دار الأيتام

البارت 10

#الكاتبة_نبأ
#دار_ايتام
....................................
سامر
من سمعت سجى اختي تصيح
دخلت مفزوع للغرفه مالتها
شفتها بالبالكون ومدنكه راسها وتصيح
دخلت للبلكونه ووجهه ضَل ينطي ألوان
سامر: لج شبيج تصيحين
سجى بتردد: هااا..هذا واحد جوه صارله ساعه يباوع علي
سامر: وينه اكسر راسه
سجى: لالا تعاااال
نزلت ع السريع
فتحت القفل مال الباب
طلعت بالشارع
التفت منا ومنا
حسّيت انحطت ايد ع أكتافي
انداريت
شفته سيف
سامر: شعندك هنا؟!
سيف: كاعد هنا يم دكان الشايب تعرفني احب هل مكان
سامر: ما شفت احد فات منا
سيف بتوتر: هااا لا ما شفت بس هسه شفتك من بعيد واجيتك
سامر: اوك ..تصبح ع خير وارجع لبيتكم عايف عرضك وحدهم بتوالي الليل
سيف: امرك ضلعي رايح
راح سيف
وضلت افكاري تجيبني وتوديني
معقوله سيف!!
لالالا مستحيل
صديقي واخوي واختي
فركت راسي وشلت هل أفكار من راسي
دخلت للبيت
شفت سجى كاعده ع ميز الطعام وتفرك بايدها
التفت علي وعاضه شفايفها
سجى: هااااا منووو؟
سامر: ما اعرف ما شفته 
سجى: لعد منو هذا الي جنت تحجي وياه بالباب
سامر: سيف جان يم دكان الشايب
سجى: هاااا خوووش خوفتني
رفعت حاجبي وخليت ايدي بجيوبي
سامر: روحي نامي
سجى: ييي تصبح ع خير
راحت
ورجعت افكاري
سجى متوتره واليوم بالعيد ميلاد نضراتهم عجيبه وهسه هوه هنا بتوالي الليل
معقوووله!!
رحت لغرفه شهد
فتحت الباب
جانت نايمه
تربعت يمها بستها برأسها وطلعت
رحت لغرفتي
ضليت افكر بالموضوع
ونمت
*سجى*
من قبل ثلاث شهور
أضل كل يوم هو روتيني بالليل اكعد بالبالكون
واسمع أغنيتي المفضله
"مثل نجمه والكمر كبر حبنه والسهر بعيونك حبيبي نقتدي دروب السفر"
لاحظت فد يوم شخص يراقبني من جوة البالكون
مديت راسي
هذا سيف شجابه هنانه
اني من اشوفه ادخل لغرفتي
على فد يوم
همين جنت كاعده
من شفته ردت ادخل
سمعت صوت صاحني بقوه
انداريت سمعته يصيح علي
سيف: سجججججى
سجى: شتريد لك !!
سيف: يبنيه عيونج جنهم نجوم يلمعن شعرج سواد الليل استحه من سواده وجهج
والكمر واحد اناااا قلبي القوي يرف يم طولج عشك اححححبج يبنيه توبيني عن حبج
اسمع كلامه واني ذايبه
طريقه القائه ونبره صوته دخلت لقلبي
اجذب عليكم اذا اكولكم ما احبه
بس أكابر
بعد صفنه استوعبت
سجى: واني هم احب نفسي أشكرك
دخلت لغرفتي
قلبي يرف حيل وتوترت
ما اصدك يبادلني نفس الشعور
نمت بيومها واني فرحانه
ضلينه نتواصل بالتلفون
واحلى الكلام والحجي المعسول
اجت الجامعات
وصرنه نلتقي بالكليه
اني ادرس صيدله وهو اداره واقتصاد وي سامر
مرات نوكف وحدنه ونحجي
ومرات سامر ويانه تضل بس النظرات بيناتنه تحجي
اليوم
من خلص العيد ميلاد
دزلي مسج
سيف💬:طلعي بالبالكون انتضرج
طلعت وابتسامتي ع وجهي
اتصل علي
ضلينه واحد يباوع ع الثاني ونحجي بالتلفون
من سمعت طكطكه يمي
ضليت اصيح بالتلفون سده لك سده روح روح
وهو معاند
اخير شي دخل سامر وسديت التلفون
ارتبكت وجان الخوف مبين علي
من استفسر مني
نزل جوه واخذ قلبي وياه
طلع بالشارع ومن الخوف كعدت بالمطبخ انتضره
ضليت ادعي ما يشوف سيف
من دخل جانت عيونه بكصته
مبين ضايج
ضليت اطكطك بأصابعي
مرت ع خير وعدت
رحت لغرفتي
خابرت سيف اطمن عليه
ودعته ونمت
...........................
سامر
كعدت من النوم
وبعده ع بالي موضوع البارحه
بدلت للجامعه
نزلت
العائله كاعده ع الميز
عفاف: صباح الخير
سامر بنرفزه: صباح الانوار
عفاف: شبيك عافس الوجه من الصبح؟
سامر: هيج ضايج من موضوع
باوعت لسجى وجهه ضَل ينطي الوان
عرفت وراها شي
اختي ولازم اكعد وياها واصارحها
نزلت شهد من الدرج
مبدله لملابس المدرسه
اميرتي الصغيره كل يوم تكبر وتحله
شهد: صباح الخير
سامر: صباح العسل يحلوة
شهد: صباحك مثلي عمو
من تكول عمو قلبي ينقبض بس امشيها
اجت بوستني
سامر: يلا اروح اني
شهد: تكدر توصلني وياك اليوم ابو الخط مالتي متاخر
سامر: يلا امشي غاليه والطلب رخيص
وصلتها للمدرسه
وطلعت للجامعه
صار بوجهي سيف
صرت احس تجاهه بشعور مصحوب بالخيانه
ما اصدك انو جان بالصدفه فايت من الشارع
مثلت ما مهتم للموضوع
سيف: صباح الخير ضلع
سامر: صباح الخير سيوفي
كعدنه شويه سولفنه عن اهله وأهلي
ما فتحت الموضوع ابد
دخلنه للمحاضره
بالريست شفت سيف وسجى كاعدين بالكوفي
جان شكلهم عادي
يوحي انو مجرد زملاء
رحت عليهم
تصرفت عادي
بس يضل الشك يأكل بروحي
خلصت الجامعه
جنت طالع بالبوابة
اجت سجى
سجى: اليوم صديقتي غايبه أخذني وياك
سامر: اختي حبيبه الروح تفضلي
حاولت افتح وياها الموضوع
واحنه بالسياره
بس استحي أو بالأحرى الشغله ثقه
دخلنه للبيت
بيت عمي موجودين
كلهم ملتمين
سلمت وكعدت يمهم
شهد ما موجوده وهل شي يطمن
فاضل: اني جاي اريد أخطب بيتكم لابني
جان حجي عمي مثل الصاعقه
بس بداخلي جنت راضي
سجى باوعت الها كامت من مكانها
وجان قرارنا؟!
........................
يُتبع
——————-
هلاووو
ادري مقصره وياكم
بس كلش مريضه
فوك الدراسه والمشاكل والضغوط النفسيه
ان شاء الله أكملها بأسرع وكت
وشكراً♥️