مجرد اختلافات

البارت ١

ردام- السلام عليكم اني ردام عمري ٢٩سنة اشتغل ضابط برتبة ملازم اول ساكن ويا والدتي واخوتي عائلتي متكونة من والدتي
-والدي توفى قبل ٨ سنوات جان يشتغل نائب ضابط متقاعد امنيتة يشوفنة ضباط والحمد لله وصلنا هالشي اني واخوتي وحققنا الي تمنى
-بسام اخوية الجبير عمرة ٣٥ سنة ضابط برتبة نقيب متزوج سارة بت عمي وعندة ٣ اطفال نور وتقى وعلي
- شهد اختي الجبيرة عمرها ٣٢ سنة خريجة تربية اسلامية متزوجة  نقيب قيس صديق بسام وعدها اطفال ثنين عبد الهادي وعبد الخالق
- اني ردام عمري ٢٩سنة ضابط برتبة ملازم اول اعزب
-رفل اختي الوسطانية عمرها ٢٥ سنة خريجة تربية لغة عربية متزوجة ابن عمي خليل وعدها طفلة بنين
-وسام اخوية الصغير عمرة٢٣ سنة طالب كلية عسكرية اعزب
-رغد اختي الصغيرة عمرها ٢٢ سنة طالبة كلية تربية جغرافية مخطوبة ل مرتضى طالب وياها بالكلية

،،،،،،،،،،،
كعدت بالخمسة الصبح دخلت للحمام حلقت لحيتي وغسلت وطلعت صليت صلاة الفجر لبست الزي العسكري والبسطال شلت سلاحي بخصري وكفت كدام المرايا عدلت البيرية على راسي تلمست لحيتي اتأكد منها ماكو شعر رشيت عطري شلت السويج والجكاير وموبايلاتي وطلعت بعد ماطفيت الضوة وسديت الباب وراي صارت بوجهي الحجية وهي كاعدة ع التخم بالصالة الداخلية وكدامها القرآن ولابسة نضاراتها ويا ماسديت باب غرفتي رفعت راسها ونزلت نضارتها شوية وباوعتلي من فوك النضارة صدقت وسدت القرآن وباسته ورفعت راسها
الحجيةبابتسامة :هلا هلا بهالصباح
ردام بابتسامة تقدم وباس راسها: صباحج جوري حجية جورية
كرفصت كدامها وايدي على رجلها
الحجية:اروح فدوة لهل طول والهيبة اكوم احضرلك الريوك
ردام:لا لا يمة كعدي واستريحي نفسي مارايدة
الحجية:ليش يايمة خيرك بس لا مريض
رفعت ايدها تتلمس كصتي لزمت ايدها وبستها
ردام: لا والله يمة مابية شي لتعبين نفسج
الحجية: يمة ماكو تعب
ردام:يلة يمه هم يلة اروح لدوامي
كمت وكفت لحيلي :ادعيلي يمة
الحجية: الله وياك يمة محروس من كل عين حوطتك بأسم الرحمان دربك مفتوح ان شاء الله
طلعت من الصالة واني اسمعها تدعيلي فتحت الباب وطلعت للكراج صعدت سيارتي حميتها ونزلت فتحت الباب وصعدت للسيارة رجعتها ليورا وطلعت من البيت نزلت حتى اسد الباب شفت سيارة بسام دخلت للفرع وكفت انتضرة وصل قريب مني نزل الجامة ومد ايدة يسلم عليه
بسام:صباح الخير ردام
مديت ايدي وسالمتة:صباح الخيرات ابو نور
بسام: يلة ماعطلك على دوامك
ردام: يلة مع السلامة
بسام: الله وياك
صعدت سيارتي وطلعت شغلت اذكار الصباح بدت الدنيا تزغ مطر خفيف شغلت الماسحة واني امشي   وصلت السيطرة نزلت وصفيت سيارتي على جهة صبحت ع الموجودين ووكفت ويا ملازم علي نحجي والسيارات تمر مرت ساعتين تقريبا ماسمعنا غير صوت طبة قوية نداريت بسرعة اني وحاتم شفت ستاركس مكلوبة مبينة خط طلاب جامعة الجنود ركضت عليهم واني وعلي نفس الحالة بدينا نخرجهم من السيارة ونسعفهم والناس وكفت تساعد وتنقلهم للمستشفى واني اساعدهم يصعدوهم بالسيارات انتبهت على بنية واكعة بالكاع ورجلها طالعة ل زرورها ومجرحة رجلها ركضت عليها واسمعها تون من الألم نزلت لمستواها لزمت تنورتها حتى اغطيها بس لكيتها مشكوكة نزعت جاكيتي وغطيتها داشيلها شفت ابو الخط عمرة بوسط الاربعين يفتر ويشوف الطلاب واحد واحد وهوة مضروب براسة
