_والله يابتي كان نفسي أشتري ليك السوق كلو بس زي ما شايفة حالنا عامل كيف،يادوب القروش البطلعا من الشاي والجبنة تكفي للاكل والشراب وعلاج أبوك،،ربنا يسترنا بس لقدام ما نشحد الخلق،قولته ليها يمة ماتقولي كده ربنا كريم وأن شاء الله بفرجها علينا،أنا كفاية علي العباية الواحده دي،ح تقريني الجامعه بمزاج😻💃،مسحتا ليها دموعا،قالت لي ربنا يرزقك على قدر نيتك ويديك لمن يرضيك وما يحوجك لزول،قولته ليها امين يارب انا بدعواتك دي بتقدم،،جات اختي الاصغر مني رحيق قالت لي ح تسافري وتخلينا،يعني فيها شنو لو قريتي الجامعه هنا،،قولته ليها حسب التقديم القدمتو شالوني جامعه في الخرطوم،،مابطول منكم كل اجازة بجي هنا،،قالت لي ياخ ماتمشي هو القروا عملوا شنو،عرسي بس😁😂امي قالت ليها انتي عقلك الفاضي دا بس جنك عرس،خليك في،قرايتك دي،سلاحك الوحيد وح تنفعك،أنا ما دايراكم تبقوا جاهلين،التعليم دا ضروري،بعمل ليكم،شخصية وقرار وهيبة بين الناس،رحيق قالت ليها،سمح ح نقرا،أنا بلحق تالتة الجاية علي دي بس وبعرس وريتك😝أمي خبتتا في ضهرا😂😂قالت ليها قليلة ادب😒الزمن دا الراجل زاتو داير ليهو مرة بوظيفتها عشان تساعدو في العيشة المُرة دي،،هيي اقوم اصلي المغرب والحق امشي القط رزقي،،إيناس اسقي اخوانك اللبن وشربي ابوك الدواء،أنا مابتاخر الليلة،،قولته ليها سمح يمة،،،بعد أمي صلت،شالت عدتها حقت الشاي وطلعت،،رحيق قالت لي أنا بسخن اللبن انتي أمشي شوفي ابوي،قولته ليها من متين يختي بتحبي تساعديني،مالك؟،،قالت لي كده امشي وتعالي،عايزة اوصيك بكم حاجه لمن تمشي الخرطوم😂😂😂عاينتا ليها ومشيت لابوي في غرفتو،،اديتو الدواء بتاعو،،مسك يدي وقال لي ح تسافري متين؟،،قولته ليهو،بعد بكرة بإذن الله،،قال لي ابقي عشرة على روحك دي،وخلي بالك في قرايتك،وماتتابعي البنات الما ياهن سمح يا بتي؟؟،،قولته ليهو سمح،،بوستا راسو وطلعتا،،مشيت لرحيق في المطبخ لقيتا بتسخن اللبن،قولته ليها اها يا بت امي عايزة توصيني بشنو؟؟،،قالت لي لو مشيتي هناك،،النبي لمي ليك في واحد من النوع الغني داك😭💜😂،،اليطلعنا من فقرنا دا ويكون عندو اخو وامو ميتة،،قولته ليها ررررحيق أنتي ماعندك موضوع😂😂،أنا ماشة اقرا وبس،،بلا نوع غني معاك😒داك جيبي انتي،،قالت لي بجيبو وبجيب حنانو بس القى راس الخيط😢،،،سخنت اللبن،،ومشت أدت مؤمن ومؤيد،،،جاتني راجعه بقت تونس فيني،،مجنونة طبعا بحاجه اسمها عرس😂😂
احيانا الحياة مابتكون ماشة في نفس المسار النحنا مخططين ليهو،دايما بكون في عقبات أو خلونا نقول ابتلاءات،،الابتلاءات دي المفروض بدل ما نضعف فيها نتقوى،ونزيد إيمان بربنا أنو مابظلم زول مهما حصل❤،وانت اذا عايز تعيش في الدنيا دي نصيحه كده ماتتكل على زول،نفسك بس هي القادرة توصلك للحتة الانت بتحلم بيها❤،،أنا إيناس عمري 17سنة،امتحنتا تالتة أدبي وجبتا نسبة كبيرة الحمد لله،أنا في ولاية قريبة من ولاية الخرطوم،قدمتا في جامعه كنت بحلم حلم اني اقرا فيها،والحمد لله ربنا وفقني وح اقرا فيها،،أنا اكبر البيت،،شكلي عادي جدا،،بحب القراية شديد وعندي احلام كتيرة نفسي اصل ليها❤،،اصغر مني رحيق 15سنة،،مجنونه كده وجنها سيرة عرس😂😂،،بعدها مؤيد 10سنوات،،ومؤمن 7سنوات،،،قبل 3سنوات أبوي كان عندو عربية شغال عليها مواصلات وامورنا ماشة كويس بس قدر الله أنو يعمل حادث ويطلع من الحادث دا مشلول💔،هو كان مصدر رزقنا الوحيد،،،العربية كان فيها كم