مجرد اختلافات

البارت ٤

الحجية: شبيك يمة مو على بعضك هالايام منتبهة عليك بس عايفتك انت طير وتاليتك تحط يمي وتشكي همك
ردام: اووووووف يمة اوووف
الحجية: شمالك يبعد العافية احس ال اوووف مالتك اووف عاشك
ردام رفعت عيوني وباوعتلها: هيج مبين عليه العشك واني مداري
الحجية :امك واعرفك شبيك مابيك احجي يمة منهي هاي الخذت كلب وليدي بعد هالعمر
ردام: اووف يمة اخذتة ومردتة مرد
الحجية : كول يمة شمالك وهيج صارت منهي الهواها جبدك(كبدك)
ردام: يمة قبل فترة كتلج ع الحادث الي صار يم شغلي
الحجية: اي كتلي
ردام: البنية الي اسعفتها ي يمة اوووف منها
الحجية: ها يول كل هالفترة عاشك واني مادري
ردام: اي يمة وسالفتي سالفة
الحجية: اي يمة امشي امشيلك عليها وتصيرن ام جهالك
ردام: اوووف يمة ياريت بس
الحجية: بس شنهو
ردام: ماترضى يمة ماترضى شكد حاولت مترضى اخابرها ومتردلي اخر شي كالتلي اسفة ماقبل
الحجية: هاي منين ولك ام الاسفة
ردام : من ال-----
الحجية: ها ولك ردام واني اكول وليدي سبع متوكعة مرة تاليها واكع ب عصفورة حضرية
ردام: ههههه اي والله يمة
الحجية: حاجيني عنها شبيها مابيها
ردام: اسمها الاء عمرها ٢١ سنة تدرس جغرافية
الحجية: ها مثل رغدة
ردام: اي وهاي هي
الحجية: واهلها شعلومهم
ردام : امها مدرسة كيمياء وابوها عربي من عائلة ويحمدون بيهم
الحجية: خلني اخطبها لعد
ردام: ماترضى يمة مو كتلج تكول اسفة ماقبل
الحجية: يمو هاي مستحية وبت عالم حسبالها تضحك عليهاا وهيج كالتلك
كعدت على حيلي ولزمت ايدي: والله يمه هيج تكولين
الحجية: طبعا يا يمة شبيك متسودن كوم كوم نروحلها
ردام: هسه نروح
الحجية: لا باجر اي طبعا هسه يلة
ردام: خليها العصر يمة انه اخذكم وهم تصيحين شهد وخالتي ياسمين وياج
الحجية: مو يدلل وليدي شرايدة من الله بعد
بست راسها وكمت من يمها
طلعت للحديقة فرحان صدك واللن وتصير من قسمتي ليش لا طلعت جكايري وكعدت اورث واشرب بهالجكاير وبالي يمها للغدة دخلت تغديت الحجية كالتلي كوم جيب اختك وخالتك راح يجيبها محمد ابنها والله ماكلت باطل كمت جبتها لل٣ العصر اخذتهم وصلت كدام بيتهم نزلت امي وخالتي وشهد وكفت بعيد عنهم واني اشوف ولد حليوة فتح الباب ودخلهم ضليت انتضر ساعة وشوية ماكو وراها طلعو اهلي بعد ماسلموا على امها تقدمت بالسيارة كدام بابهم نزلت الجامة
ردام: السلام عليكم
ام الاء: وعليكم السلام
شكل امها معجبني احسها معقوجة بس مع ذلك مبتسمة وترحب ب اهلي صعدو اهلي للسيارة وبدو يحجون عنهم ويمدحون بيهم ويمدحون بجمال واخلاق الاء بعد ماشافوها كالولي انطيتهم صورتك ومعلومات عنك ورقم موبايلك وكالو يصير خير ان شاء الله رجعت للبيت واني بيه امل مر اليوم وخلص بتفكيري بيها لثاني يوم طلعت لدوامي جان يوم سبت ضليت بالدوام لل وحدة ضهر تقريبآ ودك جهازي ابوها خير ياربي كون خير جاوبت وصوتي مهزوز وخايف من جوابة
ردام: الو السلام عليكم
ابو الاء: وعليكم السلام شلونك استاذ ردام
ردام: الحمد لله بخير انت شلون حضرتك
ابو الاء: الحمد لله بخير داز الاهل علمود الاء
ردام: اي والله عمي
ابو الاء: ا والله ماعرف شلون اعتذر كلش اعرفك ابن اجاويد وصيتك واصل قبلك بس الضاهر ويه بتنا ماكو قسمة والخيرة فيما اختارها الله
ردام: على عيني وراسي بس عمي ماعرفت سبب الرفض