ابو الخط: الاء شبيج
اقترب منها ديشوفها شبيها
ردام: عمي اصعد للسيارة وياي اوديكم للمستشفى
ابو الخط: وينها
ردام: ذيج هناك يلة
نزلت داشيلها من الكاع رفعتها : ياعلي
البنية: ااااااااخ
ردام: الله الله شبيج شيوجعج
الشال صاير على وجهة مشفتها بعدته من وجهة
ردام: شيوجعج
فتحت عيونها خضر غامق ومدمعة وتعصرهن بألم ومجروحة فوك حاجبها
البنية بدموع وألم: ايدي
شايلها وصعدتها للسيارة ليورا وتوجهت لمكاني سقت السيارة بسرعة الحك للمستشفى
ابو الخط: والله ماعرف شلون طك التاير والسيارة مسيطرت عليها
مبين عليه التوتر والخوف لزمت ايدة: ماصار شي قضاء وقدر كول يالله
ابو الخط: ونعم بالله
باوعت بالمرايا فاقدة وعيها نداريت ولزمتها من زندها
ردام: اكعدي ي بنية اكعدي لتنامين
نداريت باوعت للرجال: كعدها لتخليها تفقد
ابو الخط ندار عليها: الاء عموو اكعدي االاء بابا لتنامين
اباوع بالمرايا واحجي وياها: الاءء لتنامين تسمعيني الاءء جاوبي
مديت ايدي وعصرت ايدها صاحت بألم : ااااااخخ
ردام: لتنامين احجي وياي شسمج
البنية: اااااا يدي توجعني ماما
لزمت ايدها: وصلنا اصبري مضل شي لتنامين احجي وياي الاء شسمج
البنية: ااا لاء
عيني ع الطريق وعليها اندارلها ماريدها تفقد الوعي ضليت احجي وياها واسألها حتى تجاوبني
ردام: عفية الاء شكد عمرج
الاء: اييييدي ليش متفهم
ردام : والله ادري بس لتنامين ابقي وياي حاجيني
شفتها رجعت تغمض عيونها لزمت ايدها سحبتها بألم يمكن اذيتها
ردام:شكد عمرج الاء جاووبي لتنامين
الاء: ٢١ ايدي
ردام : عفية ابوج شسمة
رجعت تفقد مديت ايدي داكعدها صارت على شي بارد نداريت باوعتلها لازمها من خصرها والقميص مالها مشكوك ايدي رجفت سحبتها وتوترت عيني ع الطريق ع السريع وصلت للمستشفى وكفت السيارة ونزلت فتحت الباب الورا جريتها من جتفها حطيت ايدها على بطنها حتى متتحرك من لزمت ايدها صاحت ااااااخ حطيت ايدي جوة ضهرها داسحب رجلها وفوكاه الجاكيت حتى متبين رجلها راسها رجع ليورة ع السريع لزمته وكع شالها من راسها ونزل شعرها اسود منين اضمها تطلع شلتها وحاولت اضم راسها بصدري ايدها تعلكت بركبتي وشعرها صار على ركبتي اريد اتنفس ماكدر من التوتر صحت على ابو الخط
ردام: ع السريع انزل انت هم
ودخلت للمستشفى ركض لاكتني دكتورة بوجهي
ردام: تعرضت لحادث ع السريع
الدكتورة: تعال هنا
دخلت للطوارئ
الدكتورة: خليها ع السدية
نزلتها ع السدية ووكفت تقربت الدكتورة وبدت تتفحصها عيونها وراسها
ردام: ايدها توجعها
الدكتورة: يجوز مكسورة خلي ناخذلها اشعة
