يسعد صباحكم متابعي الأعزاء اليوم ان شاء الله رح أنشر الجزء الثاني من طموحي ...ليس هناك اروع من الطموح والإرادة وليس هنالك اقسى من أشخاص يحاولون كسر ارادتك🌷🌷🌷
🌻🌻🌻🌻🌻🌻🌻🌻🌻🌻
خلص العزاء في بيت جدو تمنيت تيتا تضمني وتصبرني على فراق كل عيلتي بس ماكانت تظهر أي تعاطف ...اه الشي اللي نسيت احكيلكم اياه عن تيتا ام مصطفى أنه هي زوجه ابوه لبابا علشان هيك كانت تكرهنا لأنه تيتا ام احمد تزوجت جدو ابو مصطفى عن حب وهو متزوج ....بس ما تحملت كره ضرتها الها....وانفصلت عن جدو وكان عندها ولدين وبنت..عمو احمد وبابا امجد وعمتو نسرين....
عاشوا مع تيتا ام احمد لحتى صار عمر عمو احمد ١٣ وبابا ١١ وعمتو نسرين ١٠....
جدو كل هالسنين حاول يضغط على تيتا لحتى ترجعله بس ما كانت تقبل تنذل اكتر هي و أولادها من ضرتها اللي هي بنت عمه لجدو.. و ما كان جدو يقبل يعمل عداوة مع عمه خصوصا مو بس تيتا بينهم وشراكه في شغل واحد . ... تيتا كانت تعرف جدو ما رح يقدر يوقف بوجه مرته وبنت عمه مره ثانيه...
جدو اخد اولاده من تيتا ام احمد واتفق معها تشوفهم يومين بالأسبوع المهم يتربوا مع عمو مصطفى وعمو خالد وعمتو وجدان
يعني جدو عنده بنتين واربع أولاد من نسوانه الاتنين ....
تيتا ام مصطفى عمرها ماكانت حنونه على أولاد زوجها و دائما حاولت تذلهم بس بابا وعمو وقفولها وماسمحولها تآذيهم اكتر ...لما صار عمر عمو احمد ١٨ طلب من جدو أنه يسكنوا بالطابق التاني هو واخوانه..بالأول جدو اعترض بس بابا قاله احنا بنحبك ومابنحب نتركك احنا كتير انظلمنا هون و انت ما بتعرف و احنا ما كنا نحكي علشانك انت و من خوفنا عليك من المشاكل ... نسرين بعدها صغيرة عاللي بيصير فيها ... لازم تتفوق وتجتهد وتخلص تعليمها... بس مع الاسف كل حياتها مع خالتي ظلم و ضرب و قهر احنا شباب و بنتحمل ... بس هي بنت حرام تنكسر
جدو وقف و صافن عليهم كيف وصل الحال فيهم هيك و هو ما بيعرف...
و بالآخر اقتنع بكلامهم رغم هالشي ما عجب تيتا ام مصطفى بعد ما عرفت بانه جدو عرف بكل شي عم تعمله مع اولاده....
و فعلا عاشوا الأخوة التلاته مع بعض و ما قطعوا باقي اخوتهم و لا جدو ...
وكملوا تعليمهم اكتر من اخوانهم بابا الله يرحمه خلص دكتوراة في اللغه العربيه ...عمو خلص دكتوراه في علم الحاسوب ...و عمتو نسرين صارت دكتورة نسائيه .
و تزوجوا و كل واحد صارت عنده عيله حلوة ...
هي قصه بابا و سبب كره تيتا ام مصطفى اله و لاخوانه و حتى اولادهم
كنت قاعده بالغرفة اللي قالي جدو استخدمها ولابسه بيجامه نص كم وردي ...لأنه الدنيا صيف وعلشان الجبيرة اللي بايدي ...الحمد لله خفت آلام رجلي شوي بس لسه بحس فيهم بألم لما امشي... اجت بنت عمي و قالتلي في ضيف بده يشوفني ما عرفت منين لما دخلت علي ... سرحت فيها شكلها مو غريب ... طيب ليش اجت لغرفتي ... قطعت تفكيري و نزلت دموعها قبل ما تحكي شي
حنان... ميرا حبيبتي هي تيتا ام احمد
ميرا ...(مين) تيتا ام احمد( نزلت دموعي .. وركضت رميت حالي بحضنها ونسيت الم ايدي و رجلي )
تيتا ... يا عمري انت يا غاليه يا بنت الغالي ...
ميرا ... الغالي راح يا تيتا راح و تركني ....ااااه يا تيتا راحوا امي و ابي و اخواتي ...صفيت لحالي يا تيتا
تيتا ام احمد ...ميرا حبيبتي انا رجعت عالاردن علشانك انت ورح اعيش هون على طول ... يا ريت لو جدك يوافق تعيشي معي.
ميرا ... تيتا انا ما بعرف شو لازم اعمل ولا مع مين رح اعيش ...تيتا حياتي انتهت (نزلت دموعي متل الشلال و ما كنت قادرة أهدى رفعت راسي اتطلع بعيونها العسليه اللي بتشبه عيون بابا ...بس دموعها جعلت لمعه عيونها مثل الجواهر ...
