دار الأيتام

بارت 13

#الكاتبة.نبأ
دار الايتام
هلاوووو بارت للسهرانين♥️🌝
...........................
*سامر*
مرت اليومين وطلعت سجى من المستشفى
واليوم عرسها
اليوم عرس اختي
اليوم الكل فرحان
بس بنفس الوكت حزنانين
لان راح تروح الاميره من قصرها
وديتها للصالون هيه وامي من الصبح
جنه ماخذين اجازه من الكليه لحد ما يصفه الوضع نرجع نداوم
جان بيتنه مخبوص
هواي ناس
خوالي وخالاتي وعمامي وعماتي وأصدقائنا من الكليه والجيران كلها متجمعه
معروفين بمنطقتنه بالكرم وصاحبين فضل على المنطقة
لهذا الناس دائماً تحاول ترد الجميل النه واحنه نقدر هل شي
باوعت لساعتي
ما بقه شي واروح اجيب عروستنه
رحت لبست قاطي
من صدوك مبين علي اخو العروس
نزلت جوة
واني شلت راسي
شفت ملاك بذاته واكف كدامي
لابس فستان احمر مدنفش
الشعر نازل وملتف
الخدود الحمرة قضيه ثانيه
ما كدرت ارمش عيني
قلبي صار يطبل من كثر الجمال
اجت علي تركض
صارت تتخصر كدامي وتضحك
شهد: عمو طالعه حلوة
دائماً كلمه عمو تنرفزني بس اتحمل
ابتسمت بوجهه
لزمت ايدها وبستها
سامر: تخبلين اميرتي الحلوة
ضربتني راشدي خفيف بشقه
شهد: وانت تجنن يا احلى امير بالدنيا
فرحتني
سامر: شنو رأيج اميرتي نروح نخطف العروس من الصالون
شهد: خوش فكره واني بظهرك راح أتسلل
سامر: عفيه عليج طالعه عليه تفكيرج اجرامي
صعدنه بالسياره
شغلنه اغاني
وما قصرنه بالركص
وصلنه للصالون
اجت العروس
اجت الاميره
جانت قمه بالجمال
بس ملامح وجهه ما عجبتني
جانت ضايجه وحسيت بيها
بس ما اعرف شلون اقنعها هل شي لمصلحتها
باركتلها
ما ردت علي
وصلنه للبيت
هيه دخلت جوه
واني رحت بالديوان يم الزلم
شويه وسمعنه
اجت الزفه
وصارت الهلاهل والطبول والجكليت
والفرح يعم المكان
بس؟!
ما دامت هل افراح
سمعنه صوت الطلق والصياح
اجه شخص هاد علينه
ما جان الشخص الطيب الي اعرفه
وحش وعيونه حمره وشكله متغير هواي
جانو وياه شيوخ
وهو شايل رشاشه
بس جانت هيبة شخصيته اقوى من الرشاشه الي شايلها
سيف: وقسماً عظماً ما نطلع منا الا اخذها هل مره يا اني يا انتو
طلعو ابويه وعمامي
فاضل: انت منو يلفرخ جاي علينه شنو شايفنه كدامك فروخ ونلعب وياك ونرجع وننطي البنيه صارت النه وما ننطيها
سيف: ترا تصير مو خوش والعباس اخذتوها مني واني مسكور خاطر من صاحبي قبل اهله ردتها بالحلال منكم ما نطيتوني لان تعيروني بل فقر وما عندي أهل لا السالفه هنا وبس هذولي الي جايبهم وياي كلهم اهلي وناسي ويسدون عين الشمس واني قبل ما اهلي يردوها الي قلبي يريدها
طبعاً جان سيف يحجي ومفور ويحجي بكل قوة ولأول مره اشوفه هيج
اصطكيت بمكاني
هذا مو سيف الي اعرفه
انسان ثاني
فاضل: شكلك مراح تفهم هيج يراد نتصرف غير تصرف
ما احس الا صارت مشاحنات وناس تدفع بناس
اني بالي كله راح يم سيف
اريد اشوفه ماكو ناس هواي
