رصَاصِةْ العِشق ((من سلسلة الحب في قلب العسكري))

البارت الثاني

#رصاصه_العشق
.
.
.
.
.

حارث : رد بالك من الطريق، المرة اللي فاتت كانت في بوابه ليهم.
اوس : تو نمشي من جهة الشوارع و بعدها نطلع ع الطريق الرئيسيه.
حارث : ربي يستر و خلاص .
__________________________________________________
مر الوقت  و الساعه كانت 9:30م و الكل مشغول باله على اوس و الحارث.

في المعسكر ↓
اسر "بعصبيه" : تي وينهم هاذوا لتوا ويــن؟
طلال : اسر اهدى مش باهي لصحتك.
آسر : تمشي أم الصحه، خوي خيره عطل؟ وين اختفى؟
غالب : بالله عليك يا آسر إهدى .
آسر : بروا دوروا عليهم، جيبوهم حتى كان في المريخ نبيهم قبل الساعه 10 يكونوا اهنا.
محمد : تبينا نضحوا بشباب حتى نطلعوا و اندوروا على إتنين؟! .. مستحيله.
آسر : لما نمشي ندور عليهم بروحي امالا ' حط يدها على الطاولة و وقف'
طلال 'شد آسر بخوف' : آسر جرحك جديد و خطر عليك الحركه، قلبك مش في آمان.
آسر : و لما يكون خوي، الشخص الوحيد اللي لما نشوفه نتذكر اهلي، مش معاي قلبي مستحيل يكون في امان، حول بالله عليك لما نجيبه انا.
غالب : خلاص اسر قعمز تو نمشي انا ندور عليه.
آسر : لالا زي ما قال محمد، منضحوش بأي روح، لكن انا راضي ان تضيع روحي .
محمد : اسر الزفت خيرك؟؟
آسر "بعصبيه" : صح مش حتحسوا بيها، واحد وحيد اهله و الثاني الولد الوحيد من وين بتحسوا ها؟
أوس : السلام عليكم.
آسر 'شاف لأوس بعصبيه و قعمز' : وين كنت انت؟
حارث : كان عندنا مشوار مهم.
غالب "بعصبيه" : اما مشوار يخليكم تقعدوا برا المعسكر أكثر من 6 ساعات؟
أوس "بحده" : لما تكون انت الآمر تكلم و عيط بأعلى صوتك علينا، لكن توا وطى صوتك و متدويش معاي لإني مش حنجاوبك.
آسر 'رفع حاجبه بإستغراب' : خيرك أوس؟ شن الكلام اللي تقول فيه.
أوس : بالله يشوف روحه يدخِّل في روحه بين البصل و قشرته.
آسر : به خلاص فهمني توا وين كنتوا؟
أوس : زي ما قال الحارث.
محمد : يا أوس قول بلا جو زايد.
أوس 'إبتسم لمحمد' : كنا في مشوار.
غالب : تي شن البراده اللي انت فيها! احنا من امبكري مشغولين عليكم و نفكروا وين مختفيين و انت تتسهوك؟
أوس : انا مقتلكش اشغل بالك عليا و فكر فيا، اصلا انت اخر شخص يدوي على الشيء هذا .
غالب : اسمع يا فرخ انت، راني سكتتلك هلبا را متخلينيش نغلط فيك.
محمد : اووو لاا عاد هكي طاح القدر يا اوس.
أوس : ترا جرب و اغلط فيا.
طلال : تي اسكتوا الهم.
غالب : تي وحق ربي كان انوضلك نقتلك يا اوس.
الحارث : اوزن كلامك غالب.
غالب : انت شن خصك؟
