حدث بالفعل "قصص حقيقية"

سرداب الشر

القصة على لسان احد اصدقائي ...
وللتذكير انا لا اضيف ولا انقص شيئاً من القصة فقط انقلها لكم كما حكاها لي حرفيا دون زيادة او نقصان
والعهدة ع الراوي..

مكنتش اول مره اسمع عن الجن ال بيسكن الاراضي الزراعيه وزي مابيقولوا المزارعين بقينا متعودين من صغرنا اننا نسمع او نشوف بس عمرنا مادخلنا في ال ملناش فيه..
اايوه بالظبط انا عملت عكسهم بالظبط واتدخلت ف حاجه متخصنيش ودا كلو بسبب الفضول ال دايما بيوديني للمهالك...
تبدأ  الحكايه اني من وسط ناس مزارعين والحياة الريفيه جميله جدا وممتعه جدا بحكم اني من صغري ف الريف وكنت بساعد والدي ودايما لو روحت للأرض  اروح معاه واني لما خدت خطوة جديده وروحت الجامعه وعيشت وسط المدن وعرفت الفرق بينهم خلاني بحن جدا للريف والهوا والهدوء وكل حاجه...
من صغرنا بنسمع عن ال الناس بتشوفه او بتسمعه ف الاراضي الزراعيه وخاصة في موسم الذره.. ومن تهويل وقصص يخوفوا بيها الاطفال وان محدش يخرج باليل من غير مايعرف والده وكدا..
ولحسن حظي جت زياره للاراضي دي ف موسم الذره كنت ف الجامعه ونزلت لان والدي تعبان ونزلت اطمن عليه ، نزلت واطمنت عليه وكان تعبان مبيقدرش يتحرك عرفوني ان الارض من فتره ووالدي مراحش هناك وكان لازم اروح بنفسي اسقيها عشان متموتش ونظرا لاني راجع للجامعه الصبح ف كان لازم اروح دلوقتي اسقيها ايوه الساعه 9 باليل طبعا ف الريف 9 دي متأخر  لكن عادي خدت المعدات  وركبت الحمار ومشيت ..
بسلي نفسي سواء بغني او بخبط بأيدي  كدا ، سمعت صوت بيغني معايا!
كان صوت بيغني معايا ولو طبلت بإيدي كان هو يصفر حاولت اركز لكن الحمار بصوته المزعج شتت تركيزي قولت يمكن عشان المكان خالي  ودا صدي صوتي وممكن صوت الحشرات هو صوت الصفاره وحاولت اسكت الحمار بأي طريقه لعند ما في النهاية سكت لكنه كان بيجري..  بيجري كأنه  مابيشدش حمل تقيل ابدا كأنه  بيهرب من حاجه..  وصلت الارض والمكان ال مفروض اجهز الساقيه فيها ..
لكن بمجرد ما نزلت الحاجه سمعت صوت حاجه تقيله بتترمي ف المياه وكان باين انها تقيله من صوت الضربه ف المياه وصدي الصوت العالي جدا ال عمل رهبه ف المكان كله....
وانا واقف بكل ذهول..