ميرا ... تيتا هلا جدو ما سمحلك تاخدي اولادك اكيد ما رح يسمح اعيش عندك
تيتا ... يا عمري وقتها كنت مجبرة بس هلا لا ما في حد بيجبرني اتنازل عنك
ميرا ... بس (حطت تيتا ايدها على فمي و سكتني)
تيتا .... اسكتي يا قلبي هاد شي سابق لأوانه
💮💮💮💮💮🌷🌷🌷🌷🌷
مرت الايام وخلصت الأربعين لأهلي بس كانت أسوأ كابوس بحياتي من تيتا ام مصطفى وعمتو وجدان رغم كسر ايدي بس كانوا يخلوني اشتغل بالبيت كأني خدامه عندهم ....دموعي ما نشفت لا من قهري على حالي و لا من قهري على عيلتي ولا من ألمي ... كنت احاول اعمل جهدي أنفذ طلباتهم بس قدام جدو ما بيطلبوا مني شي .
كنت كتير انبسط بوجود جدي أحسه بر الأمان الي من الوحوش.
تيتا ام مصطفى ... بسرعه قومي نظفي البيت و لا تعملي ايدك حجه
ميرا ...والله يا تيتا مو حجه ...استني بس لحتى الدكتور يفك الجبيرة و رح اعزلك البيت كله.
تيتا ... لا هلا بتقومي وبتشتغلي و لما تفكيها في شغل تاني
ميرا ... والله يا تيتا (صرخت فيي)
تيتا ... بس بدون حجج تحركي
ميرا ...حاضر تيتا (همست الله على الظالم ...كانت متل ماهي تكرهني انا أكرهها...
قمت لبست بنطلون جينز بصعوبة و لبست بلوزة سوداء ... كم واسع ليغطي على الجبيرة ... ربي كريم كان الكسر بايدي اليمين لأن انا عسراويه ... هاد ساعدني على طلباتهم ....
كانت تيتا ام احمد تجي على بيت عمو احمد لحتى تشوفني ..لان بأول مرة سمعت كلام مسموم من تيتا ام مصطفى .
بس ما كنت احكي شي علشان ما تدايق
تيتا ... انا حكيت مع عمك احمد ومع جدك بالنسبه لدراستك ...عمك رح يسافر يخلص اوراقك علشان تدرسي بالاردن ... و بده يعمل براءة ذمة لابوكي الله يرحمه من شغله .. و نفس الشي لامك ... و يشحن كل شي بخصك انت و اهلك
(نزلت دموعي )عمو خدني معك خليني انا ارتب اغراض اهلي و أودع صاحباتي ...انا هي السنه عاشر ...سنه مصيريه ...سنه تحديد الفرع اللي بدي ادرس فيه ... واكمل دراسات جامعيه .
عمو .... ماشي حبيبتي رح اخدك معي ..رح اقنع جدك
ميرا (ضميت عمو بايدي اليسار و قبلت راسه) شكرا عمو ...
لازم ارجع هلا قبل ما تعصب علي تيتا
تيتا ام احمد .. روحي يا عمري و اعرفي أنه هانت ما ضل شي لحتى تعيشي عندي..
ضمتني تيتا وتبسمنا لبعض و رجعت على بيت جدي .. رجعت لذل وقهر عمتو وجدان.. رجعت لقيتها واقفه بدشداشتها المغربيه وحاطه ايديها على خاصرتها
ميرا بنفسها ..يا رحمه ربنا ... و حكت مع عمتها
ميرا ...خير عمتو في شي ..شكلك متدايقه
وجدان...طبعا يا قلبي تاركه الشغل و طالعه ..وين بتدوري حضرتك بدون اذن
ميرا ... عمتو و الله عمو احمد اجا اخدني بعد ما خلصت شغلي
قعدت وجدان على كرسي طاوله السفرة البنيه و تطلعت لي بنظرة غل
وجدان ... و احمد بيك شو بده منك
ميرا ... كان عازمني عالفطور وخبرني أنه بكرة الصبح رح يمر علي علشان نروح للدكتور
وجدان (برمت فمها بطريقه اللي مو عاجبه ) طيب ست الحسن كملي نشر الغسيل
كنت اتحمل واضغط على نفسي كما علمني والداي ان اتحمل ضغوط الحياة والاهم ان لا انكسر
اقسم اني لن انكسر من أحد مهما كان هذا الشخص 🌻🌻🌻🌻
💮💮💮💮💮💮💮💮💮💮
🌹Roxan🌹
أنت تقرأ
طموحي
Humorقصة اجتماعيه ...عاطفيه تبحث في قضية فتاة عانت في حياتها الكثير ليصل طموحها فوق السحب ...تعاني الحب و بعد الحبيب ..لكن لم يكسرها هذا الحب زادها قوة وصلابه حتى باتت مكانتها مرموقة في المجتمع 🌹🌹🌹🌹
