رصَاصِةْ العِشق ((من سلسلة الحب في قلب العسكري))

البارت الحادي عشر

#رصاصة_العشق
#حنين_الشوق
.
.
.
مُـــفاجَـــأة بارتين في نفس اليوم 😂☄️
.
.
         {و ما الحُب في الحرب إلا لعنةٌ}

: و اخيراً، اسر الزليتني بين يديا توا.
أسر 'قعد يشوف ببرود للراجل اللي واقف قدامه'
: حندوي معاك بلغة تفهمها... حتجاوب على كل الأسئلة اللي بنطرحها.
أسر 'حط عينه في عين الراجل بكل ثبات' : لو تقطّعني طرف طرف مَش حنقول ولا كلمة، احنا مَش رخاص زيكم.
'شاف لأسر بعصبية و ضربة على بطنه بكل غل'
أسر 'ضحك و شافله' : ما توجعش.
: اي صح، لكن هذه حتوجعك 'حط يده على مكان الرصاصة و ضغط عليها بقوة'
أسر 'قعد يقاوم في الألم و يشوفله ببرود عكس الإضطراب اللي صاير لجهازه الحيوي، حس بألم ينخر في قلبه و صداع ينبض في رأسه، ضغط على سنونه بقوة لين سمع صوت رصاصة فجأة، فتح عيونه و لقاه طايح على الأرض'
طلال : قائدي 'مشاله بسرعة و بدا يفك في القيود اللي على يديه'
أسر 'إبتسم بوجع' : طـ... طلال.
طلال : جينا ننقذوك يا آمر، تحمّل شوية 'فك قيود يديه و الحبل اللي كان رابط رجليه و شده من كتافه' ... تحمل، شوية و يزول الألم كٌله.
أسر : انت و مني جيت؟
طلال : انا و كريم ولد عمك و السرية الأخيرة.
أسر : أشاوس.
طلال : هي بسرعة معندناش وقت 'مد لاسر سلاحه'
أسر 'شد السلاح و باسه' : مفروض خديتك معاي، يوم خليتك داروا بيا 'طلع هو و طلال من الحبس و توجهوا للساحة'
طلال : حيصير منه الهجوم يا امر؟
أسر : اي، لكن بخطة ثانية.. لكن قبل كل شيء في موضوع لازم نحلّه 'ركبوا للسيارة و رجعوا للمعسكر'

أسر 'تلفت لطلال' : قوللهم يجتمعوا في مكتبي توا توا 'لف و مشى لداره، لبس البزه الخضراء و مشى للمكتب، وقف على رأس الطاولة و قعد يفكر' ... طلال مَش خائن، هو انقذني و هما ماصدقوا شدوني.
طلال 'خش هو و غالب و محمد'
أسر "بإستغراب" : أوس و الحارث؟
طلال : مَش في المعسكر.
أسر 'ضرب الطاولة بعصبية' : من امتى طلعوا؟
طلال : جو ساعة.
اسر ' إستنوني هنا، مفيش حد يطلع من المكتب لين نجي 'خذى سلاحه و طلع بعصبية، توجه للبوابة و لقاهم كيف نزلوا من السيارة' : للمكتب انت وياه بسرعة 'لف و مشى للمكتب و مشوا معاه التنين بوجوه مستغربة'
أسر 'وقف قدام أوس و الحارث' : توا تقولوا وين كنتوا.
أوس : نفس جوابي كل مرة.
غالب : في وراك حاجة انت مَش مرتاحلك.
أوس : ما قالك حد إرتاحلي.
أسر "بعصبية" : بس انت و هو، الحارث قول وين كنتوا.
أوس 'فنص في الحارث'
الحارث 'بلع ريقه و شاف لآسر'
أسر "بعصبية" : شن في وراكم انتوا؟ شن القصة و شن المسألة؟
الحارث : المسألة مسألة """ يا قائد.
أسر 'سكت لحظة يستوعب'
أوس 'قعد يشوف للحارث بعصبية'
أسر : نجيبلك المصحف تقسم؟
الحارث : جيبه عادي.
أسر 'شاف لأوس' : شني يا أوس؟
أوس 'شاف للأرض' : صح كلامه.
أسر 'طبطب على كتف أوس' : اطلع انت و الحارث.
أوس 'قعد يشوف لأسر بصدمة طفيفة و طلع مع الحارث'
أسر 'قعد يشوف لمحمد و غالب بعدين قعمز ع المكتب، شاف للمفتاح اللي ع الطاولة' : أطلعوا، تو بعدين نتفاهموا كويس.
