بعد عناء و تعب نغم روقت من الحصل ليها بس الليل كله ما ناموا و قعدوا يفكروا في الخطه التانيه و كانت كيف يخلوا لين تعترف بالعملته دا لانه كان واضح دي وحده من عمايلها (البنات كان بفكروا بطريقه منطقيه إذا افترضوا دي ما لين العملت الحركه دي حيكون منو لانه نغم ما عندها معارف كتار و بعدين ليه لين ما واجهت نغمو نصحتها و دا كله بندرج تحت لو كان موضوع الرسايل دي حقيقه ما فبركه من لين لانها المتهم الاول )
نغم : أنا ما قادره أصدق لين تعمل فيني كدا
إسلام : و الله دام هي انسانه خبيثه اكيد حتعمل كدا
شذى : ياخ دي زوله نفسها ما نضيفه ولا ١٪
نبأ : نغم انت لازم تبقي قويه عشان توجهي الزفته دي و ما تسكتي ليها
نغم مسحت دموعها و قالت ليهم : دا الشي الوحيد العايزه اعمله اني اوريها انه الله حق ولعبت مع الزول الغلط
البنات فرحوا شديد بكلام نغم
نغم : نبأ انت حتواصلي في نفس دور الشمتانه و تمشي ل لين و تحاول تستدرجيها بشماتك علي
نبأ : تمام ولا يهمك
شذى : الكلام دا حيبقى بكرا انا حأوصل نبأ و انت و اسلام انتظرونا هنا
إسلام : و كمان ما تنسوا التسجيل الصوتي و يكون في تلفونين من غير شريحه
نبأ : عُلم
بعد فتره أذان الصبح أذن و قاموا صلوا و دعوا ربنا انه الحق يظهر و يكشف لين ، بعد كم ساعه جهزوا و اتحركوا على بيت لين .
نبأ وصلت بيت لين و كانت لين بنفسها الفتحت ليها الباب و كان الربكه و الخوف في وشها ، و بعد ضيافه و ونسه
نبأ : هااي ما سمعتي الشماره الجديده
لين : شمارة شنو كمان ؟؟؟
نبأ : هههههههههه صحبتك نغم العويره طلقوها اللهم لا شماته
لين : اي طبعا عرفته
نبأ : نحن ما ورتنا الا امس و بعدين هي و طارق ما لايقين نهائي ، الولد ياخ كساااار عديل داير ليه وحده في مستواه يعني الزيك كدا و من غير مبالغه
لين : بالجد ؟؟
نبأ : شوفي الصراحه كدا انت احلى من نغم و مافيها شي غير قروشها و دا المخليني صحبتها و ما انا بس كلنا و حتى في حكايه انك احلى منها كلنا اتفقنا على كدا
لين :قولي و الله ؟؟؟
نبأ : بالجد و بعدين دي فرصه كونه طلقها على طول خشي في الخط
لين : وااااي ما قادره اصدق في زول متفق معاي ، طيب بقول ليك شي بس مافي زول يعرف
نبأ : من عيوني اهاا قولي
لين : أنا السبب في طلاق نغم
تباً لك 🥀🖤✨
