مجرد اختلافات

البارت ٩

درت وجهي وشفتها كعدت ع التخم ودمعتها وكعت من عينها رجلي اتجهت باتجاها بس ايد بسام وكفتني من لزمني وسحبني ورا طلعت بسام سلم على ابوها وطلعنا دافتح باب السيارة ماخلاني بسام كالي اني اسوق انت اصعد صعدت بصفة ضل بسام يحجي ويقنعني البنية المرايدة وهاي انت سمعت بنفسك عوفها ولتعلق عليها املك وضل يقنع هزيت راسي ودرت وجهي عنه اريد اعرف سبب رفضها لو كايلة اقبل ماجان احد كدر يوكفها بس يمكن هي اصلا متريدني ولعبت علية بهالايام كلهن اخذني التفكير بيها ماحسيت الا من وكفت السيارة بباب بيت اهلي نزلت دخلت امي كاعدة وعمي يمها الضاهر جا يكوللها عليه وكفت باب الصالة
ردام: السلام عليكم
عمي وامي: وعليكم السلام
دخل وراي بسام: السلام عليكم شلونك عمي
عمي: الحمد لله وين جنتو ردام اخذت بسام لبيت البنية
باوعت عليه ومحجيت
عمي: ردام كتلك هالبنية مو من قسمتك عوفها بحال سبيلها واي وحدة غيرها بس أشر عليها عد عيناك بس هالبنية مختلفة عنه كليا كلشي بيها وبأهلها يختلف عنه لانفس التفكير ولانفس العيشة وهي اصلا سن
قاطعته ب استهزاء: اي عمي هو هم هيج هي سنية وحضرية ومثقفة واني الشيعي العربي الهمجي هي بس اختلافات وهذا هو ارتاح ماتقربلها بعد
عمي: لا ردام مو هذا قصدي محشوم شنو هالحجي همجي شنو ماقبلها منك وكتلك هالبنية متوالمك وغيرها تدلل اي وحدة تريد وبناتي كلهن كدامك وبنات عمك هم كلهن كدامك
ردام: الله يحفظهن ل خواتي يلة اني اترخص تعبان
عفتهم ودخلت لغرفتي تمددت ع الفراش باوعت للسكف وحاجيت ربي ليش هيج ليش الكل مختلفين هي هاي الاختلافات الحرمتني منها حاولت انام مكدرت ايدي مديتها لجهازي دكيت عليها بعدها حاضرتني شمرت الجهاز بلكاع وجريت المخدة ع راسي اخذتني النومة كعدت على صوت موبايلي يتصل باوعت ملازم علي نطيتة صامت ورجعت حاولت انام رجع اتصل مرة ثانية عفته يدك وصلتني رسالة عفتها ضليت صافن مديت ايدي واخذت الجهاز باوعت رسالة من علي : ردام والدتي تمرضت شوي واخذتها للمستشفى وشفت استاذ شاكر وزوجتة والبنية بالمستشفى البنية فاقدة الوعي
كمزت ووكفت ع السريع شلت جهازي وطلعت ع السريع
ردام: وين سويج السيارة
الحجية: شكو يمه خير
ردام: بعدين يمه السويج وين
الحجية: بسام حطة يم التلفزيون
رحت ركض اخذتة وطلعت الطريق كله افكر بيها الى ان وصلت للمستشفى نزلت ع السريع وتوجهت للطوارئ وكفت قريب من الباب شفتها متمددة عالسدية ومغذي مشكل ب ايدها وامها كاعدة يمها وابوها واكف وضهرة ع الحايط وصافن عليها ضليت واكف وحاير كلبي يكلي تقرب وشوفها هاي حبيبتك وعقلي يكلي هاي الكسرتك ورفضتك عوفها تقدمت رجلي خطوة باوعت عليها باوعتلي ودارت وجها رجعت رجلي خطوة وطلعت من المستشفى بس مكدرت اطلع ضليت بالحديقة كاعد اكثر من ساعة