'لفوا و طلعوا من غير أي حرف'
أسر 'طلع الصندوق الأسود من تحت المكتب و حطه ع الطاولة و خذا المفتاح' : أكيد هذا هو مفتاحك، لقيته بعد ما قلب مكتب قائدهم الجمعة 'حط يده ع الصندوق و بيده الثانية دخّل المفتاح، إبتسم لما سمع صوت طقّة المفتاح اللي دلت على تماشيه مع الصندوق، فتحه و خذا الأوراق اللي كانوا فيه، قعد يقرا فيهم بصدمة لين وصل في الورقة الأخيرة، ضرب الطاولة بعصبية' ... كيف محسيتش بيه كيف؟ 'رد الأوراق في الصندوق بسرعة و ردّه وين ما كان  أول ما سمع صوت طق الباب، قعمز على الكرسي' .. خش.
غالب 'فتح الباب و وقف قدام المكتب' : في شنو تفكر يا قائد.
أسر 'وقف و تلفت للمرش و قعد يشوف للساحة' : نفكر في خيبة الأمل اللي أنا فيها توا.
غالب : مسمعتش كلامي لما قلتلك حتخونك، اليهود طبعهم الخيانة.
أسر : فعلاً، في هلبا ناس طبعهم الخيانة مَش غير هي.
غالب : اي.
اسر 'قعد يشوف للساحة و يهز في رأسه، إستغرب لما سمع صوت تكّة السلاح، تلفت شاف غالب رافع سلاحه عليه' : خيرك؟
غالب : اليوم موتك يا أسر، تبي تعرف مني الخاين؟.. انا الخائن بالنسبة ليك... انا اليهودي اللي عاش معاك فترة طويلة و عمرك ما حسّيت فيه... لكن اليوم انت لازم تموت قبل ما ادير هجومك على ولاد بلادي.
أسر : و انا اللي كنت نعارك في اوس لما يدوي عليك بالعاطل، طلع خوي عنده الحق و حادق اكثر مني.
غالب : الله غالب 'سحب السلاح و حط صبعه على الزناد' .. شهد على روحك.
أسر 'في لحظة خذى الكرسي و حطه قدامه مما خلا الرصاصة تضرب الكرسي، خذى سلاحه من على الطاولة و ضرب رصاصتين على غالب، وحده أصابة يده اللي كان شاد بيها السلاح و الثانية على رجله' : تحساب قتلي ساهل؟
طلال 'فتح الباب بهلع' : شن في؟ 'شاف لغالب بصدمة بعدين شاف لآسر'
أسر 'حط سلاحه ببرود' : خاين حاول يقتلني و نهيت موضوعه.
طلال : كيف؟؟... معقولة غالب خائن؟
أسر : اي، 'فتح اللاسلكي' ... أوس و الحارث و محمد تعالوا للمكتب بسرعة.
طلال 'شاف لغالب بكره' : خزي عليك.
أسر 'فتح الجهاز اللي كان في زاوية المكتب و كتب رسالة للقيادة و قال على موضوع غالب، تلفت لأوس اللي كان يشوف لغالب بشماته'
أوس : خيره ملوح هذا زي العجل.
اسر : خاين و خذى جزاته.
أوس : **** نتوقعها منه عادي.
أسر : تعالوا نقوللكم ع اللي بنديروه اليوم.
'قربوا الأربعة من الطاولة و شرحلهم اسر على الخطة'
أسر : خوذوا غالب و إحذفوه في الدار الأخيرة، طلال داويله جرحه و اعطيه منوم، لازم يوصل للمحكمة العسكرية بخير.
طلال : امرك يا قائد.
أسر : و جهزوا روحكم للحرب.
•تمام سيدي• 'خذوا غالب و طلعوا'
أسر 'مشى لداره، لبس الخوذة و الواقي، فتح الدرج اللي كان بجنب سريره و خذا الصورة، قعد يشوفلها بحزن ممزوج بفرح' : حنرجعلكم عن قريب، و أخيراً يا أمي بنبوس يديك و نشم ريحتك زي قبل 'حط الصورة في جيبه و طلع للساحة، لقي الجنود مستعدين كعادتهم وقف قدامهم و زفر' ... اليوم مرات نصنا نستشهدوا و منرجعوش مرة ثانية، لكن النص الثاني لازم يعيش، و لازم يقاوم و يحارب لأخر نفس في أهالي يستنوا فينا وراء سور المعسكر، اليوم الحاجة الوحيدة اللي نبيها منكم هي ان تقتلوا كل من يجي في طريقكم الكل الا الرأس الكبير حاولوا ان تخلوه عايش، نبوه يخر و يرجع مهزوم لبلاده و يفهّمهم إن ليبيا فيها جيش يحميها و إحتلالها مَش لعبة و عمرها ليبيا ما حتكون ممر عبور للإرهاب، لازم يفهموا إن ليبيا أرض المجاهدين  أحفاد عمر المختار و رمضان السويحلي و غيرها من الأشاوس، لازم يعرفوا ان الشعب الليبي مَش راقد على وذانه و ان في رجال يهزوا الجبل بوطنيتهم... مفهوم؟
'هزوا الأرض بضربة رجلهم و قوة صوتهم' : مفهوم يا قائد.