ابو الاء: والله مو منك بس البنية ممقتنعة واني هم ماكدر اجبرها
ردام: حقك عمي الله يحفظها تسلم ربي يخليك
ابو الاء: اعتذر كلش كلشي قسمة ونصيب
ردام: ماكو داعي مثل ماكلت قسمة ونصيب
سديت الخط واني جسمي يرجف كل ذرة بيه انتفضت من رفضها يارتى ليش رفضتني شنو البيه ماعجبها الف عله وعله طلعت بيه واني احاول الكي سبب لرفضها للاربعة العصر واني ماكعدت اروح واجي ودماغي ينفجر من الوجع والتفكير ماعرف شلون عبرت الساعات بس خلاص الساعة بالتسعة كلشي انتهى كل ذرة عقل مابقى بيه ماعرف شلون بثواني لكيت ايدي تدك برقمها واتصل بيها لكن من دون رد مرة واثنين وثلاثة واربعة وهي ماكو  الجنون قادني اصعد سيارتي واشخطها اخذتني رجلي لباب بيتهم وكفت سيارتي ودكيت هم مجاوبت دكيت مرة ثانية رفضتني نزلت من السيارة ودزيت رسالة: اقسم بذات الله والي خلق الكرة الارضية ب ست ايام اذا ماجاوبتي راح تشوفين شي ماشفتي بحياتج
مجاوبت رغم الرسالة دزيت رسالة ثانية: افتحي شباك غرفتج وباوعي للشارع 
مجاوبت ثواني وشفت ضوة الغرفة بالطابق الثاني انفتح وخيال اقترب من البردة وانفتحت طرف البردة شافتني وسريع سدت البردة وصلتني رسالة: شتسوي هنا روح منا
دزيتلها : اطلعيلي دحاجيج
جاوبتني: داكلك روح منا متفتهم انت تدور فضيحة
دزيتلها: بت امج وابوج ولتردين علية وشوفي الفضيحة شلون تصير
اتصلت الجهاز يرن واني اشوفها واكفة ورا البردة وتباوعلي بخوف الجهاز على اذني واقترب من باب بيتهم مديت ايدي حتى ادكها انفتح الخط
الاء: شتريد
ردام: الا بالتهديد يلة تردين
الاء: كافي عفية تعبتني شتريد
ردام: ليش رفضتيني
الاء:
ردام: جاوبي ليش
الاء: بكيفي قابل جبر
ردام: بعدج متعرفيني انطيني سبب واحد لرفضي وابتعد عنج وبحياتج بعد متشوفيني
الاء:ماريد ماريد ماريدك هذا وبس هذا السبب وبس
ردام: مو سبب هذا
الاء:هواي لحيت كافييييي
ردام: اذا عبالج اتخلى عنج بهالكلام معناها انتي غبية
الاء: مستحيل
ردام: شنو المستحيل
الاء: موضوعنا مستحيل
ردام: ماعرف معنى هالكلمة اطلعي دشوفج
الاء: روح منا
ردام: بس افتحي الشباك دشوفج
الاء: هواي تجاوزت روح منا
ردام: خلي اني اجي لعد واشوفج التجاوز
تقربت للباب اريد ادكها
الاء: لا عفية لا طلعت
وفتحت شباكها
الاء: ها شتريد
ردام: ااااااااه اريدج
بعدت الجهاز من اذنها وباوعتلي ورجعت حطته على اذنها
ردام: اشوفج باجر ي ام عيون تصبحين على ورد
سدت الخط والشباك ودخلت صعدت سيارتي وطلعت للسيطرة الليل كله افكر بيها لوجه الصبح لحد ماصار وكت نزولي للبيت بس بقيت انتضرها للسبعة وشوية وصل خطها اباوعلها متباوعلي ولاكأنما تعرفني نزلت للبيت غسلت وبدلت ونمت كعدت ب ١١ اتصلت بيها متجاوب مر اليوم اني اتصل وهي متجاوب ثاني يوم دوامي رحت داومت واني انتضرها فات الخط هم متباوعلي اوووف رجعت دزيت جماعة عرف ويا ابوها حتى اتقدملها وهم اجاني الجواب بالرفض بالليل اتصلت عليها جهازها مغلق اوخارج نطاق الخدمة مرة واثنين وثلاثة بالعشرين مرة وهي مغلق عبر علية الليل بالف ياعلي طلعت روحي للصبح ضليت انتظر لحد الصبح مانزلت ضليت انتضرها لحد مافات خطها الجنون بدة يستحوذ علية
ردام: وكف السيارة
الجندي: ليش سيدي
ردام: منو القائد هنا
الجندي: عفوا سيدي
