جُـــنُـون Madness

كبرنا قبل الوقت

لما منكبر، ما منفقد مشاعرنا، بس منعيشن بطريقة مختلفة. بتحسن مثلا، تبكي بحرقة من دون دموع، وتحس نار شاعلة بقلبك بس من برا ما في شي. عادي، انت كبرت. وبتحسن مثلا، تحس انك مبسوط وزعلان بنفس الوقت. لخبطة دون مثيل. بس عادي، انت كبرت. لما كنا صغار كنا منعبر عكل مشاعرنا بطرق محددة. منبكي للزعل والحرة، ومنطنط ونضحك بصوت عالي لما منفرح. اليوم لا البكي ولا الضحك الو صوت. وجوهنا بتزعل وبتصير نظرتنا جامدة. عيونا بتدبل وبيرتسم تحتا خط من التعب والتفكير. نحن منكبر واحلامنا بتصغر. الي كان بيحلم يكون رئيس للبلد صار بدو يكون مهندس، والي كان بدو يطلع عالفضاء صار بدو يفتح قهوة، والي بدو يتزوج بنت الجيران الحلوة صارت امو تخطبلو وحدة ما بيعرفا. الالوان الي كنا منرسم فيها صارت اقلام جافة، ودورة السيارة الي كنا منسرح فيها صارت سباق مشان نوصل عالوقت. نحن منتأخر عكل شي الا عالكبر، منكبر قبل بوقت. ما بدي ارجع صغيرة، انا حبيت اني كبرت. بس كبرت عكس التيار. في كتير شغلات بدي بدلها. مثلا، بدي ارقص بحرية، مو بس لحالي، مع كل الناس. وبدي خبر الي بحبن اني بحبن دون ما افكر الف مرة قبل ما احكي، وبدي اغيب عن المدرسة لانو الدرس مو عاجبني، واقعد اتفرج على فيلم قديم وابكي عليه. انا اكتر شي راح مني هو احساسي، وبصراحة؟ خايفة كتير انو يرجعلي. عتاب البنت الصغيرة الي جواتي كبير كتير لانو ما عبحس. بس ونحن عمنكبر... بتكبر المواضيع الي بتحركنا وبتصير حقيقية اكتر. طيب... نحس ونحن اطفال بخيالنا، ولا نحس ونحن كبار بواقعنا؟