أسر : هي يا أبطال، إنتشروا 'لف و ركب السيارة مع طلال و أوس، طلعوا بسرعة و درسوا على بعد طفيف من المعسكر، نزل أسر من السيارة و نزلوا بعده 10 جنود'
أسر : هي يا قناصين مهمتكم اللي فوق الحيط كلهم.
'توزعوا حول المعسكر و بدوا في مهمتهم'
أسر 'ركب السيارة و اشر الباقي يتحركوا.. وقفوا قدام البوابة الخلفية و نزلوا كلهم عدا السرية الثالثة اللي كانوا قدام البوابة الرئيسية'
أسر : اللاسلكي خلوه مفتوح يا جنود، هي بِسْم الله 'سحب سلاحه و خش للمعسكر، قتل كل شخص يلمحه بكل سرية و هدوء، خشوا بعده الجنود و بدوا في الحرب'
أوس : أنا توا بنبدا في مبنى المبيت.
أسر : كويس، ابدوا بتنفيذ الخطة كلكم هي.
طلال : انا بديت.
أسر : تمام 'توجه لأهم مبنى في المعسكر و اللي كان فيه مكتب قائدهم، قتل كل من في المبنى، فتح وحدة من الغرف اللي كانوا في المبنى و جت عينه في عينها'
وتين : أسر!
أسر 'سكر الباب برجله و وقف اللاسلكي، قرب منها بخطوات مشتته' : انتِ شن اديري هنا؟
وتين : هذا معسكري، انت شن ادير هنا؟
أسر : أطلعي من هنا بسرعة، لو شافوك بيقتلوك.
وتين : مني؟
أسر : توا انتهت الحرب، اللي برا كلهم ماتوا، أهربي و ارجي لبلادك.
وتين : و انت؟
أسر : انا؟...  انت بعتيني و رفعتيني للموت بيديك، شن مزال تبي فيا؟
وتين : كنت حنساعدك و الله، أسر القائد لما عرف بالموضوع جبرني ان ندير اللي درته.
أسر : معاش يهمني خلاص 'فتح الروشن، شاف للطريق و شدها من رسغها' أطلعي من هنا، حتلقي سيارتي مدرسة غادي خوذيها و أهربي و ولّي لناسك و عيلتك.
وتين 'حطت يدها على خده' : إنت ناسي و عيلتي.
أسر 'باعد وجهه و تلفت للروشن' : أطلعي و متستفزينيش اكثر.
وتين 'حضناته بقوة' : نحبك.
أسر : طريقك زينه.
وتين 'باعدت من عليه و شافتله' : الوطن ديما يعلمنا نتخلوا عن اقرب الناس لينا... صح انا نحبك لكن عمري ما حنندم على خدمتي لوطني... سلام 'طلعت من الروشن'
أسر 'فتح اللاسلكي و قعد يشوفلها و هي ماشية و مخليا وراها صوت ضحكتها يطارده في كل مكان، لف و طلع من المكتب... مشى للساحة و لقاهم كلهم واقفين بإنتصار و اول ما شافوه بدوا يكبروا'
طلال "بفرح" : إنتصرنا يا قائد إنتصرنا.
أسر 'إبتسم و قعد شارد للحظات يتفكر في كل شيء عاشه في هالخمسة سنين، كانوا فرحانين بإنتصار، لكن هو كان يفكر في الخسائر اللي دفعها من داخله حتى يربح الحرب، كان يتفكر في النقاط السلبية اللي صارتله بس'
طلال "بهمس" : كٌله حيمشي مع الوقت يا صاحبي، كٌل جرح يطيب لكن ياخذ وقته.
أسر 'هز رأسه و تنهد'
: يا قائد لقينا 'وقف قدام اسر و هو يلهث من الجري'
أسر 'شافله بجدية' : شن لقيتوا؟
: ###
_____________________________
#حنين_الشوق
•الرواية قريب تكمل ❤️💫•