حدث بالفعل "قصص حقيقية"

الحياة وسط الجان

تنويه ...
القصة منقولة حرفيا على لسان احد اصدقائي دون زيادة أو نقصان ،،
لذا لا تنسوا ان العهدة ع الراوي ...

انا حرفيا كنت عايش مع العفاريت.. انا من الصعيد؟. وفي يوم قررت اني اسافر القاهره واشتغل واستقر هناك..
قصتي بدأت لما كلمت سمسار عشان يشوفلي شقه ف القاهره ف اي مكان عشان هسافر واستقر هناك.. وفعلا جمعلي شقه دور خامس اوضه وصاله.. روحت شوفتها وعجبتني واتفقنا خلاص وروحت مكانش وقتها معايا غير شنطه هدومي.. الشقه فاضيه مفيهاش ولا حاجه.. قررت انزل اشتري سرير ومرتبه أنام عليها و بطانيه.. وعشان أوفر جبت حاجات مستعمله قولت لحد ما يبقي معايا فلوس واجيب الجديد..
اول يوم عدي عادي جدا.. تاني يوم وانا نايم لقيت السرير بيتهز بيا وكأن في زلزال صحيت مفزوع قولت يمكن فعلا زلزال.. لكن مكانش في اي حاجه بره تدل ع كدا..
انا اكيد بحلم.. ايوه بحلم.. نمت وصحيت روحت الشغل.. وانا راجع دخلت المدخل وطالع لقيت واحده ست كبيره ساكنه ف الدور التالت.. قالتلي يابني انت اللي سكنت ف الشقه اللي فوق.. قولتلها اه. قالتلي ومش خايف 😳
انا إستغربت وف نفس الوقت جسمي تلج.. طلعت من غير ما ارد عليها.. دخلت الشقه..بفكر ف كلام الست دي.. وافتكرت السرير لما اتهز بيا.. قولت لا دي ست كبيره ومش عارفه بتقول إيه.. بحاول اصبر نفسي بأي فكره...
نمت.. فجأه لقيت ايد مسكتني من كتفي..وأصوات الحلل لما بتوقع ف الارض وتعمل صوت جامد..في حين اني معنديش حلل أصلا..انا مش معايا غير شنطه هدومي.. صحيت من النوم جسمي متلج ومش حاسس بأيدي ولا برجلي... كانت الساعه 3 الفجر قومت بشوف المطبخ ملقتش حاجه المطبخ فاضي أصلا.. قريت ايه الكرسي ونمت..
روحت الشغل تآني يوم وانا راجع لقيت اتنين ستات واقفين قدام شققهم.. بيتكلموا مع بعض وبيقولو هو إزاي عايش فيها.. واول ما شافوني سكتو وبصولي بصات خوف.. انا مسألتش وطلعت..
لكن و انا ونايم بقيت سامع حد بينده اسمي.. بس الصوت ف راسي..
بقيت بدخل المنطقه كله يبصلي ونظرات كلها خوف...
اكتشفت بعد كدا ان الحاجات اللي جبتها (السرير والمرتبه و البطانيه ) سببتلي مشاكل اكتر..