اني واكف ووممرضة اجتي اخذوها للاشعة واني وياهم رجعو يضمدون راسها وهي تون الدكتورة راحت ع غير مريض تشوفة الممرضة دتشكللها الكانونة من شدت ايدها حتى تبرز اوردتها فتحت عيونها شافت الكانونة خافت ولزمت طرف السرير   الممرضة دخلت الكانونة وعصرت عيونها ماصارت سحبتها ولزكت ايدها وراحت تجيب وحده ثانية رجعت فتحت عيونها شافتها فتحت الكانونة الثانية عصرت عيونها ودارت وجهة ضفح وكع الشال من راسها تقربت رجعته على راسها فتحت عيونها ولزمت ايدي
الاء بهمس: مو هنا
ردام تقرب حتى يسمعها: شنو مسمعت
الاء: ماعندي وريد بالكف خلي تصعد
تأشر بعيونها على ايدها لزمت ايدها
ردام: هنا
ورفعت وجهي اباوعلها هزت راسها ب لا رفعت ايدي يم عكسها ورجعت رفعت وجهي باوعتلها هزت راسها اي
ردام: دكتورة هنا ماعدها وريد هنا الوريد
الدكتورة رفعت وشدت ايدها الاء لزمت ايدي بقوة الممرضة دخلت الكانونة بيدها وهي غرست اضافرها بيدي عصرت عيوني بألم لحد ماخلصت وشدت البلاستر عليها ضربتها ابرة وشكلتلها المغذي وهي بعدها لازمة ايدي طلعت الاشعة وطلع عدها كسر بيدها الدكتور لزم ايدها حتى يجبرها صرخت بألم وكعدت على حيلها
الدكتور: الزمها زين حتى ما اضطر اعيد التجبيرة
تقدمت وكعدت على طرف السدية ومديت ايدي من ورا كتفها وحضنتها لصدري وبعدها لازمة ايدي  الدكتور يسوي بيدها وهي تصرخ بألم لزمتها بقوة
ردام: خلص خلص كافي
الاء بوجع:يوجع يوجع والله
ردام:ادري اششش مابقى شي
الاء صرخت بألم وعضت جتفي بقوة تألمت وعصرت عيني بقوة
الدكتورة:ها اها خلصنا سلامات
بعدت نفسي عنها وشفت عيونها حمر والدموع على خدودها
ردام :شكرا دكتور
رجعت نفسها وتمددت وباوعتلي
الاء: اريد اهلي اريد بابا
ردام:حافضة رقمهم اتصل بيهم
هزت راسها بمعنى اي طلعت جهازي من جيبي
ردام:اي ردي
الاء:٠٧٧٠٠٠٠٠٠٠٠٠
اتصلت ورا شوية جاوبني رجال
ردام:السلام عليكم
الرجال:وعليكم السلام منو وياي بلازغرآ معرفتك
ردام: الملازم اول ردام حضرتك ابو الاء مو
الرجال: اي نعم منين تعرفها الاء بيها شي
ردام: تعرضت لحادث بس ال
قاطعني بخوف: الاء بيها شي
ردام: لا الحمد لله بسيطة اذا تكدر تجي للمستشفى
الرجال: بيا مستشفى
ردام: مستشفى----------
سد الجهاز وراح باوعتلها تباوع ع المغذي شلون يقطر وصافنة سحبت الكرسي وكعدت يمها
ردام: اتصلت بوالدج هسه يجي
هزت راسها ب اي
ردام: بيج شي ليش متجاوبين
باوعتلي وعيونها حمر نزلت دمعة من عيونها: عبالي راح اموت
ردام: لا اسم الله مصار شي الحمد لله
الاء: شكرا ا
قاطعتها: ردام الملازم اول ردام
الاء بابتسامة: واني الاء
ردام بابتسامة:تشرفت بمعرفتج
الاء :اني الاكثر
ردام: يا مرحلة
الاء: ثانية جغرافية
ردام: اختي هم جغرافية بس ثالثة
ضلت ساكتة مردت عليه انتبهت على شالها متحرك وطالع جزء من صدرها مديت ايدي داعدل شالها جفلت ورجعت ليورا
ردام: ااا ب

❤❤❤❤❤❤❤❤❤❤
الكاتبة :Lamar Alzankna
❤❤❤❤❤❤❤❤❤❤