حدث بالفعل "قصص حقيقية"

نذير الموت ..

مرحبا صديقي الا زلت حياً ..
آمل انك لازلت تتذكرني ..
لكني اليوم لن اروي لك احد الاحداث التي حدثت لي بل سانقل لك موقفا حدث بالفعل لأحد الاشخاص الذين عرفتهم صدفة ..
هذا الموقف نقلته عن لسانه كما هو دون تحريف او تزويد او نقصان ، وسواء صدقت او لا فهذا يعود لك ؛ والعهدة على الرواي ...
لذا لن اطيل عليك ، هذا الموقف حدث لشخص يدعى "م" ويقول ...

الموقف ده حصلي وانا رايح مطروح على طريق السفر بالليل
فانا متعود طول عمري على السفر بالليل وناس كتير بتحب السفر بالليل ،وطالما ماببقاش لوحدي مببقاش خايف يعني ببقا مطمن شوية وحاسس ان كل حاجة ان شاء الله هاتبقا تمام
المرادي كنت مسافر مع صديق ليا اسمه حازم ، خدنا العربية وانطلقنا ف الطريق بتاعنا وكانت الساعة تقريبا ١١ بالليل، عدينا على الاسكندرية وطريق العلمين والمنطقة بتاعت تجمعات القرى السياحية دي وبدأنا  ندخل على المنطقة الصحراوية الفاضية
كنت مركز جدا على الطريق عشان المنطقة دي بتكون  خطر بالليل مش خطر حاجة عفاريت وحاجات من دي لا خطر عشان  العربية فجأة ممكن لا قدر الله يحصلها حادث
لاقيت مرة واحدة حازم بيقولي هو العربية اللي ورانا دول صحابك ، انتا متفق مع حد ولا حاجة يطلع بعربية ورانا عشان يونسنا
فاستغربت من كلامه جدا وقولتله ... لا انت ليه بتقول كده
قالي .. اصل الراجل اللي سايق العربية اللي ورانا دي شايفه في المراية كل شوية عمال يشاور فقولت جايز تعرفه ولا حاجة
بصراحة ماكنتش واخد بالي من الموضوع بس لما بصيت ورانا شوفت فعلا عربية سودة والسواق عمال يشاورلنا من ورا الازاز بتاع العربية، بس مكانش بيشاور ده كان بيحرك ايده بطريقة هستيرية اووي
انا قولت في حاجة مهمة اوي ولا في مصيبة في العربية بتاعتنا ، ما اكيد يعني مالهاش معنى تاني سبقت بالعربية اودام اسرع اكتر وركنت ، ووقفت بسرعة عشان استناه واشوف عايز ايه بس الصراحه كنت قلقان ، ماهو مافيش امان اليومين دول وكلنا عارفين اللي احنا فيه
لاقيت العربية بتاعته جاية ناحيتنا بس جاية بسرعة كبيرة اوي مش سرعة حد هايوقفلنا وقبل ماتدخل فينا فجأة العربية انحرفت على جنب واتقلبت حوالي خمس او ست قلبات
طبعا انا صرخت وحازم فضل يزعق ، وطلعنا نجري ناحية العربية نحاول نعمل اي حاجة والطريق كان ضلمة طبعا تماما ، مافيش غير عمود انارة واحد ولا اتنين موضحين الطريق بشكل مشوش ، وصلنا للعربية واول ما بدأنا نقرب منها شوفت منظر مش ناسيه لحد دلوقتي ..
العربية كانت متكسرة ومدشدشة ، بس كان في واحد واقف على العربية ، قسما بالله كان في واحد واقف فوق العربية المتكسرة
لو قولتلك ان هو زي ما يكون طيف او دخان ، لونه فاتح كده، هدومه، وشه  كله كده على بعضه لون واحد زي ما يكون صورة سينما كده ، وكان واقف متصنم لا بيتحرك ولا بيعمل حاجة وده طبعا ماكنش طبيعي بالنسبالي ، انا طبعا شوفته من هنا وقلبي انقبض جدا واتجمدت ف مكاني ، ولاقيت حازم عمال يقول .. اعوذ بالله من الشيطان الرجيم ايه داا يلاا بينا ، لاقيته بيشد دراعي وبيقولي يلا نمشي من هنا