حاجه محتاجه تصيلح عشان ترجع تشتغل بس طبعا ما كان عندنا ليها قروش،،عمي اقترح علينا أنو يشتريها ويصرف علينا،،وطبعا قال لينا انو صعب تتصلح وخلانا نبيعا ليهو بتمن رخيص💔💔،،ومشى صلحها وكان بصرفنا لمده شهرين،بعدها قال لينا انا عندي مسؤولية غيركم وو،،شوفو زول غيري يصرف عليكم✋،،أمي زعلت شديد لمن جاها ضغط،،وقتها قررت بحبة القريشات المعاها تفتح محل شاي وتصرفنا منو،،وكانت ما سلمانة من كلام الناس💔أنو الشغلة دي فارغة💔وطلعوا فيها مية كلام،،بس أمي ما كانت شغالة بيهم،،كان همها الوحيد نحنا وابوي❤،،وحياتنا مشت على كده،،بس احيانا حق المدرسة مابنلقاهو،،بنمشي ونجي راجعين ناكل في البيت،،اهل أبوي اتغيروا مننا،،كانو زمان 24ساعه معانا،،حاليا لا💔،،،أما أهل أمي في ولاية تانية،بيتنا الحمد لله ملكنا عبارة عن غرفة وصالون،وعريشة كبيرة مقسومة،،جزو مفرشنو وجزو مطبخ❤،،،
أمي جات راجعه بعد صلاة العشاء،،اديتا لبن وجيت مسحتا ليها رجولا بحبة زيت سمسم،،قالت لي الله يرضى عليك يابتي❤،،رحيق نامت ولا شنو؟،،قولته ليها اي قبيل،،أنا قولته استناك، اها اليوم كان كيف؟،قالت لي والله الحمد لله،،القروش الطلعتا بيها كويسة،،،لاقيت عمك ومرتو وأنا جاية،،قالوا بكرة جاين يتكلموا في موضوع سفرك للجامعه مع ابوك،،قولته ليها وهم مالهم ومالي،،علو عايزين يمنعوني من السفر؟؟،قالت لي،شكلو كده،بس يسمهم،،تمشي تقري وكيه ليهم،،ما هديك بتهم مشت وقاعده في داخلية كمان،،أنتي زاتك تمشي،،أقل منها ولا أقل،،قولته ليها انا ما حاسباها اصلا،،أنا علي بنفسي بس ولا يحاولوا يدخلو في مواضيعي،،قالت لي أنا كلمتا ليك زهرة بت خالتي،،مرة طيبة ح تقعدك معاها في بيتا ومع بناتا بمزاج،،بدل تقعدي في داخلة،،ومصاريف الداخلية دي زاتا كتيرة نحنا مابنقدر عليها،،قولته ليها أنا بقعد في اي مكان ماعندي مشكلة،،بس اقرا هناك،،قالت لي ح تقري بإذن الله❤،،اتونستا معاها شوية بعدين مشيت نومتا،،،تاني يوم أصبح يوم جمعه،،صحينا بدري صلينا الصبح،،أنا قعدتا ادعي كتير أنو ربنا يسهل علي اموري،،وعمي ما يخرب علي فرحتي،،،بعد الفطور كده،،،عمي جانا هو ومرتو،،سلم علينا،،ودخل لابوي في الغرفة،،عملتا ليهم شاي ووديتو،،،ختيتو في التربيزة وكنتا طالعه،،عمي قال لي تعالي اقعدي انا جاي عشانك،،،قعدتا جنب أبوي في السرير،،،وبقيت اعاين ليهو،،قال لي شوفي يابتي،،ربنا مابتغشى،،انتي شوفي وضعكم كيف وتعب امك وابوك دا،،كيف تمشي تقري في الخرطوم وتخليهم،،هنا في جامعات بالهبل،،اختاري اي واحده ونسبتك كويسة شديد وح تقري بإرتياح وانتي جنب اهلك،،احسن ليك من الشحطتا،،هناك ح تقعدي مع منو؟؟،،وبتعرفي منو زاتك هناك،،ح تبقي غريبة،،أنا ماضد فكرة سفرك،،بس يا بتي كمان انتي ماتطلعي بالعلالي،،والخرطوم دي الزول لو مابقى ود عز صحي مابمشي يقرا فيها،،ولا شنو يا آدم اخوي؟؟،،،أبوي قال ليهو شوف يا إبراهيم أنا لو ما عجزي الأنا فيهو دا كان مسكتا ايناس دي من يدها ووصلتها لحدي الخرطوم،،انت قالوك نحنا عميانين من الجامعات الهنا؟؟،لا والله،،بس بتي رغبتها من زماااان في الجامعه ديك،،،ومنو قال ليك الخرطوم لاولاد العز،،الخرطوم دي للزول الصح وماشي عشان هدف معين،مش ود وزير ولا ود غفير،،للكل،،وأنا بتي واثق فيها،،ماشة عشان تجيب شهادتها،،ما ماشة لسبب تاني،،،حسيت أنو أبوي داعمني بشكل ماعادي❤❤ وكأنو بقول لي خليك بت أبوك وما تخزليني✋❤
#نتلاقى✌