بعد احداث حصلت معايا ف الشقه..
( باب الاوضه يتقفل بقوه رغم اني مفيش هوا اساسا.. ارجع مالشغل الاقي هدومي كلها بره الشنطه.. اطفي النور أنا وخارج وارجع الاقيه منور )..
قررت اتعايش مع وضعي واستسلم.. بقيت بسمع الاصوات بليل.. واقوم اقولهم اسكتو عاوز انام.. وفعلا كانو بيسكتو.. أوقات كنت اسمع صوت أطفال بتقولي تعالي العب معانا.. مبقتش بخاف خلاص واتقألمت..اليوم اللي هاسيب فيه الشقه كان لسبب.. حصلتلي حاجه غريبه
انا كنت برجع من الشغل متأخر ع حوالي 2 بليل.. بيكون في كلاب ف الشارع
وانا بطبيعتي بخاف من الكلاب
وكان في كلب معين شكله مرعب كل يوم كنت بحاول اعدي بسرعه قبل ما يشوفني اليوم ده الكلب اول ما عديت شافني وجري ورايا.. طبعا انا جريت واستخبيت ف محل ملابس لحد ما يمشي.. استنيت لحد ما مشي وجريت ع الشقه..
قاعد بليل وبفكر لو الكلب كان عضني ولا حصلت حاجه.. غلبني النوم ونمت.. حلمت ف اليوم ده اني رجعت للكلب وموته.. بسكينه.. صحيت مخضوض وجسمي بيترعش ورجلي وجعاني.. قولت يمكن من الجري من الكلب.. روحت الشغل تاني يوم عادي..
وبليل بقا بتبدأ المأساة مع الكلب اللي بخاف منه.. ن،زلت من العربيه واتمشيت للبيت وانا ببص ع الكلب فين عشان اعدي زي كل يوم.. وانا بدور ع الكلب.. لقيته فعلا مقتول😳 وبردو مضروب بسكينه.. قربت منه لقيت نفس السكينه اللي حلمت وانا وبقتله بيها 😳😳
جريت وقررت اني مش هبات فيها تاني.. كلمت واحد صاحبي.. وقعدت عنده الليل ده.. تاني يوم اخدت شنطتي اللي حيلتي ووديتها عنده.. وروحت الشغل.. كلمت السمسار قولتله تجملي شقه بأي طريقه.. وفعلا عدي يومين وكان متصل بيا وبيقولي إنه جمع شقه.. ف نفس اليوم روحت أخدت البطانيه والسرير والمرتبه.. وديتهم الشقه الجديده....
قولت أخيرا هنام بهدوء ومن غير قلق..ف نفس اليوم اللي نايم فيه ف الشقه الجديده.. حصل معايا نفس اللي كان بيحصل ف الشقه القديمه.. نفس الأصوات.. نفس صوت الأطفال.. نفس الباب اللي بيتقفل.. صوت نفس كأن حد بيتنفس طالع من الصاله.. انا فاكر اليوم ده.. انا فعلا تعبت جامد وجسمي سخن ونمت وأنا كدا.. حلمت ان حد بيحطلي كمدات وبيقولي هتبقا كويس بكره.. بس متسبناش تاني.. وواحده بتقولي انها هيا اللي قتلت الكلب اللي بيخوفني والمفروض إنك متسبناش..قالتلي احنا بقالنا سنين عايشين لوحدنا واحنا مكناش مضايقين منك.. احنا كنا مضايقين من اللي جبتهم معاك.. صحيت بفكر ف الكلام.. قولت لنفسي انا مجبتش حد معايا انا جيت لوحدي..مكانش معايا غير شنطه هدومي.. افتكرت البطانيه والمرتبه والسرير 😳😳

بعد كدا مشيت من الشقه الجديده وروحت قعدت مع قرايبي وخليت البطانيه والسرير والمرتبه عندهم
وف نفس الليله اللي اديتهم الحاجه
جدتي بقت تقولي انا بشوف خيالات وبتسمع اصوات أطفال بتعيط.. قولت أكيد العيب ف الحاجات اللي جبتها دي
تلاقيها مسكونه.. روحت سالت الناس اللي بتكون بتبيع حاجات جنب الراجل ده.. لان اليوم اللي روحت اسأل فيه ع الراجل مكانش موجود.. روحتله تاني يوم قالي فعلا هو بياخدهم من السجون وبيبعها تاني كانت بطانيه واحد مات ف السجن.. واللي بعهالي بيسترزق بيها
اخدت البطانيه وحرقتها.. ومن يومها حرمت اشتري حاجات مستعمله تاني...

ان صادفكم اي موقف او حدث يشبه ما قرأتموه ارجوكم شاركوه معنا ...

واخيرًا احب اقول شكرًا من كل قلبي لكل من يدعمني ويقرأ ما اكتبه
اتمنى ان اكون عند حسن ظنكم...