قولتله طب والراجل اللي جو العربية ، قالي جو العربية ايه انت مش شايف اللي واقف ده ، ماكنش في حد جو العربية على فكرة حازم سحبني من دراعي وبدأت ارجعولورا وكل شوية ابصله عايز افهم ده ايه
بقوة حازم وشده ليا مشيت وركبت العربية تاني
اما وصلت العربية قولتله في ايه ، قالي انت ماشوفتش الراجل اللي كان واقف ، قولتله واللي جو العربية ، قالي انا بصيت جو العربية ومكانش في حد ، انت ماخدتش بالك يعني من حاجة كده
قولتله ماخدتش بالي من ايه ، قالي العربية دي زي ماتكون قديمة كده وعليها كمية تراب اكيد ماجلهاش يعني لما اتقلبت دلوقتي دي زي ماتكون مقلوبة بقالها سنتين تلاتة
يعني ايه ، يعني العربية دى مش عاملة الحادثة دلوقتي ، قالي ايوة طبعا اكيد مش عاملة الحادثة دلوقتي وانا متاكد لو كنا وصلنا قبل كده ماكناش هنلاقي حاجة جوة ، واكيد الراجل اللي كان واقف على العربية ده يبقى جثة الراجل اللي كان ميت جوة العربية
يعني ايه ، يعنى الراجل اللي كان واقف ده ايه راجل ولا شبح ولا جن ولا ايه
قالي جن بقا ولا ملاك الموت انا ماعرفش عمرك شوفت واحد يبقا واقف كده عامل زي الدخان
رغم ان انا مابقتنعش بالكلام ده بس كلامه كان مقنع ، فالشكل اللي انا شوفته كان عامل زي الدخان او طيف بس على شكل بني آدم
مشينا وكملنا السكة ومافتحتش الموضوع ده تاني بس حازم بردو ماكنش بينطق وروحنا مطروح وصلنا الشقة اللي بنقعد فيها ، وبردو ماكلمنيش سابني ودخل الاوضة بعد شوية خبطت عليه عشان اشوفه ماله في ايه ، قالي لو سمحت سبني شوية علشان انا تعبان دلوقتي ، ما اكيد هو تعبان من الصدمة بس ف نص الليل صحيت على صوته وهو بيعيط وبيطلع منه اصوات عاملة زي ماتكون حدبيزوم او حد بيتكم مش فاهم ، فتحت باب الاوضة بالراحة ودخلت لاقيته نايم عادي جدا
تاني يوم الصبح دخلت لاقيت حازم مااات ...
اربطها بقا بالاحداث ماربطهاش بالاحداث هو مات ..
واللي شوفته ده ماكنش المرة الوحيدة اللي اشوفه فيها ، شوفته تاني مرة يوم جنازة حازم ،كان واقف بعيييد زي ما بيجي ف الافلام وكان جاي ناحية القبر بتاع حازم بس المرادي كان بالنهار وكان شكله واضح جدا زيه زيك زي اي بني ادم عادي بس الفرق انه كان شاحب شوية ولونه مدي على الرمادي شوية في شحوب الميتين
وانا عمال ابص حواليا مافيش حد ، كلنا واقفين عند الترب وهو جاي م بعيد ماحدش مركز معاه غيري
ومات حازم والموضوع انتهى وماحدش يعرفه غيري ،بدات اسأل وادور وجالي ردود كلها مش مختلفة مع اللي انت ممكن تفكر فيه بس في رد واحد اتقلي ان ده اسمه نذير الموت واما حد بيشوفه بيبقا معناه ان معاده قرب والله اعلم ، قالولي بردو بيظهر في الاماكن الفاضية كتير ،واحيانا كتير بيظهر في الاماكن اللي بيكون حصل فيها حادثة ، وساعات بيظهر للشخص اللي بتكون نهايته قربت ومابيبقاش فاهم ايه الرسالة المطلوبة لحد مايموت
واللي قالي التفسير ده قالي ..بص تجنب الاماكن الفاضية وماتروحش المكان اللي شوفت فيه الراجل ده بعد كده ....
وده اللي حصل معايا ..