آسر 'ضرب الطاوله بعصبيه مما خلى الكل يسكت و يشوفله' : هــذا شنــي؟.. شن الكلام اللي تقولوا فيه انتوا؟ بالك تحسابوا روحكم في ساحه قتال؟ ... الزفت حتى العدو متكرهوشي هكي .. تي 'حس بألم في قلبه و بدا يتنفس بصعوبه'  .. خيركم هكي اتـ .. 'حط يده على قلبه، حاول يتنفس لكن مقدرش، حس ان الأكسجين تم خلاص، شافلهم بسرعه و طاح مغمى عليه'
أوس ' شد آسر بخوف' : آسـر اسر .
طلال : حطه على السرير بسرعه .
آوس ' حط آسر على السرير و شاف لطلال' : خيره؟؟
طلال "بعصبيه" : فاتحين جبهة في بعضكم هنا و تقولي خيره؟ .. حالته الصحيّه متسمحش ان يتوتر ولا يعصب و انتوا مشاء الله ما ناقص غير تتضاربوا .
أوس 'قعد ساكت و يشوف لطلال'
طلال : أطلعوا برا كلكم، نديرله كشف و نطلعلكم.
محمد : وااك والله ما خاطري نوقف يا راجل.
طلال : مصح وجهك.
الحارث : هي يا شباب.
غالب ' وقف و طلع '
أوس : أكسروا جرّه .
الحارث 'ضحك' : متفهك.
محمد : نموت و نعرف شن السبب.
اوس : يجي يوم و تعرف. 'طلع'
محمد 'شاف لـ الحارث' : حرُّث صحيبي الغالي.
الحارث : حي حي على المصلحه.
محمد 'شافله ببراءة' : صحيبي انت، انت القدر كله را.
الحارث : هات الزبدة من الأخير.
محمد : شن قصتهم أوس و غالب، صاحبي انت را.
الحارث: منعرفش.
محمد : غر قول الحق.
الحارث : و الله ما نعرف، علمي علمك.. مدامني صاحبك حوِّل لي رصيد.
محمد 'وقف' : متصدقش روحك را، انسى اللي قلتهولك امبكري 'طلع'
الحارث 'ضحك و طلع'
طلال 'هز رأسه و ضحك، دار كشف لآسر و ركبله أكسجين و طلع للشباب'
أوس : ها كيف حاله؟
طلال : و الله تاعب هلبا و انا توا ركبتله الأكسجين لإن قلبه تاعب و مش قادر يتنفس صح.
غالب 'تأفف' : لا حول ولا قوة الا بالله، يا ريتنا ما تكلمنا .
أوس : يا ريتني لا عرفتك ولا خشيت في حياتي زي الحادث.
طلال : خلاص عاد زودتوها، شن السبب التافهه اللي يخليك تكرهه للدرجة هذه؟
أوس : مدخلكش بـ الموضوع، خلاص مش لازم تعرفوا شن بتستفيدوا كان عرفتوا هي.
محمد : معاش نستغربوا لما نشوفوكم تتعاركوا و يكون في سبب مقنع و نبدوا فاهمين الكلام و التلقيح اللي بينكم.
أوس : معاش تستغربوا و مش لازم تفهموا و مش لازم يكون السبب مقنع لجنابكم.
طلال : تي غر قوللنا علاش.
أوس "بعصبية" : خــــلاص، سكروا ام الموضوع معاش تسألوني علاش 'لف و مشى'
محمد : باهي يا غالب إحكي.
غالب 'تنهد بضيق' : مدام هو ميبيش يقول فأنا بنقعد ساكت 'مشى'
طلال : شن جو المسلسلات التركيه اللي يديروا فيه هذا ... والله حتى احنا فاضيين ان شاء الله يذبحوا بعض هما أحرار.
محمد : يا ولاد جيعان.
الحارث : تعالى ندخلوا، بالك الجماعه مطيبين حاجة.
طلال : بسرعه بسرعه، ما تلحق معاهم على شيء.
محمد : الأخضر و اليابس الله وكيلك.
طلال : لك العمى شو غجريين .
الحارث 'ضحك' : ربي يشفي و خلاص 'مشوا'
_______________________________________________