ما سمعت بس صوت طلق وكف شعر راسي
هدء الوضع شويه
وصارو يبتعدون ويتفاككون
ما شفت غير سيف مدد بالكاع
وبالجهه الثانيه مصوب ايمن
والدم بكل مكان
فقدت أعصابي وصارت رجلي تاخذني اله  لا ارادياً
ثائر: اذا توصل لصاحبك اعتبرني متبري منك
ما اهتميت لكلام ابويه
اني بيدي السويج شلت سيف ع كتفي ومشيت
ما دريت بالدنيا وين صفت
صارت روح صديقي بروحي
ما حسّيت بس دموعي على خدي
و امشي بكل سرعتي
مثل الي كاعد اتسابق وي ملك الموت
وصلت
وراسن لغرفه العمليات
كعدت متربع بالكاع ولازم راسي
والنفس كوة اجره
دموعي بطرف عيني
ورة شويه
ما سمعت بس صريخ جاي من بعيد
جانت ام سيف وسما
كمت على حيلي
اجت امه لزمتني من ياختي
ام سيف: بزري سامر ابني الوحيد اذا يروح مني صدكني لا انت واهلك تبقون عايشين
سامر: خاله تفائلي بالخير وانت مثلي امي وسيف اخويه واكثر وخايف عليه مثل ما انتي خايفه عليه ميحتاج تكولين هيج
كعدت بالكاع وضلت تون وتلطم
سما انتبهت لنظراتها بين امها وبيني
ما اعرف ما اهتميت
سامر: خاله حبيبتي ادعيله بدال ما كاعده تلطمين مفاوله الولد بالموت
رحت وكفت يم الباب مال الانتظار
اريد بس احد يطلع ويطمني
لان الخوف الي بداخلي يمكن اكثر من والدته
درت وجهي ع الممر
اجه ماهر
ماهر: هاااا خويه بشر ؟
سامر: ما اعرف بعد ما طلع احد ،..شصار هناك؟
ماهر: لو تشوف الدنيا انكلبت البيت صار هوسه سجى تخربطت وايمن مصوب وأخذوه للمستشفى وبيت عمي ما خلو سجى تبقى هل يوم يم اهلي خذوها لان عروسه وشهد خبصت الدنيا بالبجي تريدك ابويه ما راضي عليك والوضع صاير صعب فد نوب
ضليت امسح ع وجهي ورفعت شعري بغضب وضربت الحايط الي بصفي
سامر: استغفررررر الله الواحد شوكت يرتاح
ماهر: هدي هدي مو هيج استهدي بالرحمن
بهل اثناء طلع الدكتور
كلنا اتوجهنه عليه
الدكتور: حاله المريض حرجه جايه الرصاصه بصدره ومسويه نزيف داخلي واعصابه تالفه واثر الوكعه صاير عنده تمزق بإربطه الكتف وحالياً محتاج دم
ام سيف: يمه وليدي يمه
ماهر: خاله على كيفج وي نفسج ندري بيج خايفه بس مو هيج
سامر: هسه عوفونه منكم رايح اتبرع اني
من جنه مراهقين وعمرنه قابل للتبرع
نروح للمراكز ونتبرع ومن خلال هل شي عرفت دمي يطابق دمه
رحت تبرعت وأخذوا مني بطل ونص
رجعت لمكان الانتظار
سما تقره قران وأمه تِسْبح وتدعي
سما مواليد 1996همين جانت ويانه بالمدرسه
بنيه ناعمه حنطيه عيونها عيون سيف صفره مؤدبه عمري ما شفت منها شي غلط
جنت أتمشى بالممر
وسمعت صوت الاذان
جان اكو جامع بصف المستشفى
رحت واني كلي خيبه ومذلول
بقيت اصلي وكاعد بالجامع
ضليت ادعي من كل قلبي الله يحل المشاكل ويزيل همومي
طلعت وتلكاني رجال جبير بالعمر
مبين من أهل الخير
حجه وياي:
..الله يطيب بخاطرك ابني
سامر: الله يسمع من حلكك حجي ويطيب بخاطرك
..شكلك يُبين عريس وطالع من عرسك
