بين الأمس والغد(قيد التعديل)

بارت1

#بين الأمس والغد
#سارة ماجد ............

الدنيا باردة وصوت الكراكيع يفزز الميت من كبره  من هلكد ما قويه ومرعبه وصوت الاشجار من تتحرك يتهيألي راح توكع عالبيوت

واني بطبعي  كلش اخاف من العواصف والمطر والكراكيع من اني زغيره وهذا طبعي اتخيل راح اموت لو يصير بية  شي  يعني اخاااف حييل

كمت من جربايتي الزغيرونه اللي كوة مكفيتني طلعت من غرفتي
ورحت اتمشى على اطراف اصابيعي شفت ماما واكفه بالمطبخ دتكلي عجين فلافل وكفت يمهه

خمطت فلفوله من الماعون وكعدت عالكرسي  : امممم شلون فلافل يوم حبابه شوكت يصير تره كمت ارول عليه خلي اسويلي لفة

اندارت علية وهي تضحك : ها ولج جبانه سمعتي صوت الكراكيع والهوة واجيتي تركضين عبالج ما اعرف بيج ...
ولتشبعين نفسج بالنمايم اصبري هسه راح اخلص تكلاه مبقه شي بس افرشي السفرة بالهول وشغلي الصوبه هسه خوالج يكومون يحجون

رحت عالكاونتر فتحت الجرارة وطلعت سفره واني اكول: ليش هم خوالي على شنو ميحجون متكليلي بدال ما واكفه وحدج جان وحده من نسوانهم تكوم تعاونج  يدرون بية اني سادس وعندي امتحانات شكو بيهه لو كاموا يكلون وياج
لو متعلمات عالجاهز اكل ينحط كدامهم وينشال من كدامهم

التفتت علية امي : ولج هششش اسكتي نصي صوتج هسه يجي احد ويسمعج ولله يكلبون الدنيا وبعدين اني مو محتاجه مساعده حبيبتي قابل هو شنو الطبخ ميموت احد اني احبه ماكو مشكله وبعدين انتي دائما ايدج ويايه ومتخليني لوحدي

سكتت ورحت فرشت السفرة بالهول وسويت زلاطه عالسريع
شغلت الصوبه حتى يدفه الهول لان كلش بارد والكاربت الفارشي عليه خفيف ميدفي

شغلتهه ودا اطلع...

سمعت صوت مرت خالي : يله عاد وين صار العشى مو متنه جوع هو فلافل وبيتنجان لعد لو تسوين اكله دسمه شكد تطولين

اندقيت
صيحت بصوت عالي: عيني العشة جاهز لو متكرمه وطالعه من غرفتج اللي 24 ساعه معتكفه بيهه جان شفتي بعينج
على صوتي
طلعو كلهم من الغرفه خوالي ونسوانهم  اجوي عالحاضر كعدو وكلمن منهم لازك بمرته ويحضنهه مثل المراهق لا عدهم مستحى ولا خجل ولا حياء

درت وجهي منهم واني عصبيتي صاعده فول عليهم

جان تحجي بيداء مرت خالي عادل : ايييه شبيج ست شهد اشو معاجبج الوضع تباوعين صفح خير اكو شي

خنزرت عليهه  وكتلهه: لا سلامتج كلشي مابيه بس بدال ماصارلج ساعه تصيحين وتكولين وين العشه ووين صار جان تكومين تساعدين امي بالعشى ضهرهه انكسر وهي واكفه عالطباخ متكولين مره جبيره تعبت
اني تدرين بية سادس وامتحاناتي بهالفترة هي راح تحدد مستقبلي اكدر ادخل بكلوريا لو لا
يعني لو عندي وقت فراغ ولله كلشي ما اخليهه تسوي