينفتح الباب حتى نعرف شكو
وره ربع ساعه تقريباً
طلع الدكتور
اني جنت كاعده بصف الباب بالكاع
باوعت بعينه
الدكتور: ما متاكدين بس سويت الها  تحاليل دم وتحاليل ثانويه ساعه وتطلع التحاليل ونبلغكم
سامر: شلونه وضعها عليك الله
الدكتور: ما اكدر اكلك بس ادعيلها
راح الدكتور واني صافن عليه
فقدت الأمل
فكرت بكلامه شنو يقصد
شهد حتروح مني
فكرت بهل شي وكسرت جام الباب وضليت اضرب بالحايط
سجى وامي يجروني وارجع اضرب بالحايط
اريد اطلع القهر الي بداخلي
ايدي ضلت تجري دم وصارت زركه
ضليت الهث واسحب بالنفس
مدري شجاني يمكن تخبلت
ورة ساعه
اجه الدكتور وشايل بيده الأوراق مال التحاليل
وجه ما يبشر بالخير
ضَل يباوع علينه
جر نفس وحجه وَيَا ريت ما حاجي
الدكتور: البنيه صاير عدها نزيف داخلي وبيها مرض السل الرئوي وصارله فتره بجسمها وما نكدر نسوي شي لان منتشر بكثره وما تتحمله والي اكوله الكم راح نخليها تحت رحمه الله اسف جداً
من كال هيج
اسودت الدنيا بعيني وبعد ما حسّيت بشي
كعدت على رشه مي بوجهي
فتحت عيني
اهلي كلهم يمي
تذكرت شهد ودمعت
كمت من مكاني ورجعو نوموني
سامر: خلووووني أكوم اشوفها ولكم قلبي يمها
جنت احجي بحركة قلب
دفعتهم ورحت عليها
ما نكدر ندخل الها
لان تحت المراقبه المشدده
مجرد نشوفها من الشباك
واكف والدمع تارس عيوني
على غفله اجه ايمن وعمي فاضل
اجه طبطب على ظهري
فاضل: الله يكون بعونك ويشافيها احنه جايين ناخذ بنيتنه اذا ما عدكم مانع
ثائر: اخذها بس خليك على وعدك بعد ما ياذيها
ايمن: وعد مني وداعتك عمي
اخذو سجى وراحو
بقيت مكابل الشباك وواكف
حسّيت بدوخه ورجلي مشالتني
اجت امي شالتني
عفاف: ولَك هسه ليل وانت ما مأكل من الصبح
ثائر: احنه اكلنه وشوفنه همين كاعدين على اعصابنه انت هم لازم تاكل وتصير قوي
سامر: عوفوني الي بقلبي كافي علي
عفاف : والله ندري بيك واحنه مثلك بس غير تاكل لكمه وتقوي روحك وراك تعتني بيها وتداريها غير كوّن كد قوتك
سامر: امري لله ..يمه تعبت اني
كوة حطيت كم لكمة بحلكي
وراها فرشت مصلايتي لان فاتتني الصلاة
صليت ودعيت من اعماق قلبي
وكلي ثقه برب العالمين
عفاف: يتقبل الله يمه ..هسه كوم روح للبيت اني هنا باقيه
سامر: لا ماما اني ابقه ما اكدر اعوف روحي وحبيبتي هنا تصارع وحدها
اجت كعدت يمي وتباوعلي
عفاف: تحبها ؟!
سامر: اني ما احبها بس اعشقها بنيتي طفلتي هاي
عفاف: ما اعرف شحجي والله
سامر: لتحجين يوم لتحجين المشاعر والحب شلون ما تحجين بيه وتحسين هو ما ينوصف
عفاف: هسه اني باقيه وياك وأبوك حيروح لان مناك مرت اخوك والجهال وماهر واكف برا اي شي نحتاجه هو موجود
ثائر: يلا ديرو بالكم ..ثيمالا
راح ابويه وامي نامت وأخويه ماهر كاعد على الكرسي واني اباوع من الشباك
شفتها حركت ايدها وشدت جفنها
سامر: ماهر روح صيح الدكتور على السريع
اجه الدكتور
وجانت فرصه ادخل الها
ما صدكت ولزمت ايدها وضليت أبوس بيها ودموعي على خدي
جانت تحرك شفايفها كانما تريد تكول شي
حجيت وياها
فتحت عينها وابتسمت
..عمو
حجت بصوت تعبان وكوة يطلع منها
سامر: روحه لعمو وقلبه
..لتبجي شهد قوية وما بيها شي وتبقى وباقيه لسامر
سامر: تطيبين وتصيرين زينه وتبقين يمي والي
..عمو اريد اكلك شي وانت تعرفه اكيد ودائماً اكولك اياه
سامر: احجي حبيبتي
..عمو اني احبك هوايه ومراح انسه فضلك عليه لتنسه هل شي ابد
سامر: واني احبج هوايه انتي طفله سامر وروحه وراح تبقين يمه ومراح تروحين لاي مكان
ابتسمت ورجعت غمضت عينها
بست ايدها وراسها
انداريت على ماهر
مبين متاثر ويبجي
الدكتور: يلا تره المريضه تعبانه لتبقون يمها هواي
ماهر: يلا سامر امشينه
سامر: باي حبيبتي صيري قوية علمود سامر
طلعت وعيني عليها
اجه ماهر بيده مخده وغطه
حطيت المخده على مسطره الكراسي
تغطيت بس بقيت كاعد
عيوني متنام ابد باقي بقلق ومتوتر
دك تلفوني
باوعت
خاله ام سيف؟!
سامر📞: الو هلا خاله
ام سيف📞: هلا ابني سامر ولو الوكت متاخر بس اني كلب والدة
سامر📞: خاله ليش تحجين هيج خوفتيني شكو ؟سيف بيه شي احجي
ام سيف📞: والله يا خاله سيف طالع من المستشفى صارله يومين وما ندري وينه مختفي
سامر📞: خو ماكو شي شنوو السالفه زين وين راح
ام سيف📞: ما اعرف طلع بدون ما ندري بيه وهو حالته مو زينه وصار على هل حطه يومين
سامر📞: ليش ما كلتيلي من اول ما طلع ..وثانياً هو رجال ما ينخاف عليه يرجعلج لتخافين
ام سيف📞: الله يسمع منك يا خاله بس كلبي نار عليه والله
سامر📞: ما خابرتيه سالتي عليه شي
ام سيف📞: خابرت مغلق تلفونه وسالت عليه المستشفيات والدوائر كلها محدً شايفه
سامر📞: اووووف يا خاله اووووووف فوك همي الي اني بيه همج وهم صديقي
ام سيف📞: صوتك تعبان كوّن بيك شي وشصاير وياك
سامر📞: شهد خاله شهد تمرضت وچن اني الي تمرضت مو هيه
ام سيف📞: يا عيني سودة عليه ما تشوف شر ما تستاهل
سامر📞: خاله عذريني شوكت ما افرغ ادورلج على سيف ولا يهمج
ام سيف📞: الله يسلمك وليدي تصبح على خير
سامر📞: وانتي من اهله

كلام ام سيف وشهد منا
الدنيا كلها صارت فوكي

ما غمضت عيني ابد وليلي كله بقيت كاعد اعاين عليها واراقبها

ورة ثلاث ايام!!
..............................
يُتبع♥️