بين الأمس والغد(قيد التعديل)

بارت 2

#بين الأمس والغد
#سارة ماجد

لكيت المديره مجتمعه بالطالبات بالساحه ومدري على شنو تحجي

شهد : لج مياده هاي شنو بس لا اصطفاف واحنه متأخرات ولله راح ناكلهه

مياده : لا مو اصطفاف مدتشوفين البنات نص فوك ونص بالساحه ووكفتهم مخربطه امشي خل نشوف شكو

رحنه للساحه وكفنه ويه السوادس  انوب احنه علمي ورحنه وكفنه يم الادبي .. ديله هي خربانه بقت على هاي

المديره بدت تلقي كلمتهه المعتادة واللي هي بنات عيب انتو كبرتو حافضو على نضافه المدرسه وعلى نضافتكم شخصيا وانتو بنات يعني لازم تكونين نضيفه دائما ومتميزة ليش هيج المدرسات ديشكون من وصاختكم يعني لو هاي مدرسه ولد جان نكول اي حقهم بله الولد ميهتمون بنفسهم هواي مثل البنات
يعني اللي اطلبه منكم رجاءً رجاءً حافضو على نضافتكم هاي اخر مره اكرر واذا سمعت شكوة من وحده من المدرسات اتصرف غير تصرف وياكم وقد اعذر من انذر

همست لميادة : ولج هاي شبيهه كابه علينه من الصبح منو كللهه احنه منسبح لو منتعطر

مياده: ولج هي مو قصدهه علينه اكو بنات صدك وصخات وفد مره ممهتمات لنفسهن ومن ضمنهم شلة سالي التعبانه حشة خلقه الله ولله من اشوفهه اتذكر نعال ابويه ابو الاصبع المشكك وشحاله

شهد: لج دباعيهه شلون دتخزرنه هي وجماعتهه ليكول كاتلين اهلهه واحنه مندري

مياده: خل تولي معليج بيهه تغار من عدنه الخايسه لان احنه متميزات وكل المدرسات يحبونه وهي يوميه تترزل

خلص الاصطفاف ورحنه صعدنه فوك وناس تدفع بناس يعني مادري شوكت يتثقف هذا الشعي ويمشي بأحترام هسه هي مدرسه شكو دتتدافعن وتتسابقن مراح اتطير ولله

وصلنه لصفوفنه بعد عناء طويل سلمت على البنات اجوي ايه وزهراء  احنه مجموعه اني ومياده وايه وزهراء كلش مقربات على بعض احنه الاربعه منضم شي على وحده يعرفون اسراري واعرف اسرارهم حبابات حيل وتقريبا احنه نفس المستوى بالدراسه يعني درجاتنه دائما متقاربه  رغم احنه منغش ابد

صارت ساعه 8 ضبط دك الجرس يعني الدرس الاول راح يبده كلت لايه: يولي شنو عدنه اول درس

ايه: عدنه الغضب الرياضيات هسه تجينه ست هبه وتبدي تصرع راسنا من الصباحيات

هستوهه ايه كملت جملتهه وجان تفوت ست هبه يمه همزين مسمعتهه اول مفاتت صبحت علينه وكالت طلعو دفاتركم دا اشوف الحل مال تمارين

هاي ست هبه كلش نخاف من عدهه هي عصبية حيل ومن تعصب تنسى حتى اسمهه الصف كله يرجف من عدهه اتذكر مره طالبه ويانه  جانت ناسيه دفترهه مال رياضيات جان تضربهه بالحافه مال دفتر ابو السيم  براسهه