اهل مقدام حددوا العرس بعد شهر و نغم وافقت و ما كلفت عليهم اي شي لانها ما كان ناقصها حاجه بس الريحه و التياب و باقي حاجات بسيطه و بدت على طول دخان و ماسكات و تغذيه و ما كانت بتمرق من البيت ابداً لانها ما كانت محتاجه لملابس عشان تمشي تشتريهم (بت الهكس عندها غرفه كامله للملابس )
و كانت كل يوم بتمشي معارض فساتين الزفاف و ما كان بعجبها شي بعدين لقت ال في مزاجها و كدا الامور باسطه ، طبعاً الفتره دي كلها مقدام ما شاف وشها بس نقاب و جونتيات و دا ال كان فاقع مرارته و كل مره بحاول يقنعا تشيل النقاب بس بترفض الى ان جاء اليوم التاني ما حتلاقيه حتى بالنقاب مكالمات بس مقدام شويه و يبكي من الموضوع
و مرت الايام و خلاص الليله العقد و نغم و البنات كلهم في الكوفير من الصباح و بدوا يحننوها على طول عشان جوا بدري و بعد صلاه الجمعه عقدوا طبعا ما خلوا ليها مكان ما قرصوها فيه المسكينه قطعوا لحمها و بهناك الناس تبارك لمقدام و ما ادوه فرصه عشان يتصل على مرته بعد عذاب خلصت المباركات و انسحب براحه و مشى اتصل عليها
نغم : الو
مقدام : مبروك يا انا الله يقدرني عليك و ان شاء الله اكون ليك السند و العوض
نغم : الله يبارك فيك و انا كمان ربنا يقدرني عليك و ان شاء الله ربنا يرزقنا الذريه الصالحه
مقدام : شوفي انا ما طماع سته بس
نغم : الله اكبر سته و ما طماع ٤ كفايه
مقدام : هههههههههه خلاص بعدين نشوف المهم هسه انت محتاجه شنو اكل اي حاجه قولي؟؟؟
نغم : نحن الحمدلله ما محتاجين شي في مطاعم قريبه مننا بس انت قول عايز تجي بس مافي ليك
مقدام : اصلك لئيمه و انا ما نسيت انت و شلتك مستحيل تقعدوا جعانين دايما بلقاكم في الكفتيريا اصلا ما عرفتك الا منها
نغم : عليك الله دا وقت تذكرني الحاجات الأليمه دي المهم لنا لقاء مع السلامه
و جينا لحفله الزفاف :
الاتنين قرروا يعملوها في نادي كبير و كان في قسم للاطفال عشان ما يزعجوا في الزفاف ، التنسيق كان حاجه مبهره توزيع الاضاءه الكاميرات في كل مكان الطاقم المنظم للحفل منتشرين يعني الامور في السليم .
في البدايه العريس جاء و دخل مع اصحابه و اخد ليه فاصلين معهم بعدين العروس جات ياخ الناس دي لمن ما عرفتها من سماحتها (سمحه سماحه الجن على قول ساتاتا) الفستان كان ناعم لدرجه ما طبيعيه مكياجها ابرز ملامحها البريئه و كان كل شي فيها جميل
دخلت هي و مقدام كان واقف ليها في النص بعد ما فضوا الساحه و شغلوا ليهم اغنيه هادئه رقصوا فيها slow و بعدها اتجهوا على الكوشه (كلمه قديمه ) و الناس جات باركت ليهم بعدها حتوا قرض رقصوا لمن قالوا الروب و مشوا غيروا للجرتك و النادي شويه خفه من الزحمه المهم اتجرتكوا و اصحاب مقدام عملوا ليه اوفر نايت يعني اليوم دا الناس نزلت كم كيلو من الرقيص .
خلص الزفاف و الناس رجعت و الجماعه بدلوا ملابسهم و على الطياره لانه السفره كانت الساعات الاولى من الصباح