وصل خطها وكفه الجندي باوعتلها راسها ع الجامة ومغمضة عيونها هاي شبيها اشرت ل علي ينزلوهم تفتيش ابو الخط ضل يسأل ليش وماليش نزلو ، صعدو جنديين يدورون بالسيارة يفتشون والطالبات كلهن واكفات وابو الخط نفس الحالة واكف ضليت افتر
بينهم الى ان وصلتلها وكفت قريب منها وهمست : ليش مغلق
مجاوبتني بس احسها ترجف نزل الجندي : ماكو شي سيدي
ردام: هذا هو تكدر تكمل طريقك صعدو الطلاب وطلع الخط رجعت للبيت غسلت وبدلت وطلعت للكلية ضليت كدام قاعتها لحد ماطلعت من المحاضرة بس ضايجة وحزينة مبين عليها طلعت ويا صديقتها سرى كمت وكفت واقتربت منهن
ردام: السلام عليكم
سرى: وعليكم السلام تفضل شتريد
ردام: احجي ويا الاء شوية
سرى: رجاءا عوفها كافي
ردام: شنو ماعندج لسان وصديقتج تجاوب عنج ليش جهازج مغلق
الاء: ماعندي جهاز
ردام: شقصدج
سرى: الاء كلها تباوع علينا خلي نمشي
ردام طلعت واحد من اجهزتي ومديتة الها
الاء: شنو هذا
ردام: جهاز حاجيني عليه
الاء: احترم نفسك ولتجاوز عافتني ومشت مشيت وراها
ردام: بالليل تلكيني ببابكم اذا ماطلعتي تشوفين شي ميعجبج
سارعت خطواتي وعبرتها طلعت من الكلية ورحت للبيت لليل طلعت روحي من الانتظار هي صارت بالتسعة وصعدت سيارتي وطلعت وصلت ل اهلها قريب العشرة وكفت ضليت اباوعلها ماكو ضليت انتضر وهي ماكو والله لو الليل كله انتضر الا اشوفها وكفت على سيارتي وارتجيت عليها واني اباوع لغرفتها باوعت للسما ربي اذا صدك هالبنية الي تطلع وتباوعلي واذا مو من قسمتي متطلع ربع ساعة تقريبا لل١١ شفت بردتها تحركت وخيالها ورا وكفت اباوع انفتحت طرف بردتها ابتسمت ورفعت وجهي للسماء: الحمد لله ياربي
فتحت البردة اكثر ووكفت تباوعلي واني اباوعلها عشر دقايق اكثر اقل مادري بس عيوني بعيونها واني اباوعلها وهي نفس حالتي الى ان ندارت وانطتني ضهرها سحبت الليزر من السيارة وضليت أأشر على غرفتها الى ان ندارتلي وعيونها دمع لو اني غلطان أشرتلها بيدي تنزل هزت راسها لا أشرتلها اصعد لو تنزلين هم اشرت لا تقربت من بابهم حتى ادكها اشرت لالا اوكف وكفت انتضرها دقيقتين تقريبآ وسمعت فتحت باب الداخلية وطلعت للحديقة سمعت صوتها بخنكة
الاء: هاا
ردام: وين انتي
الاء: موجودة احجي شتريد
ردام: اطلعي
الاء: ماكدر
ردام: افتحي الباب
الاء:كافي ردام شتريد لتضل تتجاوز
ردام: ليش رفضتي
الاء: بكيفي
ردام: ليش صوتج مخنوك
الاء:مبي شي
ردام: الاء
الاء:
ردام: الاء جاوبيني
الاء بصوت مبحوح: ها
ردام: هاي دتبجين
الاء:
ردام: جاوبي دتبجين
سمعت صوت شهكتها: شترررييد
ردام: ليش تبجين
الاء: ماكدر احجي اكثر رجاءا روح ليشوفك احد
ردام: اريد احاجيج ليش جهازج مغلق
الاء: ماعندي جهاز كافي روح
طلعت جهاز من جيبي وشمرتة ورا الحايط
الاء:شنو هذا
ردام: جهاز راح اخابرج جاوبيني
الاء: ماكدر اخذة هاك
ردام: اذا رجعتي اهجم الدنيا على راسج
الاء: ماكدر اهلي اذا شافو تصيرلي مشكلة
ردام: شلون لعد اريد احاجيج
الاء: ماكو شي نحجي خلاص
ردام: الاء منو اغلى شخص عندج
الاء: ليش
ردام: بس كولي
الاء: بابا
ردام: بغلاة ابوج عندج تحبيني لو لا
الاء:
ردام: ها
الاء: ماكدر
ردام: متكدرين تكوليها لو شنو
الاء: ماكدر اكولها
ردام: اذا تحبيني كولي اي واذا متحبيني كولي لا
الاء: ماكدر
ردام: اي لو لا
الاء:
ردام: الاء اي لو لا
الاء ببكاء:

❤❤❤❤❤❤❤❤❤
الكاتبة:Lamar Alzankna
❤❤❤❤❤❤❤❤❤