ضحكت ضحكه قهر
سامر: حجي انت على فطرتك بس ادعيلي
رجعت للمستشفى
ماهر : تعال ترا سيف فكه البنج وكلنا يمه كاعدين
من كال هيج رحت كبل عليه
دخلت اله
ردت اروح احضنه واسلم عليه
ترددت
ضَل يباوع علي بنظرات كلها عتاب وقهر
ضلت بيناتنه العيون تحجي
ورجع بداخلي الحقد ودرت ظهري
سامر: الحمدلله ع السلامه دير بالك على نفسك
بعدني هستوني دا اطلع من باب الغرفه
حجه بصوته التعبان والخامل
سيف: دير بالك على سجى سامر
درت طرف وجهي عليه
ورحت وطول الطريق افكر
رجعت للبيت
ما ينعرف هوسه
جانو يمنه خالاتي
سلمت عليهم
وامي كاعده يمهم
باوعتلي وحجت
عفاف: تعوف ابن عمك وتروح تشيل الي طعنك بظهرك ومشه
حرامات التعب بيك ابن بطني
سامر: بلا كلامج هذا الفارغ ترا واصله عندي فد نوب وضايج
صعدت بوجهي فوك
لزمت قبضه باب غرفتي وتذكرت شهد
رحت لغرفتها
كاعده تباوع على التلفزيون ومتغطيه
اجيتها من وره
سديت عيونها
شهد: عمو سامر ماكو غيرك
وخرت ايدي وباوعتلها
باوعتلي وابتسمت وحضنتني
شهد: مشتاقتلك هوايه
سامر: حبيبتي اني اكثر شهودة الكتكوتة
شهد: والله خفت عليك اليوم وضليت ابجي لا يصير بيك شي
سامر: فدوة للي يخافون علي لتبجين يمج اني حبيبي
برطمت ورجعت حضنتني
شهد: اني احبك لتعوفني
جانت اول مره تكولها
رمشه عيني وقلبي ما اعرف صار يقره الف نبضه
صحيح جانت كلمتها عفويه بس تعنيلي
سامر: عيدي شنو كلتي
شهد: اني احبك لتعوفني
سامر: بعد مره بصوت اعلى
شهد: انييييي احبككككك لتعووووفني
عضيت شفتي وهزيت راسي
سامر: واني أحبٍّـج همين هواااايه
شهد: دقيقه اشتريتلك شي بس ها غمض عينك ميصير
سامر: يلا غمضت
شهد: يلا افتح
فتحت عيني جان اكو علبه بيها سوار وبيه مداليه حرف s
شهد: ما طول هسه انت لابس قاط وطالع تجنن خليني البسك السوار
سامر: بمناسبه شنو جبتيه
شهد:مثل ما انت تجيبلي هدايا اني هم جبت هاي من مصروفي
لبستني اياها وجانت لمسات ايدها دافيه
مدنكه راسها واني سرحان بيها
شهد: وهوب خلصت وطلعت حلوه
سامر: شكرا شهودة حبيبي عجبتني
تثاوبت وصارت ترمش
سامر: ها اجت النعوسه يلا نامي
شهد: حباب ابقه يمي والله اضوج وحدي
سامر: زين خل ابدل واجي لو هم ميصير
شهد: هسه بس نومني وروح حباب
انوب ضلت تفتح عينها وترمش الي
سامر: خرب بليسج راح اجرم بيج وحاضر اني أميره شهد
راحت ع جربايتها نامت
شهد: تعال اكعد يمي لحد ما انام
رحت كعدت يم راسها ع طرف الجربايه وضليت امسح على شعرها
جان أشبه بالحرير لونه العسلي يجذب
خدودها حمره وشفايف ورديه ومبرطمه عيونها مجروره وخضره فاتح
بياضها تكول قشطه وعاجنينها بماي دجله
رفعت راسها وابتسمت وحطت ايدها بايدي
تلعب بناري بت اللذين
سامر: نامي لج
هزت راسها بمعنى اي
واني جنت صافن وافكر
ما حسّيت على نفسي وغفيت
..........................................
يُتبع..