وشفت ابوها طلع وامها ورا ابوها لازمتها وتمشيها ضليت اباوعلها لحد ماصعدوها للسيارة وكفت على حيلي وضليت اباوعلها حطت راسها ع الجامة صارت عيني بعينها نزلت دمعتها ابوها شغل السيارة وطلع ضلت عيني ع سيارتهم لحد ماختفت من نضري تحركت وصعدت لسيارتي وطلعت من المستشفى وصلت لمنطقتنة طلعت للبستان ودنيا ليل تقريبا ٧ بليل فتحت نار وكعدت اكلب بيها وصافن شوصلني لهالحالة اني ساعات مرت واني احاول انساها لل١١ بليل وصلتني رسالة فتحتها من الاء: ردام كافي تطلع كدامي بكل مكان
دزيتلها: ليش
مجاوبتني
دزيتلها: شطلع بيج
مجاوبتني
دزيتلها : اريد اسمع صوتج
ورا دقيقة تقريبا اتصلت عليه وكبل سدتة
رجعت اتصلت بيها طولت الدكة يلة ردت
ردام: ليش كطعتي الخط
مجاوبت
ردام: ليش رفضتيني
مجاوبت بس اسمع صوت نفسها
ردام: شطلع بيج اليوم
مجاوبت
ردام: مشتاكلج
سمعت صوت شهكتها
ردام: حيل مشتاكلج
بصوت مبحوح ردت : كافي
ردام: ليش رفضتي اهلج جبروج
بصوت مبحوح: لا
ردام: بلي همه
بصوت مبحوح وهي تبجي: لا اني
ردام اخذت نفس وزفرتة: ليش
ببكاء:خايفة منك
ردام: من شنو تخافين
زاد بكائها اكثر: من كلشي انت تخوفني عصبيتك و
ردام: اسف والله مو قصدي اخوفج
بس اسمع صوت بجيها وشهكاتها
ردام: الاء تسمعيني كافي تبجين والله موقصدي بعد ماطخج الا وانتي حلالي
زاد بجيها اكثر
ردام: حركتي كلبي والله ليش تبجين
الاء: عوفني بحالي
ردام: ماكدر بلياج
الاء: شتريد مني والله انتهيت
ردام: اريد منج طفل يشيل اسمي واسمج وغرفة تجمعنا
بجت اكثر واكثر وضلت تبجي نزلت دموعي وياها وضلينا بس بجي لا هي تحجي ولا اني فوك النص ساعة لحد ماصار صوت جلاب يمي
الاء:وين انت
ردام:بالبستان
الاء:صوت جلاب يمك
ردام: اي
الاء:ارجع للبيت
ردام: ماريد
ضلينا ساكتين
الاء:تصبح ع خير
ردام: وين
الاء: انام
ردام: لتعوفيني
الاء: شتريد ردام
ردام: كتلج شريد ام علاوي
سمعت صوت بجيها
ردام: تحبيني
مجاوبت بس تبجي
ردام: تحبيني
الاء:اخاف منك
ردام: ليش يروحي أأذي نفسي ومأذيج
الاء: الي سويتة خوفني منك
ردام: والعباس منازل على بيت احد انتي اول وحدة طيرتي دماغي وخبلتيني
الاء:كوم ارجع لبيتك
ردام: اووووف الاء اوووف
الاء:كوم يلة
ردام: ماريد اختنك بالبيت
الاء: بس لتبقى بالبستان ليجيك حيوان لو شي
ردام: وتضلين تحاجيني
الاء: بس كوم
ردام: وتضلين تحاجيني
الاء: اي كوم
كمت طفيت النار وصعدت سيارتي قفلت الباب
ردام: كمت
الاء: عفية يلة للبيت
ردام: ماروح للبيت
الاء: اهلك يضل بالهم
ردام: اششششش تحبيني
الاء: اششششششش
ردام: غنيلي
الاء: هههه مو اليسا اني
ردام: غنيلي تعبان
الاء: انت غني
مديت ايدي وشغلت المسجل وفتحت السبيكر وحطيت الجهاز ع المسجل
ردام: سمعي وياي